INTREVISTE E FATMIR SEJDIUT DHENE ID MAGAZIN:PO KTHEHEM

nga **Agim Gashi** Mon May 27, 2013 10:01 am

INTREVISTE E FATMIR SEJDIUT DHENE ID MAGAZIN:PO KTHEHEM

Një porosi për lidershipin e Lidhjes Demokratike të Kosovës nga ish kreu i saj: “Nuk kam dalë në pension politik”. Dy vjet e gjysmë pasi Gjykata Kushtetuese ia ndërpreu mandatin e Presidentit të vendit dhe Isa Mustafa ia mori pozitën e kreut të partisë, Fatmir Sejdiu, në një intervistë ekskluzive për IP Magazinë paralajmëron rikthimin.

“Njerëzit që kanë “ndihmuar” të ndodhin ato që kanë ndodhur edhe në Gjykatën Kushtetuese edhe më pas me zhvillimet në parti, kanë menduar se unë do të vetëkënaqem me një titull nderi që më kanë dhënë që nënkupton shkuarjen time në pension ose mbase mund të nevrikosem shumë dhe ta lëshoj LDK-në, siç kanë bërë disa që nuk e kanë pasur për shpirt LDK-në. Unë nuk e bëjë këtë”, thotë ai.

Sot Sejdiu është i pakënaqur me gjithçka që po ndodh me LDK-në. E më së shumti me atë që ai e quan moskonsistencë të lidershipit dhe zyrtarëve partiakë në çështje të cilat një partie nuk i lejohen gabimet në hapa. Fjalën e ka për pozicionet që LDK ka mbajtur dikur rreth dialogut me Serbinë dhe atë që mban tash. Por edhe për pozicionin që kjo parti ka pasur ndaj qeverisë së Kosovës dikur dhe tani. Një deklaratë që ka qarkulluar ditëve të fundit se kryetari i LDK-së, Isa Mustafa nuk përjashton një koalicion paszgjedhor me PDK-në, e ka nevrikosur edhe më shumë.

Në një dhomë pritjeje në shtëpinë e tij, muri dhe tavolinat e së cilës është përplot fotografi të kornizuara me stil gjatë takimeve të tij me liderët botërorë, përfshirë ish- Presidentin e SHBA-ve George W. Bush, Kryeministrin e Britanisë së madhe Gordon Brown... dhe Presidentin e ndjerë të Kosovës e liderin historik të LDK-së, Ibrahim Rugova, Sejdiu flet edhe për marrëveshjen ndërmjet Kosovës dhe Serbisë për normalizim të marrëdhënieve dhe për dyshimet e tij që kjo marrëveshje mund të ketë sukses.

IP Magazine: Zotëri President, bisedimet mes Kosovës dhe Serbisë kanë rezultuar me një marrëveshje. Qëllimi duket të jetë dhënia fund e e hasmërive mes këtyre dy vendeve. Si e shihni ju këtë marrëveshje?

Fatmir Sejdiu: Unë them se është një ndër proceset më të ndjeshme deri tash, natyrisht pas zhvillimeve të mëhershme që lidhen me përfundimin e statusit të Kosovës më 17 shkurt 2008, kur përfundoi një epokë e gjithë atyre përpjekjeve të shqiptarëve dhe e faktorit mbështetës ndërkombëtar për shtetëndërtimin e Kosovës. Nga ana tjetër, Serbia ka rifilluar ose thënë ndryshe ka vazhduar përpjekjet e saj bashkë me aleatët e saj për ta luftuar pavarësinë e Kosovës sidomos përmes strukturave të saj paralele në Kosovë. Ideja ime gjithmonë ka qenë se mund të bisedohet për shumë çështje që mund të jenë të dobishme për relaksimin e marrëdhënieve në mes të dyja shteteve dhe për një përfundim të raporteve të armiqësuara çfarë kanë qenë. Kjo ka qenë edhe pjesë e platformës së 120 ditëshit të bisedimeve me Serbinë, me atë idenë e traktatit për fqinjësi dhe miqësi mes dy shteteve sovrane, duke pasur parasysh që ndërtimi i raporteve të ardhshme të bëhet në bazë të parimeve të njohura ndërkombëtare, pra parimet e të qenit sovran të njërit dhe shtetit tjetër.

