Mustafa: Zgjedhjet serbe nuk duhet të mbahen në Kosovë

nga **Agim Gashi** Fri Mar 16, 2012 8:30 pm

Mustafa: Zgjedhjet serbe nuk duhet të mbahen në Kosovë

Kreu i LDK-së, Isa Mustafa tha se dje u është bërë e qartë shteteve të Quintit se zgjedhjet serbe nuk duhet të mbahen në Kosovë, duke i dhënë mbështetje Qeverisë së vendit për të ndaluar mbajtjen e tyre.
Sa i përket mundësisë së bisedimeve për veriun, Mustafa tha se nuk do të bisedohet me Serbinë për veriun e Kosovës.
Lideri i LDK-së, Isa Mustafa tha se është kërkuar edhe përgjegjësi nga ekzekutivi i vendit për të parandaluar mbajtjen e zgjedhjeve serbe në Kosovë.
“Ne dje kemi marr qëndrim unanim si pozita ashtu edhe opozita, në takimin që kemi pas me shtet e Quintit. E kemi bërë të qartë se nuk do të lejojmë që të mbahen zgjedhjet, sepse ajo është një shkelje e integritetit territorial të vendit tonë edhe sovranitetit të vendit. Dhe po ashtu kemi kërkuar përgjegjësi edhe nga kryeministri Thaçi dhe nga qeveria që të ndërmarrin masat për ta penguar mbajtjen e këtyre zgjedhjeve”, tha ai.
Sa i përket mundësisë së hapjes së bisedimeve për veriun e Kosovës, Mustafa tha se nuk ka bisedime për veriun e Kosovës me Serbinë, duke shtuar se me qytetarët e asaj pjese mund të bisedohet. “Për ne nuk ka bisedime për veriun e Kosovës. Ne mund të zhvillojmë dialog me gjithë qytetarët e vendit, edhe me serbët edhe në veri edhe në jug, por jo me Serbinë për veriun e Kosovës, sepse veriu i Kosovës është rregulluar me Kushtetutën e Republikës së Kosovës, i përket sovranitetit të vendit. Nuk mund të rregullohet ndryshe veriu i Kosovës nga rregullimi në komuna tjera. Maksimumi i cili mund të realizohet për veriun është ajo çka vjen si rezultat i pakos së Ahtisarit”, ka deklaruar Mustafa.
Sa i përket deklaratës së djeshme të kryeministrit, Hashim Thaçi para deputetëve, se nëse ndryshohen kufijtë, atëherë shqiptarët më së miri mund të jetojnë në një shtet të vetëm, kreu i LDK-së Mustafa tha se nuk e ka dëgjuar, duke shtuar se nuk e sheh mundësinë e ndryshimit të kufijve.
“Nuk e kam dëgjuar deklaratën. Nuk e di si e ka paramenduar zotëri Thaçi atë, por unë nuk shoh asnjë mundësi që të ndryshohen kufijtë e Kosovës. Tani po e ndërtojmë shtetin tonë dhe po angazhohemi që Kosovën të ndërtojmë si shtet në kufijtë që i ka Kosova të përcaktuar me Kushtetutë”, tha Mustafa.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30