BE-ja shqyrton letrën e Jahjagës dërguar Eshtonit

nga **Agim Gashi** Tue Sep 04, 2012 4:51 pm

BE-ja shqyrton letrën e Jahjagës dërguar Eshtonit

Brenda dy ditësh pritet që shefja e diplomacisë evropiane Catherine Ashton të përgjigjet pozitivisht në kërkesën e presidentes së Kosovës Atifete Jahjaga për zgjatjen e mandatit të misionit evropian, EULEX në Kosovë deri më 15 korrik 2014. Letra e presidentes, e cila i është dërguar dje, sot do të jetë në tryezën e Këshillit të Ministrave të BE-së, ku do të merret vendimi për vazhdimin e mandatit të EULEX-it.

Letra e presidentes Atifete Jahjaga dërguar shefes së diplomacisë evropiane, Catherine Ashton, do të shqyrtohet sot nga Këshilli i Ministrave të Bashkimit Evropian. Jahjaga në letrën e saj, i bën ftesë BE-së ta vazhdojë mandatin e EULEX-it në Kosovë në mandatin aktual deri me 15 qershor 2014.

Letërkëmbimi ndërmjet Jahjagës dhe Ashtonit, pritet të ratifikohet si marrëveshje në Kuvendin e Kosovës të premten, bashkë me bashkë me pakon ligjore për përfundimin e mbikëqyrjes së pavarësisë.

Pëlqimin për këtë tashmë e kanë dhënë dy partitë opozitare, LDK e AAK, por jo edhe Lëvizja Vetëvendosje. Zëvendëskryeministri Hajredin Kuçi thotë Kosova ka nevojë për praninë e EULEX-it edhe për dy vitet e ardhshme.

“Ne kemi menduar se edhe dy vitet e ardhshme Kosova ka nevojë për veprime të tilla, po ashtu është menduar edhe nga BE-ja, që EULEX-i të jetë prezent, por jo një prezencë në një shtet që do të ketë mbikëqyrje ndërkombëtare, por në një shtet sovran dhe të pavarur që ka nevojë me ngritjen e kapaciteteve në vendosjen e rendit dhe ligjit”, tha Kuçi.

Zëdhënësi i EULEX-it, Blerim Krasniqi i tha radio Kosovës se që nga 14 qershori i këtij viti kur misioni i EULEX-it ka filluar të ristrukturohet janë dy sektorë kryesorë në të cilët është e përqendruar puna e këtij misioni; Sektori i fuqizimit, që ka për qëllim t’u ndihmojë institucioneve të Kosovës përmes monitorimin, mentorimit dhe këshillimit, dhe sektori ekzekutiv ku stafi i EULEX-it punon si gjykatës, prokurorë, hetues policor etj.

“Do të thotë janë këto dy fusha, sektori i fuqizimit dhe sektori ekzekutiv me të cilat do të merret EULEX-i deri më 14 qershor 2014”, tha Krasniqi për transmetuesin publik.

Me përfundimin e mbikëqyrjes së pavarësisë së Kosovës më datën 10 shtator, EULEX-i do të mbetet i vetmi institucion ndërkombëtar në Kosovë me fuqi ekzekutive në fushën e sundimit të ligjit. Zëvendëskryeministri Kuçi thotë kjo nuk e zbeh aspak përfundimin e mbikëqyrjes së pavarësisë.

“Kjo nuk është ajo që e zbeh fundin e mbikëqyrjes së pavarësisë, por është ajo që është menduar duke marrë parasysh gjendjen reale në Kosovë dhe atë që është perceptimi i BE-së për zhvillimet në Kosovë”, u shpreh ai.

Që nga qershori është zvogëluar stafi i EULEX-it në 2 mijë e 250 pjesëtarë, nga 3 mijë sa numëronte në vitin 2008, kur ky mision u vendos në Kosovë me ftesë të institucioneve të Republikës së Kosovës.

Ai ishte paraparë me planin e kryenegociatorit të Kombeve të Bashkuara, Martti Ahtisaari, në bazë të të cilit edhe është shpallur pavarësia e Kosovës.

Mospajtimi i Serbisë dhe aleates së saj Rusisë, më pavarësinë e Kosovës si dhe mosnjohja nga një pjesë e vendeve të Bashkimit Evropian, bëri që ky mision të ketë qëndrim të paanshëm ndaj statusit të Kosovës.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30