Natyrisht që ka komente të shumta rreth përmbajtjes së marrëveshjes, si dhe rreth përpjekjeve për të implementuar këtë marrëveshje. Meqë deri tani unë nuk kam parë dokumentin origjinal dhe nuk do ta interpretoja finalisht. Ajo që vërej është se Serbia po vazhdon të bëjë hilen e saj në mënyra të ndryshme për të bërë shantazhe mbi institucionet e Kosovës. Kam dëgjuar deklaratat e kryeministrit dhe presidentit serb nga ato që thonë se “çizmja e shqiptarit nuk do të shkel në veri” e deri te ato para takimit me me ministrin e jashtëm gjerman se “ne nuk mund të detyrohemi ta lëshojmë Kosovën”. Ndërsa në anën tjetër kemi përpjekjet e faktorit ndërkombëtar për të përmbyllur këtë cikël jo normaliteti që është në dëm të Kosovës dhe Serbisë. Do të presim se si kjo marrëveshje do të implementohet. Nga ajo që është prezantuar në publik shihet se ka disa gjëra jo të qëndrueshme në kuptimin e esencës së tyre sepse janë ambicie për të krijuar struktura paralele të reja, struktura të një etniteti të ri. Kështu Serbia po e shpreh ambicien e saj që të kapërcehet ajo që është përcaktuar me Kartën Evropiane të Vetëqeverisjes Lokale. Por edhe përtej saj për të krijuar një fizionomi të një institucioni që do të merret me çështje të mëdha që tani më janë. Mendoj që autoritetet e Kosovës duhet të këmbëngulin që marrëveshja të zbatohet në kornizat që do të jetë e dobishme për vendin. Një dokument ka shumë rëndësi se si interpretohet, pra duhet parë në çdo pikë dhe presje të tij. Pra duhet pasur kujdes që të mos ketë asocimin e një karote që në fillim duket e shijshme e pastaj të dalë e kundërta. Pra është tepër e rëndësishme që përfaqësuesit e Kosovës t’i përmbahen Kushtetutës së vendit.

IP Magazine: deri në këtë pikë, a mendoni se përfaqësuesit e Kosovës i janë përmbajtur Kushtetutës në ato çështje që janë biseduar dhe dakorduar?

Fatmir Sejdiu: Unë dëgjoj deklarata që thuhen asisoj, gjej edhe pjesë të interpretimeve të reja, por del edhe diçka tjetër. Unë dua që ky dokument të jetë në përmbajtje e, edhe t’i përmbahet atyre deklarimeve që janë thënë në fillim.

IP Magazine:Në fillim është thënë që nuk do të bisedohet me Serbinë për çështje të brendshme dhe pastaj pozicionet kanë lëvizur me kalimin kohës?

Fatmir Sejdiu: Ky ka qenë qëndrim i imi në fillim kur kam qenë në krye të vendit dhe më vonë është prezantuar i njëjti në fazat e mëtutjeshme, por se si kjo ka rrjedhur më tej nuk kisha dashur aktualisht të komentoj. Por mund të them se ka gjëra shumë shumë të ndjeshme.

IP Magazine: Cilat janë ato më të ndjeshmet?

Fatmir Sejdiu: Më e ndjeshmja është ajo tendenca e interpretimit të fuqisë politike dhe të marrjes së vendimeve mbi këto interpretime të këtij dokumenti që ka të bëjë me mekanizmin e asosacionit të komunave. Kjo për mendimin tim nuk ka qenë e nevojshme sepse “Pakoja e Ahtisarit” është shumë e qartë rreth kësaj. Pra ajo nuk ka lënë hapësirë për interpretime dhe tendenca të tjera përtej saj.

