"Presidente, merr leje nga Hasan Prishtina e Bajram Curri!"

nga **Agim Gashi** Fri Nov 16, 2012 10:55 pm

"Presidente, merr leje nga Hasan Prishtina e Bajram Curri!"

Deputeti i Partisë Socialiste në Shqipëri, Taulant Balla, i ka dërguar një letër të hapur Presidentes së Kosovës, Atifete Jahjaga, në të cilën ai kërkon që kjo e fundit, para se të arrijë në Tiranë për të nderuar ngritjen e mauzoleut të Ahmet Zogut, të bëjë edhe disa ndalesa, siç thotë ai, “për të marrë leje nga Hasan Prishtina, Bajram Curri apo Avni Rustemi”.
Balla në letër sqaron se Jahjagës i drejtohet si një qytetar i thjeshtë shqiptar, e jo si politikan e as si deputet.

Në vijim, mund ta lexoni të plotë letrën e Taulant Ballës drejtuar Presidentes së Kosovës, Atifete Jahjaga:

E nderuara Presidente e Republikës së Kosovës zonja Atifete Jahjaga,
Po të drejtohem ty, sepse për Presidentin e Shqipërisë, nuk dua të harxhoj as frymën dhe as mendimet.

Nesër, siç është njoftuar, Ju do të jeni në Tiranë për të nderuar ngritjen e mauzoleut të Ahmet Zogut dhe të zogollëve të tjerë.

Sigurisht kjo është zgjedhja Juaj personale. Por përpara se të bësh një gjë të tillë unë, si një qytetar i thjeshtë shqiptar, jo si politikan, as si deputet, unë sot dua të të sugjeroj që si një Presidente e një republike shqiptare, si një kryetare shteti, përpara se të përulesh para Ahmet Zogut, duhet t’i kërkosh leje Hasan Prishtinës, Bajram Currit, Avni Rustemit apo edhe priftit Gjon Gazulli.

Që të jem më i qartë, duhet të sqarosh pozicionin Tënd zonja Presidente e Republikës së Kosovës mbi jetën dhe veprën e Hasan Prishtinës, Bajram Currit, Avni Rustemit.

Meqenëse të gjithë shqiptarët i njohin të tre këta kalorës të shqiptarizmit, më lejoni t’ju informoj se i katërti prifti Gjon Gazulli është edhe ai një emër i nderuar, që vinte nga një familje patriote mirditore, por që zogistët e varën në litar.

Pak ditë më parë Universiteti i Prishtinës mori emrin e Hasan Prishtinës, duhet t’ju sqarosh studentëve dhe profesorëve të Prishtinës pozicionin tënd për Hasan Prishtinën përpara se të jesh nesër në Tiranë.

Në vend që të nderonit nesër maozoleun, mund të ndiznit një qiri në shpellën e Dragobisë për të nderuar trimin e maleve Bajram Curri. Përpara se të shkosh nesër te maozoleu, kalo te busti i Avni Rustemit, të cilin kosovarët e duan dhe e kanë respektuar për dekada me radhë.

Së fundmi e nderuar zonja Presidente, shpresoj ta mirëkuptoni këtë letër të hapur. Mos ngatërroni respektin ndaj homologut Tuaj të Shqipërisë, me respektin që duhet të keni për shqiptarët e vërtetë, thuhet në letrën e deputetit socialist Taulant Balla.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30