Kadri Veseli: Nuk kam qenë këshilltar i Thaçit

nga **Agim Gashi** Sun Sep 30, 2012 11:12 pm

Kadri Veseli: Nuk kam qenë këshilltar i Thaçit

Revista sllovene, “Mladina”, në një artikull të botuar në numrin e fundit, ia ka kushtuar situatës politike në Kosovë, ndërsa ka intervistuar, siç përshkruhet në fillim të tekstit, “njeriun më me ndikim në Kosovë”, Kadri Veselin, ish drejtorin e Shërbimit Informativ të Kosovës (SHIK).
“Mladina”, në intervistën e saj thotë se Veseli ka qenë këshilltar i kryeministrit Hashim Thaçi, njëri nga themeluesit e UÇK-së, ndërsa pas përfundimit të mbikëqyrjes ndërkombëtare të pavarësisë së Kosovës, po i bënë hapat e parë për përfshirje në politikë.
Mladina: Më 10 shtator 2012, Grupi Drejtues Ndërkombëtar (GDN) i ka dhënë fund periudhës së pavarësisë së mbikëqyrur të Kosovës. A do të thotë kjo që Kosova tani është e pavarur?
Veseli: Kosova është një vend i pavarur që nga 17 shkurti i vitit 2008. Por, fundi i pavarësisë së mbikëqyrur është një moment historik për Kosovën. Kjo e ka forcuar pavarësinë e saj. Kosova tani ka mundësinë që vërtet të shprehë misionin e saj për të ardhmen, por gjithashtu edhe t’i korrigjojë disa gabime historike nga e kaluara.
Mladina: Por, ju ende keni probleme me palën serbe.
Veseli: Njerëzit e Brukselit, të cilët merren me Kosovën, po mundohen të mbështesin agjendën tonë drejt tranzicionit politik; për ruajtjen e paqes dhe qëndrueshmërisë, dhe për zhvillimin e një shoqërie demokratike. Ne kemi disa probleme me palën nga Beogradi, e cila po e pengon këtë proces.
Por, ne jemi një vend i pavarur, i vendosur për të ecur përpara drejt integrimit brenda Bashkimit Evropian. Kosova dhe Serbia janë që të dyja vende të pavarura dhe që të dyja kemi të njëjtin qëllim, i cili është integrimi në BE. Ne shpresojmë se Serbia në të ardhmen e afërt do t’i ndryshojë pikëpamjen dhe veprimet e saj, dhe do të fillojë të sillet ashtu siç i ka hije një vendi demokratik evropian.
Mladina: Cilat janë problemet më të mëdha për Kosovën tani? Çka ju shqetëson më së shumti?
Veseli: Ne i kemi disa çështje të cilat mund të konsiderohen probleme, si në çdo vend tjetër në tranzicion. Gjendja ekonomike dhe sociale, sundimi i ligjit, korrupsioni... Andaj, neve na duhet të zhvillojmë vendin tonë ekonomikisht dhe të krijojmë institucione të qëndrueshme.
Ne mund të flasim edhe për një deficit demokratik, pasi tani për tani të rinjtë e Kosovës janë jashtë sferës politike. Shumë prej tyre janë edhe jashtë zhvillimit ekonomik dhe nuk shohin një të ardhme të ndritshme. Si çdo vendi në tranzicion, Kosovës gjithashtu i duhet kohë për progres. Potenciali që unë e shoh, dhe të cilin Kosova nuk e ka shfrytëzuar deri më tani, qëndron pikërisht te rinia jonë.
Mladina: Siç kam lexuar në mediet tuaja, problemi i korrupsionit në Kosovë është i lartë. Për shembull, prokurori i EULEX-it e ka akuzuar zëvendëskryeministrin e Kosovës, Bujar Bukoshi, dhe dhjetë zyrtarë të tjerë të lartë, për korrupsion. Më pas, ish-shefi i taskforcës kundër korrupsionit, Nazmi Mustafi, është arrestuar me akuza për korrupsion. Kreu i Agjencisë së Privatizimit, Dino Asanaj, është therë për vdekje derisa ka qenë nën hetime për gjoja kërkim të ryshfetit. Dhe, ka edhe probleme në nivelin lokal. Përkundër premtimit të kryeministrit Hashim Thaçi për një politikë zero tolerancë ndaj korrupsionit, nuk duken shenja të përmirësimit. A ka Kosova plan për t’i hequr qafe çështjet e tilla, a ka plan si të merret me këto probleme?
Veseli: Natyrisht, ne jemi një vend në tranzicion. Dhe, si shumë vende të tranzicionit më parë, Kosova gjithashtu po përballet me këto fenomene negative. Korrupsioni në Kosovë po ndodh pikërisht për shkak të këtyre problemeve që unë i përmenda më sipër. Por, me forcimin e sundimit të ligjit ne tani mund të fillojmë të merremi me problemet e së kaluarës. Ne tani mund të luftojmë çdo formë të korrupsionit. Pa asnjë përjashtim.