IP Magazine: Aktualisht po bisedohet për mekanizmat e implementimit të marrëveshjes. Madje po del që marrëveshja për implementim është më e vështirë se ajo bazë…

Fatmir Sejdiu: Duhet të them se në proceset që i kemi para vetës nuk do të jetë aspak lehtë. Në këto zhvillime e sipër do të ketë një ambicie që të kapërcehet në një stad tjetër të realizimit që projektit që kanë serbët. Në këto projekte janë shtuar edhe teza që janë quajtur shumë të rrezikshme e që kanë të bëjnë me ndarjen e Kosovës. Serbia luan me një fakt dhe këtë e gjen edhe në mbështetës të saj të shumtë. Ajo cështjet e veriut të Kosovës dëshiron ta trajtoj si një akt i kryer e “të pjekur për ndarje”sepse realisht deri kohët e fundit ka pamundësuar punën e institucioneve të vendit dhe si e tillë, natyrisht se ka abicie për ndonjë zgjidhje të re. Edhe kjo zhagitje mendoj se është një blerje kohe për të mbajtur status quo – në në veri. E mbase dikush po luan në një maratonë që mund të jetë e kushtueshme.

IP Magazine: Përveç krijimit të asociacionit të komunave, marrëveshja parasheh edhe krijimin e një Gjykate Apeli në veri. Kjo temë ishte hapur edhe në kohën kur ish ministrja e Drejtësisë, tani e ndjerë, Nekibe Kelmendi udhëhiqte Ministrinë e Drejtësisë, por ajo thuhet t’u ketë rezistuar këtyre përpjekjeve?

Fatmir Sejdiu: Zonja Kelmendi ka qenë udhëheqëse e sektorit, por diskutimet dhe vendimet janë bërë në bashkëpunim me mua. Ne kemi dhënë komentin më të mirë dhe më të nevojshëm që është dashur të jepet në atë kohë. Nuk e përkrahi asnjëherë idenë që qasja dhe formimi i institucioneve të bëhet për etni të caktuara. Me këtë qasje ne krijojmë një etnitet paralel. Në të njëjtën kohë do të investohet në krijimin mosbesimit në institucionet e vendit dhe pokështu humbjen e besimit ndërmjet komuniteteve, duke e goditur kështu edhe përpjekjet për për pajtimin ndërqytetar. Në këtë aspekt, përkundër faktit se kanë qenë viktimë, shqiptarët kanë dhënë një kontribut të fuqishëm që të tejkalohet e shkuara e ndasive. Jo duke ngjallë përçarje por duke insistuar që të dënohen krimet e luftës dhe të gjithë ata që i kanë kryer. Me këtë rast ekziston frika që ky institucion gjyqësor të mund të bëjë shkëputje të tërësishme nga sistemi unik.

IP Magazine: A e minon kjo sistemin unik gjyqësor?

Fatmir Sejdiu: Unë mendoj që kjo nuk i kontribuon aspak sistemit unik dhe zhvillimit të tij. Dikush mund ta kuptojë ose interpretojë si hap të parë për qetësimin e situatës, por kjo nuk i kontribuon. Përkundrazi. Një panel i gjykatësve serbë që vendosin për një vepër penale të një serbi apo e kundërta për shqiptarët nuk i sjell asnjë dobi sistemit unik e të shëndetshëm cfarë e kemi ambicien ta ndërtojmë.. Gjyqësori nuk bën të jetë i favorizuar etnikisht sepse fatura do të jetë e pakëndshme.

IP Magazine: Si e shihni rolin komunitetit ndërkombëtar posaçërisht BE-së dhe SHBA-së në implementimin e kësaj marrëveshje?

