Gjeneralët, Beqir Balluku, Petrit Dume dhe Hito Çako, të cilët u ekzekutuan më 5 nëntor të vitit 1975

Në harkun e tetë orëve të një dite vjeshte janë nënshkruar tri dokumente zyrtare që kanë mbyllur procedurën e dënimit të tre gjeneralëve të shpallur puçistë e tradhtarë. Së paku në dosjen sekrete ku është hedhur e zeza mbi të bardhë, kjo shquhet pa shumë vështirësi, qoftë edhe me një vështrim të përciptë. Çuditërisht, ka ndodhur vërtet kështu: Vendimi për dënimin me vdekje të Beqir Ballukut, Petrit Dumes e Hito Çakos, përgjigjja negative e Presidiumit të Kuvendit Popullor për t’u falur jetën dhe dokumenti i ekzekutimit të tyre, mbajnë të njëjtën datë: 5 nëntor 1975! Pra, gjyqi ndaj gjeneralëve komplotistë, mbledhja e organit zyrtar për shqyrtimin dhe kërkesën për falje dhe pushkatimi i tyre është bërë në këtë ditë. Të tria aktet zyrtare, veç datës, mbajnë edhe orën e nënshkrimit. Firma e parë është hedhur në orën 10:00 të paradites dhe ajo e fundit, e cila i përket raportit për ekzekutimin e të dënuarve, i përket orës 16:00. Gazeta “Panorama” ka mundur të sigurojë urdhrin sekret të Kadri Hazbiut, ish-ministrit të Brendshëm për ekzekutimin e të dënuarve Beqir Balluku, Petrit Dume e Hito Çako, në të cilin pasi bëhet i ditur refuzimi i kërkesës së tyre për t’u falur jetën nga Presidiumi i Kuvendit Popullor, porositen ekzekutorët për zbatimin e vendimit të gjyqit në “vendin e caktuar”. Në të njëjtin dokument zyrtar, tërheq vëmendjen udhëzimi special i kreut të Sigurimit për të regjistruar fjalët e fundit të gjeneralëve para pushkatimit. Të përpiktë ndaj shefit, të besuarit e kryesigurimsit, pasi do të bënin ekzekutimin e gjeneralëve, do të raportonin me shkrim për aq sa dëgjuan nga goja e tyre. Në procesverbalin përkatës kanë mbetur të dokumentuara klithmat e fundit të gjeneralëve të martirizuar si puçistë e tradhtarë...

Urdhri: Pushkatoni në vendin e caktuar
URDHËR
Lënda: Mbi ekzekutimin me vdekje (pushkatim) të tre të dënuarve
Ministrisë së Punëve të Brendshme
Drejtorisë së Hetuesisë
TIRANË
Për njoftim Prokurorisë së Përgjithshme
TIRANË
Në bazë të Vendimit Nr.10 datë 5 nëntor 1975 të Gjykatës së Posaçme Ushtarake janë dënuar me vdekje (pushkatim) personat Beqir Ali Balluku, Petrit Taulla Dume dhe Hito Shaqo Çako.
Meqenëse Presidiumi i Kuvendit Popullor me shkresën numër 850, datë 5 nëntor 1975 njofton refuzimin e kërkesës për faljen e jetës së tyre
URDHËROJ
Që të dënuarit Beqir Ali Balluku, Petrit Taulla Dume dhe Hito Shaqo Çako të ekzekutohen me vdekje (pushkatim) në vendin e caktuar më datë 5 nëntor 1975 ora 16:00
Për ekzekutimin e tyre, ngarkoj grupin e caktuar të Drejtorisë së Hetuesisë. Para se të ekzekutohen të njoftohen të dënuarit e sipërpërmendur se kërkesa për faljen e jetës, u refuzua nga Presidiumi i Kuvendit Popullor. Pas ekzekutimit, i ngarkuari me punë duhet të bëjë procesverbalin e ekzekutimit të vendimit që mban edhe fjalët e fundit të të ekzekutuarve.
Ministri i Punëve të Brendshme
Kadri Hazbiu

Raporti: Fjalët e fundit të gjeneralëve

PROCESVERBAL

Në Tiranë, më 5/XI/1975
Në bazë të urdhrit të ministrit të Punëve të Brendshme Nr.850 datë 5/XI/1975, ora 16:00, në vendin e caktuar në prani të prokurorit Murat Kanani dhe të mjekut Nevzat Vigani, nga unë Nevzat Haznedari, i ngarkuari i Drejtorisë së Hetuesisë, u ekzekutua vendimi me vdekje për armiqtë komplotistë Beqir Ali Balluku, Petrit Taulla Dume dhe Hito Shaqo Çako.
Para ekzekutimit secili nga këta armiq u njoftua nga prokurori se Presidiumi i Kuvendit Popullor refuzoi kërkesën e tyre për faljen e jetës. Mbas kësaj ata thanë:

1. Beqir Ali Balluku – Nuk foli fare
2. Petrit Taulla Dume – “Të rrojë populli, të rrojë partia”
3. Hito Shaqo Çako – “Mirë”

Në përfundim u krye ekzekutimi i tyre nga unë Nevzat Haznedari dhe pasi u kontrolluan nga mjeku Nevzat Vigani, u konfirmua vdekja e tyre