Thaçi uron LDK-në, platforma serbe s’pranohet nga BE, NATO e SHBA

nga **Agim Gashi** Sun Dec 23, 2012 8:54 pm

Thaçi uron LDK-në, platforma serbe s’pranohet nga BE, NATO e SHBA

Kreu i PDK-së dhe i Qeverisë, Hashim Thaçi të dielën në Kaçanik, ka ripërsëritur se platforma e fundit e Serbisë për Kosovën nuk do të zbatohet kurrë, ndërsa ka nënvizuar se qëndrimi i shtetit të Kosovës për këtë dokument mbështetet nga BE, NATO dhe SHBA. “Po ju them edhe juve sot se, siç kanë dështuar të gjitha elaboratet, planet, idetë dhe projektet e Serbisë në raport me shqiptarët dhe Kosovën, do të dështojë plotësisht, ende pa filluar, edhe ky projekt i Nikoliqit. Kurrë nuk do të realizohet në asnjë cep të territorit të Republikës së Kosovës. Ky është vendimi, ky është zotimi ynë, ky është qëndrimi i shtetit të Kosovës dhe ky qëndrim yni e ka mbështetjen e fuqishme të BE-së, të NATO-s dhe të SHBA-së”, ka thënë Thaçi në Kuvendin IV zgjedhor të Degës të PDK-së në Kaçanik.

Sipas tij, “është bërë zhurmë e panevojshme mediale lidhur me platformën e fundit të Serbisë për Kosovën”.

Ai ka folur edhe për “konsolidim dhe forcim të subjektivitetit ndërkombëtar të shtetit”. “Pardje ndodhi njohja nga një shtet jashtëzakonisht i fuqishëm me 157 milionë banorë, Pakistani. Do të kemi njohje edhe më të fuqishme. Pra, po e konsolidojmë dhe forcojmë subjektivitetin ndërkombëtar. Njohje të reja do të vijnë, nuk do të ndalen. Dhe e ardhmja euroatlantike e Kosovës do të jetë e sigurt. Kosova do të anëtarësohet edhe në NATO edhe në BE”, ka thënë Thaçi.

Hashim Thaçi nga Kaçaniku ia ka uruar LDK-së 23-vjetorin e themelimit, kurse duke folur për ndërtimin e autostradës Prishtinë-Shkup, ai ka thënë se ato do të nisin mot në pranverë, ndërsa kryeqendrës së Maqedonisë i është referuar si kryeqytet i Vilajetit të Kosovës. “Me padurim pres pranverën e hershme kur do të fillojë ndërtimi i projektit madhor, fillimi i ndërtimit të autostradës. Mjetet i kemi ndarë, pra nga Prishtina, Ferizaj, Kaçaniku, Hani i Elezit e deri në kryeqytetin e Vilajetit të Kosovës, në Shkup”.

Delegatët e kuvendit zgjedhor kanë votuar për 35 anëtarë të Këshillit drejtues të Degës dhe për 10 delegatë të Kongresit të PDK-së.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30