Fatmir Sejdiu: Unë dua të besoj në përkushtimin dhe sinqeritetin e tyre që marrëveshja të jetë e kompletuar në aspektin final. Nëse nuk ndodhë kjo, kam drojë që gjërat do të përkeqësohen. Dhe do të jetë një ‘kthim shpine’, një investimi kaq të madh çfarë ka ndodhur në Kosovë. Unë e kam thënë edhe më herët se ka pasur një zotim që të zbatohet Pakoja e Ahtisarit. Por se a ka pasur faktorë neglizhentë në proceset e përgjegjësive që ata kanë pasur unë them gjithsesi se po.

IP Magazine: A e fiton Kosova sovranitetin e munguar qe 14 vite me anë të kësaj marrëveshje?

Fatmir Sejdiu: Sovraniteti i Kosovës është deklaruar më 17 shkurt 2008. Çështja është se sa ai është realizuar me funksionim të papengesë të institucioneve të saj në gjithë tëeritorin esaj. Deri tani, ende nuk ka përgjigje të plotë. Duhet të shohim në vazhdim. Do të duhet të shohim me sytë e Kosovës gjithë këtë proces. Shpresoj që kjo t’i shërbejë avancimit të pozicionit të Kosovës, integrimit të saj dhe zhvillimit në përgjithësi të vendit. Pra i mbetet faktorit ndërkombëtar para së gjithash të përfshirë në këtë proces të jetë i përkushtuar dhe korrekt në zotimet e tij.

IP Magazine: Në cilësinë e ish kryetarit dhe kryetarit të nderit të Lidhjes Demokratike të Kosovës si e shihni rolin që ka pasur partia juaj në këtë proces? Ka pasur shumë oscilime nga ky subjekt deri më tani?

Fatmir Sejdiu: Sa i përket këtyre cështjeve , them se LDK -ja ka pasur një qasje joserioze në vazhdimnësi . Absolutisht po. Nuk ka qenë një reflektim serioz i një partie të traditës që të ketë qëndrime kaq të luhatshme dhe jostabile.

IP Magazine:Për shembull?

Fatmir Sejdiu: Ajo që është parë deri më tani tregon se nuk ka pasur një vijë normale dhe logjike të komunikimit me opinionin dhe institucionet e vendit dhe nuk ka qenë një vazhdimësi normale edhe në komunikimin me faktorin ndërkombëtar. Unë nuk them se si është dashur të shprehen dhe si të pozicionohen por them se është dashur të jetë një qëndrim më i pjekur. Në këtë proces të rëndësishëm për vendin nuk ka qenë thjeshtë një temë për pasqyrimin një partie politike (që edhe ashtu ka dal keq), por ka qenë një temë për fatin e mëtejmë të vendit. Kam qenë i befasuar kur kam dëgjuar një përfaqësues të LDK-së duke thënë se “ne e kemi zgjidhjen për veriun por nuk do ta themi derisa të vijmë në pushtet dhe do ta tregojmë atëherë”. Kjo është diçka tepër fëminore, tepër e kundërt me ato që kanë ndodhur dhe me kontributin që i takon secilit subjekt politik të japë. Secili subjekt politik serioz edhe LDK që unë i përkas në kuptimin proviniencës politike është dëm të ketë kësi lloj performimi.

IP Magazine:Pse mendoni se ka pasur këso lloj moskonsitence të qëndrimeve? Nuk është studiuar procesi si duhet?

