Vazhdon Prishtina

Vazhdon Prishtina





Flamurtarit nuk i ka mjaftuar fitorja 2:1 për ta eliminuar Prishtinën nga Kupa e Kosovës. Suad Saliagiç ua ka siguruar bardh e kaltërve një vend në gjysmëfinale, derisa garat në Kupën e Kosovës do t’i vazhdojnë edhe Besa, Hysi e Ulpiana.

Nga Express më 22.04.2009 në ora 20:30

Suad Saliagiç i ka siguruar Prishtinës një vend në gjysmëfinalen të Kupës së Kosovës. Flamurtarit nuk i ka mjaftuar fitorja prej 2:1 për t’i eliminuar bardh e kaltrit nga gara, pasi ndeshjen e parë e kishte humbur me rezultat 1:0.

Të përzgjedhurit e Jusuf Tortoshit e kanë filluar mirë takimin duke realizuar golin e epërsisë në minutën e 28-të, kur pas harkimit të Zejnullahut, mesfushori i Prishtinës, Behar Maliqi gabimisht ka qëlluar portën e tij.

Vetëm pas tre minutave kuqezinjtë arritën të shënojnë edhe golin e dytë nëpërmjet Faton Zejnullahut. Ky i fundit realizoi gol nga pika e bardhë, pasi portieri mysafir kishte shkaktuar një ndërhyrje të palejuar ndaj tij.

Mirëpo, vetëm pesë minuta më vonë shpresat e Flamurtarit për një kualifikim të mundshëm në gjysmëfinale i shoi sulmuesi Suad Saliagiç, i cili me kokë mposhti portierin vendas.

Skuadra e drejtuar nga Afrim Tovërlani në minutën e 56-të ka mbetur pa Besnik Krasniqin, i cili u ndëshkua me karton të kuq pas një ndërhyrjeje të palejuar. Edhe pse me një lojtar më shumë, Flamurtari nuk arriti ta gjejë rrugën deri te goli, i cili do t’i mundësonte kualifikimin në gjysmëfinale.

Ndërsa kryesuesit të Superligës në gjysmëfinale të Kupës së Kosovës i është bashkuar edhe Besa nga Peja, e cila arriti ta eliminojë nga kjo garë 2 Korrikun. Takimi i luajtur në Pejë ndërmjet dy ekipeve ka përfunduar baras 0:0, mirëpo pejanët punën më të madhe e patën kryer në ndeshjen e parë në Prishtinë kur fituan me rezultat 0:3.

Hysit i ka mjaftuar edhe barazimi 1:1 për ta eliminuar ekipin e vetëm nga liga e parë Fushë Kosova, pasi ndeshjen e parë në Merdare e kishte fituar me rezultat 4:3.

Edhe Ulpiana ka arritur të kualifikohet në gjysmëfinale të Kupës së Kosovës, pasi në çerekfinale ka arritur ta mposhtë dy herë skuadrën e Dritës nga Gjilani.

Rezultatet – Çerekfinalja

Flamurtari-Prishtina 2:1
F. Kosova- Hysi 1:1
Besa-2 Korriku 0:0
Ulpiana-Drita 3:2