Dhe, të gjitha këto padi për korrupsion, edhe në nivelin e lartë politik që ju e përmendni, mund të jenë një shenjë për komunitetin evropian se Kosova po fillon të luftojë këtë fenomen. Se askush nuk është i mbrojtur apo imun nëse është i përfshirë në gjëra të tilla të këqija. Ne nuk po e mohojmë faktin se ka korrupsion. Ne po e marrim këtë si një shtysë për të forcuar dhe për të respektuar sundimin e ligjit.
Mladina: Korrupsioni gjithashtu ka shkaktuar paqëndrueshmëri në koalicionin udhëheqës të Kosovës, dhe gjithashtu partinë tuaj, Partinë Demokratike të Kosovës (PDK). Dhe, duket të ekzistojnë mosmarrëveshje ndërmjet udhëheqësve të partisë për qasjen në dialogun ndërmjet Kosovës dhe Serbisë. Siç raportojnë disa medie, këto konflikte mund të shkaktojnë një krizë institucionale në Kosovë, dhe ka supozime se kryeministri dhe shefi i PDK-së do të kërkojë një votëbesim në Kuvend. A jeni i kënaqur me mënyrën se si po i qaset Thaçi marrëdhënieve Kosovë-Serbi?
Veseli: Ne duhet të parandalojmë gjithçka që mund të na çojë në krizë apo diçka të tillë. Ne po punojmë shumë ngushtë me komunitetit ndërkombëtar për të ruajtur qëndrueshmërinë dhe për të zhvilluar një epokë të re në këtë rajon.
Për mua, Thaçi ka marrë një vendim të mirë, kur ka vendosur të hyjë në dialog me Serbinë. Siç ka thënë ai, dhe unë pajtohem me të, ne nuk humbim asgjë nëse marrim pjesë në dialog si një vend i pavarur. Sepse, dua ta theksoj, ne duhet të diskutojmë me vendet fqinje, përfshirë Serbinë, si vende të pavarura.
Ne duhet të diskutojmë për të ardhmen tonë, si të integrohemi, si të ndihmojmë procesin e anëtarësimit në BE. Për mosmarrëveshjet ndërmjet udhëheqësve të PDK-së, unë mendoj se njerëzit kanë të drejtë të shqetësohen për të ardhmen e këtij vendi. Ne të gjithë duam një shtet të qëndrueshëm në këtë proces drejt BE-së. Disa prej njerëzve mbase kanë frikë se ne mund të humbim diçka në dialog, por unë nuk besoj se ekziston ndonjë vendim apo se dikush po diskuton diçka në fshehtësi.
Unë do të thosha se gjithçka është transparente dhe do të vazhdojë të jetë. Andaj, në PDK, në situatën aktuale, unë nuk shoh ndonjë problem. Ne jemi të bashkuar lidhur me këto çështje. Natyrisht, ne ende duhet të mendojmë si të zhvillojmë vendin tonë, si të mbajmë partneritetin tonë me komunitetin ndërkombëtar, dhe si ta bëjmë Beogradin ta respektojë jetën tonë në Kosovë. Ne jemi një vend i pavarur. Ata duhet ta pranojnë këtë. Ata nuk mund të sillen sikur Kosova të mos ishte një shtet i pavarur.
Mladina: A po planifikoni ju të bëni një hap përpara? A e konsideroni veten si një kandidat të mundshëm në zgjedhjet e ardhshme partiake?
Veseli: Unë tashmë kam pasur përgjegjësi për ndërtimin e këtij vendi, si një prej themeluesve të Ushtrisë Çlirimtare të Kosovës. Për më tepër, për mbi një dekadë, pas luftës, unë i kam shërbyer vendit tim si shef i Shërbimit Inteligjent të Kosovës. Qëllimi im për të ardhmen është të angazhoj më shumë njerëz kreativë në parti.
Unë dua që partia të adoptojë një program modern ekonomiko-politik për të ardhmen. Unë besoj se kjo është përgjegjësi e partisë udhëheqëse. Njerëzit duhet të jenë më të ndjeshëm për çështjet ekonomiko-sociale, dhe duhet të kuptojnë jetën e përditshme të qytetarëve. Unë do të përpiqem të përfshij disa figura të reja me koncepte të reja, sepse vendit i duhet diçka e re.
Mladina: A do të thotë kjo se do të garoni në këto zgjedhje edhe nëse kundërshtari i juaj do të ishte Thaçi? A do të jeni kundërkandidat i tij, apo do të vazhdoni të veproni si këshilltar i tij, si partner i tij?
Veseli: Unë i kam përgjegjësitë e mia, por unë nuk kam qenë këshilltar i Thaçit. Ne e njohim njëri-tjetrin qe shumë kohë. Kemi thuajse të njëjtën të kaluar. E respektoj Thaçin, Jakup Krasniqin, i respektoj të gjithë njerëzit që janë munduar të bëjnë diçka për këtë vend. Sa për mua, do të inkuadrohem në këtë mjedis të ri. Nëse vizioni im do të marrë mbështetje, unë do të jem i përgatitur për të marrë përgjegjësi.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30