Fatmir Sejdiu: Kjo mund të quhet më tepër si pjesë e përpjekjeve për të prezantuar në faza të caktuar një opinion tjetër “atraktiv” dhe në fazën tjetër për të ardhur tek një zgjedhje që është krejt e kundërt me zotimet e mëhershme. Nuk është trajtuar me seriozitet procesi si i tillë dhe nuk janë mbajtur në nivelin e duhur komunikimet edhe brenda vetë strukturës. Kjo sepse nuk është e gjitha çështje e dy-tre vetave në një parti. Nga viti i kaluar e deri para pak ditëve Këshilli i Përgjithshëm i LDK-së nuk është thirrur. Sigurisht që çështja e marrëveshjes dhe bisedimeve ka qenë tema më e rëndësishme për t’u diskutuar në Këshillin e Përgjithshëm, jo vetëm në kryesinë e partisë, apo sic kemi parë qëndrimet e partisë të dalin nga gojë e ndonjërit prej zyrtarëve ashtu sic kanë dalë të papjekura fare. Unë mendoj se vendimmarrja për tema të mëdha duhet të burojë nga forumet më të rëndësishme të LDK-së, sepse ato formësojnë politikat dhe orientimet themelore të veprimit. Ekzekutivi i partisë është përgjegjësi i zbatimit të tyre. Kjo para së gjithash duhet të ketë në mendje përgjegjësinë që ka një subjekt politik pavarësisht që është në opozitë sidomos ndaj elektoratit të saj.

IP Magazine: Si e shini LDK-në para sfidës së zgjedhjeve lokale , konkurrencës që po ashpërsohet gjithnjë e më tepër në Kosovë?

Fatmir Sejdiu: Unë do të doja që LDK të dalë partia e parë dhe mendoj që duhet punuar që të dalë partia e parë. Por, sigurisht duhen përgatitje të mëdha dhe intensive si dhe një projekt i cili shpalosë atë vizion politik që ka për qytetarët. Një projekt që ofron një qeverisje të mirë për vendin në shtigje afatshkurtra dhe afatgjata. Është tepër e rëndësishme që të mblidhen dhe të mos lihen anash gjithë kapacitet e saj. Unë mendoj që LDK mund të arrijë rezultate më të mira nëse ofron një platformë të duhur për qytetarët e Kosovës. Nuk i lejohet një plasim çfarë po bën nganjëherë të aktiviteteve të caktuara partiake apo parashikime në ethet zgjedhore se ndoshta do të hymë me këtë apo atë subjekt në koalicion siç ka ndodhur para disa ditësh në një deklarim. Kjo nuk ka koment. Njerëzit mund të pyesin me të drejtë çfarë është kjo metamorfozë kaq e shpejt që një subjekt politik, cfarë është LDK dujke shprehur inferioritetin e saj,të ketë prirje për koalicion me një subjekt tjetër ndaj të cilit ka plasuar akuza kaq të forta (ditën) dhe bie fjala, kaq shpejt të harrohet ideja e formimit të “bllokut politik të djathtë”

Është e ditur se në situata të caktuara mund të planifikohen koalicione, por kjo vjen në rastet kur ka afri programesh e jo kur ka synime për të realizuar projekte e interesa të ndonjë grupacioni të caktuar .

Karshi kësaj, mendoj që LDK me strukturën, elektoratin dhe gjithë mbështetësit e simpatizantët e që i ka dhe realisht derui tani janë të heshtur, ka mundësinë që t’i fitoj zgjedhjet. Asaj i duhet një çelës që ia hap derën proceseve mobilizuese.

IP Magazine: Ju po i referoheni deklaratës së z. Mustafa se është i gatshëm të hyjë në koalicion me PDK-në. Nëse kthehemi në retrospektivë projekti i tij për të ardhur në krye të LDK-së ka qenë pikërisht ky kritika ndaj jush pse keni bërë koalicion me PDK-në?

Fatmir Sejdiu: Pikërisht këtë e thash. Ishte kritika më e madhe pse është bërë një koalicion i cili ka ndodhur në një rrethanë krejt tjetër dhe më specifikja për vendin. Pastaj deklarimet e ashpra dhe këmbëngulëse të tipit “kurrë dhe asnjëherë koalicion me PDK”. Dhe tash vijnë deklarime të tilla. Çka është kjo metamorfozë. Sa dij unë, PDK ka të njëjtit njerëz dhe të njejtën strukturë. Esencialisht të njëjtin e ka edhe projektin politik. Mbase , karshi akuzave të mëdha “ njerëzit e partnerit të mundshmëm janë shëndrruar në engjëj”. Unë mendoj se ka nevojë për shpjegime të tjera që koha do t’i japë.

