Ia prishin ditën PDK-së

Ia prishin ditën PDK-së




Derisa kryeministri Thaçi ka mbjellë një pemë dhe ka shëtitur nëpër parkun e ri të qytetit, një telefonatë anonime ka alarmuar policinë se për 20 minuta do të shpërthejnë dy marketet “Viva” në Ferizaj.

Nga Bardh Frangu më 25.04.2009 në ora 20:16

Kryeministri i Republikës së Kosovës, Hashim Thaçi, është pritur nga numër i madh i qytetarëve në sheshin e qytetit të Ferizajt. Ai pasi ka mbjellë një pemë në trotuarin afër ndërtesës së Kuvendit Komunal, bashkë me kryetarin e Komunës së Ferizajt, Bajrush Xhemailin, ka shëtitur nëpër parkun e ri të qytetit të Ferizajt, i cili është veshur me pemë të ndryshme.

Kryeministri Thaçi ka thënë se me këtë aksion të Qeverisë po e mbjellin Kosovën e re. Ai ka premtuar pyllëzimin e 30 hektarëve për komunën e Ferizajt, përkatësisht mbjelljen e 70 mijë fidanëve. Kryeministri Thaçi ka vizituar edhe tri tenda të vendosura në sheshin e qytetit për anëtarësimin në PDK.

Sipas njërit nga organizatorët e regjistrimit të anëtarëve të rinj, Ibrahim Lipovica, deri në orën 15 e 30 minuta, aktivistët e PDK-së kanë arritur të regjistrojnë deri rreth 300 anëtarë të rinj. Lipovica ka thënë për “Express” se mosha e të anëtarësuarve sillej nga 30 e më shumë vjet.

Megjithatë, këtë ditë të bukur të PDK-së në Ferizaj e ka prishur një telefonatë anonime. Vetëm dhjetë minuta para se të arrinte kryeministri Thaçi në qytetin e Ferizajt, një telefonatë anonime ka alarmuar policinë në Ferizaj, se kinse brenda 20 minutash do të shpërthejnë dy marketet “Viva”, të cilat i ndanë vetëm hekurudha.

Për këtë rast, komandanti i policisë në Ferizaj, Basri Shabani, ka njoftuar kryetarin e Komunës së Ferizajt, Bajrush Xhemailin dhe i ka thënë se kryeministri nuk mund të kthehet rrugës nga ka ardhur, por për këtë duhet ta shfrytëzojë rrugën “Rexhep Bislimi, përkatësisht rrugën e Gjilanit.

Komandanti i policisë në stacionin e Ferizajt, Basri Shabani ka thënë se telefonata në polici ka arritur në orën 13 e 20 minuta dhe se policia menjëherë ka reaguar, duke kërkuar largimin e konsumatorëve nga këto dy qendra tregtare dhe duke siguruar vendin përreth. Policisë i është bashkuar edhe Njësiti për deminim i KFOR-it dhe së bashku kanë nisur të bëjnë kontrollin së pari në qendrën e re të “Viva Freshit”.

Zyrtarë të kësaj qendre tregtare, e cila vetëm për pak muaj është sulmuar me mjete eksplozivi katër herë, kanë thënë se nuk kanë pasur problem me zbrazjen e dy qendrave nga konsumatorët, ndërsa e tëra është bërë pa panik të theksuar.

Derisa po raportojmë, është ora 16 e 30 minuta dhe kontrolli në objektin e ri të “Viva Freshit” po vazhdon, ndërsa ende qëndrojnë të bllokuara dy rrugët kryesore të qytetit të Ferizajt, ajo “Dëshmorët e Kombit” dhe “Ahmet Kaçiku”. Kjo edhe ka vështirësuar në masë të madhe edhe qarkullimin nëpër qytetin e Ferizajt.

Meqë telefonata anonime kishte lajmëruar eksplodimin e dy qendrave tregtare të “Viva Freshit” për 20 minuta, ndërsa kjo gjë nuk ka ndodhur as më shumë se pas dy orëve, edhe komandanti i policisë ka besuar se kjo mund të jetë një informatë e rrejshme. Megjithatë, kontrolli i dy objekteve të “Viva Freshit”, duket se do të marrë kohë më shumë.

Në objektin e ri të "Viva Freshit", rreth orës 17 e 15 minuta ka përfunduar kontrolli nga ana e policisë dhe KFOR-it dhe është dëshmuar se alarmi nëpërmjet një telefonate ishte i rrejshëm.