PD: Zgjedhjet të mbahen edhe në diasporë

PD: Zgjedhjet të mbahen edhe në diasporë






Partia e Drejtësisë ka shprehur shqetësimin e saj që KQZ nuk e miratoi kërkesën e shumicës së partive politike, për vendosjen e kamerave ne vendvotime. Vendosja e kamerave, sipas kësaj partie, me siguri do të shtonte edhe numrin e votuesve në zgjedhjet vendore 2009 për shkak të besueshmërisë së tyre më të madhe.
“Kërkojmë nga KQZ që duke qenë se vendimi i tyre ka qenë në kundërshtim me vullnetin e shumicës së qytetarëve të Kosovës ta rishqyrtojë atë dhe të marrë vendim për vendosjen e kamerave në qendrat e votimeve dhe numërimit të votave. Për këtë PD do të parashtrojë kërkesë të veçantë me shkrim”, ka thënë Amir Ahmeti, nënkryetar i PD-së. Njëkohësisht, PD i ka bërë thirrje KQZ-së që në rrugën sa më të shpejt të shohë mundësinë e organizimit të zgjedhjeve edhe në diasporë. “Derisa OSBE iu mundësonte bashkatdhetarëve tanë për të marrë pjesë në zgjedhje duke votuar nëpërmjet internetit apo me zarfe të organizuara nga zyra e saj në Vjenë, PD kërkon që nëpërmjet ambasadave të Kosovës në diasporë t’ua japim mundësinë e votimit edhe atyre”, kanë thënë Ahmeti të dielën, në konferencën e rregull për media. PD po ashtu ka konstatuar se, institucionet e Kosovës nuk e kanë zbatuar Kushtetutën e Kosovës në aspektin e mbajtjes së rendit, qetësisë dhe kontrollit në tërë territorin e vendit. Partia e Drejtësisë ka dënuar përdorimin e dhunës nga cilado palë por edhe ka kërkuar drejtësi dhe respektim të Kushtetutës në tërë territorin e vendit.