Karshi kësaj pyes: pse LDK nuk i përmbahet përpjekjeve dhe deklarimeve të saj që të shkurtohet mandati i qeverisjes së PDK në bazë të marrëveshjes së prillit 2011 por po e lë në heshtje si temë?

IP Magazine: A ka fuqi politike LDK tek partnerët e tjerë z. Thaçi dhe Pacolli që marrëveshja të respektohet?

Fatmir Sejdiu: Duhet të them se LDK ka fuqinë politike. Tash dy vjet është thënë ne i shkurtuam mandatin një qeverie të korruptuar. Janë dhënë argumente për këtë . Bie fjala Qeveria e PDK –së ka dalë prej zgjedhjeve të manipuluara e janë bërë veprime që shikohen me sy kritik. Dhe çfarë tash? Kjo është pjesë e zotimit të LDK-së para elektoratit të vetë. Sidomos sa i përket dy proceseve të mëdha procesit të reformimeve kushtetuese dhe zgjedhore.

IP Magazine: Por është fakt se zvarritja e këtyre dy reformave po zvarritet dhe rezultat nuk ka. Pse po ndodhin këto zvarritje?

Fatmir Sejdiu: Unë e shoh pjesë të matematikave të përbashkëta politike. Jo vetëm të dy subjekteve por në këtë pazar janë dy subjektet kryesore. Pse nuk ndodhë reforma kushtetuese kjo është e qartë se ndodhë për shkak të pazareve të caktuara politike. Pra ka pasur një zotim për reformë zgjedhore dhe kushtetuese dhe nuk duan ta bëjnë.

IP Magazine: Së fundi, zoti Nexhat Daci ka lidhur koalicion me AAK-në, ndërkohë që ai pasur bisedime edhe me z. Isa Mustafa rreth mundësisë së ribashkimit të LDK-së dhe LDD-së . Marrë parasysh se shumë degë të LDD po kthehen në LDK, a mund të ketë një rikthim të asaj që mund të quhet “kohë e artë” e LDK-së?

Fatmir Sejdiu: Nuk kisha dashur të komentoj veprimet e Dacit dhe Mustafës. Kisha dashur të them diçka tjetër se duhet të jepen shpjegime më të thella dhe më të sakta për atë çfarë ka ndodhur në LDK në vitin 2006. Kush e ka ndarë LDK dhe pse e ka ndarë. Interesi dhe investimi i kujt ka qenë që të ndahen. Pazare të kujt përtej LDK-së kanë qenë ato që kanë ndodhur. E them me përgjegjësinë më të madhe që Fatmir Sejdiu nuk ka qenë ai.

IP Magazine: Atëherë paska qenë Nexha Daci?

Fatmir Sejdiu: Absolutisht. Ka ndodhur një shpartallim goxha i madh i partisë që e kanë dëmtuar shumë. Sa kam qenë unë edhe pse nuk kam pasur mundësi të merrem me partinë megjithatë ka filluar të kthehet elektorati. Megjithatë do të dalin se kush ka investuar aq shumë për të ndodhur ajo që ka ndodhur në LDK. Të gjitha këto elektorati i ka të qarta. Unë kam fakte më shumë dhe do të vjen koha që t’i them ato.

IP Magazine: Pse nuk është kjo kohë tani?

Fatmir Sejdiu: Unë them se do të vjen momenti kur do të dalin gjëra edhe më shumë. E them se bëhet fjalë për pazare politike që kanë vazhduar edhe në periudhat e mëvonshme e që kanë qenë të lidhura me ngjarjet e mëhershme si ajo në 2006. Kjo nuk është lojë konspiracionesh, por qytetarët e Kosovës do t’i mësojnë ato shumë shpejt.

