“Kosova të hetojë vetë spekulimet e Del Pontes”

Teuta Sahatqija (Foto: Jetmir Idrizi)

“Kosova të hetojë vetë spekulimet e Del Pontes”


Nga më 11.04.2009 në ora 12:24

Teuta Sahatqija, kryetare e Partisë Reformiste ORA, kërkoi sot nga institucionet e vendit që të formohet një komision hetimor, i cili do të zbardhë pohimet e hedhura së pari nga ish-kryeprokurorja e Hagës, Del Ponte, për krime të kryera nga ana e ushtarëve të UÇK-së në burgje të Shqipërisë, gjatë luftës së vitit 1999.

Këto akuzat për krime, të cilat u riaktualizuan këto ditë pas një dokumentari të BBC-së dhe shkrimeve të BalkanInsight, sipas Sahatqisë në vazhdimësi po e dëmtojnë imazhin e Kosovës dhe të luftës së UÇK-së.

“Një kohë të gjatë po vazhdojnë spekulimet e nisura nga Carla del Ponte për krimet e bëra nga ana e ushtarëve të UÇK-së. Këto spekulime nxitën Parlamentin e Evropës dhe tash edhe EULEX-in për të kërkuar fakte”, tha kryetarja e ORA-së, të shtunën në një konferencë për gazetarë.

Partia Reformiste ORA menjëherë pas këtyre pohimeve të Del Pontes ka kërkuar që vetë Kosova të jetë ajo e cila do të hetojë rastin dhe të dalë me fakte kundër kësaj deklarate.

Sahatqija theksoi se fatkeqësisht institucionet e vendit vetëm verbalisht kanë kundërshtuar dhe nuk kanë ndërmarrë asnjë veprim konkret në mbrojtje të luftës së UÇK-së.