Sali Çekaj, Adem Jashari, Zahir Pajaziti armatosnin Kosovën

Sali Çekaj, Adem Jashari, Zahir Pajaziti armatosnin Kosovën

Familjarët e Sali Çekajt dhe Agim Ramadanit morën mirënjohjen “Heroi i Kosovës” nga presidenti Sejdiu, të akorduar nga presidenti Rugova.



“Të shpresojmë se gjërat do të qartësohen dhe korrigjohen, sepse të gjithë i kemi borxh që duhet larë ndaj këtij njeriu. Sidoqoftë me punën dhe përkushtimin e tij prej politikani dhe ushtaraku, Sali Çekaj do të mbetet përherë në piedestalin e kujtesës tonë historike”, tha Bruqi

Prishtinë - Muri i zi ndarës ndërmjet Kosovës e Shqipërisë u thye nga ‘burrat e dheut, Agim Ramadani e Sali Çeku, tha presidenti Fatmir Sejdiu në dhjetëvjetorin e rënies së këtyre dy heronjve. Presidenti Sejdiu, tha se fitorja në Betejën e Koshares është pa dyshim njëra ndër pikat më të shndritshme të luftës sonë për liri gjatë viteve 1998-’99. “Ajo shënoi fillimin e fundit të pushtimit gati njëshekullor të vendit tonë nga Serbia, por njëkohësisht edhe sinjalin e qartë të rilindjes së Kosovës”, tha Sejdiu në Akademinë qendrore kushtuar dhjetëvjetorit të rënies së politikanit, intelektualit dhe heroit Sali Çekaj. Presidenti Sejdiu tha se misioni i heronjve është përmbushur. “Me gjithë sfidat e shumta që kemi pasur në këtë dhjetëvjetësh, me krenari mund të themi se misioni për të cilin ranë heronjtë e Koshares, Agim Ramadani e Sali Çekaj, dhe heronjtë e tjerë të luftës së fundit çlirimtare të Kosovës, si Adem Jashari, Zahir Pajaziti e shumë të tjerë, është përmbushur. Është përmbushur vizioni politik i Presidentit Rugova: Kosova është vend i pavarur, sovran dhe demokratik, shtet i të gjithë qytetarëve të saj të barabartë, me synime krejtësisht të qarta për të ardhmen - integrimin sa më të shpejtë në strukturat euroatlantike”, tha Sejdiu.
Sali Çekaj, në Perëndim, bashkë me shumë patriotë ishte ndër të parët që u mor me përgatitjen e rezistencës së armatosur. Edhe Agim Ramadani, u shndërrua në një model të luftëtarit e të prijësit të suksesshëm.
Sylë Bruqi duke folur për jetën dhe veprimtarinë e politikanit dhe dëshmorit të kombit Sali Çekaj, në emër të përfaqësuesve të Brigadës 138 ”Agim Ramadani”, tha se Çekaj së bashku me 30 persona tjerë në mesin e të cilëve Adem Jashari, Zahir Pajaziti, nën përkujdesjen e sigurimit të shtetit shqiptar sillnin armatim në Kosovës. Ai tha se Çekaj, ishte i angazhuar në dy fronte, në atë ushtarak dhe diplomatik. Ai tha se rënia e tij ishte një humbje e madhe jo vetëm për Ushtrisë Çlirimtare të Kosovës, por edhe për projektin politik në Kosovë.
“Është koha, momenti dhe në nderin e të gjithëve se e vërteta dhe meritat e secilit, veçanërisht të Sali Çekajt, duhet të thuhen pa paragjykime. Kjo u takon shokëve të tij të veprimtarisë politike, veçanërisht ushtarake, sepse ndryshe po anashkalohet roli meritor i brigadës, mbase ndoshta edhe si pasojë e elasticitetit politik të gjithë pjesëtarëve të brigadës së dikurshme”, tha Bruqi. Presidenti Sejdiu më pas ftoi familjarët e heronjve Sali Çekaj dhe Agim Ramadani, që të marrin mirënjohjen më të lartë të vendit, Urdhrin "Heroi i Kosovës", me të cilin ata i pat nderuar Presidenti historik i Kosovës, dr. Ibrahim Rugova.
Ndërsa, nga Ministria e Drejtësisë Sali Çekaj u nderua me çmimin për drejtësi, të cilin ia dhuroi zëvendësministri i Drejtësisë Arsim Janova.
Në këtë akademi, e cila u moderua nga Bahri Gashi, ish luftëtar i Koshares, ishin të pranishëm përfaqësues të jetës politike dhe kulturore, përfaqësuese të institucioneve të Kosovës, veteranë, invalidë dhe familjarë të dëshmorëve të kombit.
/ I. Morina