Kurti: Kur ecim ndaras, nuk arrijmë as ndaras

nga **Agim Gashi** Sun Sep 23, 2012 2:30 pm

Kurti: Kur ecim ndaras, nuk arrijmë as ndaras

Kombi, para së gjithash, është gjuhë. Gjuha mësohet e lexohet, shkruhet e kultivohet, nëpër shkolla. Edhe shkolla, porsi kombi, para së gjithash, është gjuhë. Gjuha e mundëson kombin dhe gjuha e mundëson shkollën. Mirëpo, gjuha e mundëson edhe lidhjen e këtyre dyjave. Gjuha ia jep shkollën kombit dhe gjuha ia jep shkollës kombin. Gjuha e bën shkollën kombëtare dhe kombin të shkolluar. Gjuha është mjeti që na bashkon përmes komunikimit, porse gjuha është edhe shtëpia ku banojmë të bashkuar. Rilindja kombëtare shqiptare i ka rrënjët te gjuha jonë. Dëshmorët e parë të shqipes janë dëshmorë të gjuhës. Ata janë dëshmi e kombit, dëshmi e historisë sonë kombëtare, dëshmitarë të ecjes sonë të përbashkët. Ata vepruan për të jetuar kombi dhe ranë për t’u ngritur kombi. Sa të jetojë kombi do të jetojnë edhe dëshmorët e tij. Dhe, duke iu falenderuar dëshmorëve të kombit jetojmë ne si shqiptarë. Ashtu qysh Dom Mikeli i mblidhte nxënësit e tij para një shekulli, ai sërish na ka mbledhur edhe neve sot, me një dëshirë dhe me një qëllim, me të njëjtën dëshirë dhe me të njëjtin qëllim: bashkimin rreth flamurit tonë kombëtar. Edhe pavarësia e Republikës së Shqipërisë, edhe pavarësia e Republikës së Kosovës janë bërë në emër të kombit dhe për kombin. Të gjitha hovet në ecjen tonë kanë qenë kombëtare. Kur ecim bashkë arrijmë bashkë. Kur ecim ndaras, nuk arrijmë as ndaras. Ne duhet ta theksojmë të përbashkëtën tonë, e jo dallimet midis nesh. Kur fitojmë së bashku, kur e përbashkëta jonë fiton, atëherë fitorja jonë është e qëndrueshme. Ne duhet t’i rrisim ambiciet kombëtare e kolektive dhe jo ato individuale e personale. Duhet të jemi së pari krenar si shqiptarë, e mandej krenar si emra të përveçëm. Vetëm kështu do të jemi të sigurt që krenaria jonë nuk është mendjemadhësi.
Në gjithë botën sot toleranca ndërfetare konsiderohet sukses. Mirëpo, në këtë aspekt, shqiptarët janë para gjithë botës. Sepse, ne jemi përtej tolerancës ndërfetare dhe kemi më shumë se tolerancë ndërfetare. Te kombi shqiptar kemi bashkëpunim dhe bashkëveprim ndërfetar. Si në paqe po ashtu edhe në luftë. Kombi shqiptar ka heroj dhe dëshmorë të të gjitha feve në të gjitha epokat. Kur heronjtë dhe dëshmorët e kombit nuk i ndau as vdekja, të gjithë neve le të mos na ndajë kurrë jeta. Më lejoni të përfundoj me një thënie te monumenti i shkollës së parë shqipe të Dom Mikelit, në Stubëll të Vitisë, tash të shndërruar në muze, të cilën e lexova para se të vijë në këtë tubim të sotëm: “Vetëm kush e do Hyjin, Atdheun, Lirinë deri në vetëflijim mund ta kuptojë e dojë Shqipërinë, vend ky besnik i heronjve dhe martirëve...”.

Ju faleminderit!

Fjalimi i Albin Kurtit, në Stubëll të Vitisë
22 shtator 2012

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30