Edhe LDK-ja nuk bëhet pjesë e ekipit negociator

nga **Agim Gashi** Tue Jun 05, 2012 10:30 pm

Edhe LDK-ja nuk bëhet pjesë e ekipit negociator

Lidhja Demokratike e Kosovës dhe Aleanca për Ardhmërinë e Kosovës nuk kanë marrë ndonjë ftesë për të qenë pjesë e ndonjë ekipi që do të bisedonte për veriun e vendit.

Por edhe sikur të kishin ftesë, zyrtarë të dy subjekteve opozitare, thonë se përgjigja do të ishte negative. Sekretari i përgjithshëm i LDK-së, Ismet Beqiri tha se LDK-ja nuk hyn në kombinime të tilla për ta ndarë fajësinë, që sipas tij, e ka Qeveria aktuale për veriun.

“Ne nuk bëhemi pjesë e bashkëfajësisë në kuptimin e përgjegjësisë që ka zoti Thaçi me dështimet e gjertanishme që i ka në të gjitha aspektet e veçmas në bisedime, të cilat i ka shpallë se janë teknike, e tash po dalin politike. Për LDK zgjidhja për veriun është e gatshme dhe ajo është në pakon e presidentit Ahtisaari”, tha ai.

Përfaqësuesit e opozitës thonë se për ta zgjidhur çështjen e veriut, nuk ka nevojë për ekipe të veçanta, apo për çfarëdo kombinimi tjetër, por vetëm duhet zbatuar Pakoja e Ahtisaarit.

Qeveria e Kosovës nga ana tjetër, ka shprehur gatishmërinë të bisedojë me serbët e veriut, si qytetarë të Kosovës, por jo edhe me Beogradin, pa u implementuar marrëveshjet e arritura në dialogun teknik.

Isufi: Nuk do të jemi pjesë e ndonjë ekipi për veriun

Aleanca për Ardhmërinë e Kosovës nuk pranon të jetë pjesë e ndonjë ekipi për të biseduar për çështjen e veriut të vendit. Kështu është shprehur nënkryetari i AAK-së, Ahmet Isufi, në konferencën e sotme për media.

“Kosova është shtet i pavarur dhe sovran dhe askush nuk ka të drejtë dhe nuk guxon të bisedojë me askënd për veriun, përveçse me qytetarët e kësaj pjese”, theksoi Isufi.

Aleanca për Ardhmërinë e Kosovës nuk ka marrë asnjë ftesë për të qenë pjesë e ndonjë ekipi që do të bisedonte për veriun e Kosovës, por edhe sikur të kishte ftesë, përgjigjja do të ishte negative. Kështu deklaroi nënkryetari i AAK-së, Ahmet Isufi, sipas të cilit AAK-ja nuk pranon të jetë pjesë e çfarëdo ekipi qeveritar për të biseduar për veriun.

“Jo, sepse i kemi kryer punët me ekipe në të kaluarën, tani Kosova duhet të funksionojë si shtet dhe kjo Qeveri e cila nuk ka investuar deri tash gjë që nuk po e bën edhe më tutje, mendojmë se duhet të shkojë nga skena e qeverisjes”, tha Isufi.

Isufi theksoi se Kosova ka nevojë për një Qeveri tjetër që siguron jetë më të mirë për të gjithë qytetarët dhe garanton liri të lëvizjes në gjithë territorin e vendit. Këto komente, nënkryetari i AAK-së i bëri në konferencën për media, në të cilën u bë publik kalimi i një pjese të kryesisë së degës së AKR-së në Kaçanik.

Kryetari i deritashëm i degës së AKR-së, Naser Troni tha se në AAK ka kaluar pasi që këtë parti e vlerëson serioze dhe të organizuar mirë, ndërsa dha arsyet pse është larguar nga AKR-ja.

“Subjektin politik të cilin e kam lëshuar ka qenë për motive të organizimit të dobët dhe ka qenë më shumë një aventurë politike e disa njerëzve në atë subjekt”, tha Troni.

Kalimi i një pjese të kryesisë së degës së AKR-së në AAK, vjen pak ditë para zgjedhjeve të jashtëzakonshme për kryetar të Kaçanikut. Drejtuesit e AAK-së thonë se me këtë po tregohet se AAK-ja në Kaçanik, po fuqizohet dhe do të ketë rezultate të mira në zgjedhjet e jashtëzakonshme që do të mbahen më 17 qershor.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30