IP Magazine: Çfarë ishin përpjekjet për riformim të disa degëve të LDK-së? Ka pasur tensione brenda partisë si rasti në degën e Gjakovës…

Fatmir Sejdiu: Ishin disa përpjekje antistatutare të disa njerëzve që nuk kanë lidhje me LDK që të heshtet një gjeneratë. Kjo është bërë për shkak të oponencës politike. Një parti që nuk ka oponencë politike brenda nuk ka rezultat. Përjashtimi për shembull i gjeneratës 26-30 vjeç nga forumi i rinisë. Shihni partitë e djathta shumica e tyre kanë anëtarësi deri në 30 vjeç. Nuk bën të përjashtohen njerëzit vetëm pse janë oponentë. Nuk mund të instruktohet dikush për të qenë kujdestar në goditje të oponentëve.

IP Magazine: Ka pasur kabllograme të Ëikileaks që kanë shkruar se ju jeni viktimë e komploteve politike?

Fatmir Sejdiu: Unë nuk dua të shtoj më shumë se ajo që është shkruar në Ëikileaks dhe mendoj që është burimore. Është e argumentuar mirë dhe është e njerëzve që i kanë njohur rrethanat. Unë as atëherë e as tani nuk heqë dorë nga qëndrimet që kam shprehur. Në ato momente kanë qenë dhëmbët e mprehur edhe të 3-4 vetave që kanë dashur të bëhen President.

IP Magazine: Kush kanë qenë këta njerëz?

Fatmir Sejdiu: Nuk do t’i them sepse besoj se secili e zbulon vetveten. Në ato momente është bërë diçka jo vetëm për të cenuar integritetin personal timin por edhe të një procesi në stadin që kemi qenë, flas të LDK-së, posaçërisht në periudhën kur kam dhënë dorëheqje. Ka pas një garniturë në shërbim. Kushtetutën nuk e ka shkelë Fatmir Sejdiu, Kushtetutën e kanë shkelë të tjerë dhe po e shkelin edhe sot. Ka qenë një fushatë e egër e organizuar dhe e orkestruar . Unë nuk hidhërohem në elektoratin, megjithëse LDK pas asaj që ka ndodhur asnjëherë nuk ka dalë të shpreh mospajtimin me atë që ka ndodhur me liderin e saj. Përkundrazi, njerëzit e saj kanë filluar të ndërtojnë karrierë e të zënë hapsirëveprimi brenda saj, duke vazhduar “gozhdimin tim në kryq” e ka ka pasur asi tipash që kanë dalë të thonë se Fatmir Sejdiu nuk mund të kandidojë në zgjedhje për president vendi sepse “është shkelës i Kushtetutës”.

Ata që janë përcaktuar në Gjykatën Kushtetuese për një mendim të tillë, le të përplasen me ndërgjegjen e tyre.E dijë se disa prej tyre tani më është e vetëdijshme për “argatin” që e kanë bërë dhe në llogari të kujt! Ka qenë i fuqishëm mendimi kundërshtues i dy gjyqtarëve evropianë (dikur anëtarë të Gjykatës Evropiane për të drejtat e njeriut} të cilëtë kanë dhënë mendime të kundërta..

IP Magazine:Ka mëlmesa politike në aktvendimin e Gjykatës?

Fatmir Sejdiu: Unë mendoj se ka qenë gjithçka e përgatitur bashkë.

IP Magazine: A është indikativ fakti që ju nuk keni qenë në Kosovë kur është marrë vendimi?

Fatmir Sejdiu : Ajo është pjesa finale.

IP Magazine: Z. Sejdiu, nuk janë të rralla rastet kur presidentët pas largimit nga detyra formojnë parti politike. Nëse konsideroni se në LDK nuk po ecin gjërat si duhet, a është ky edhe një opsion tjetër që do ta shqyrtoni?

Fatmir Sejdiu: Unë e kam thënë disa herë se LDK është shtëpia ime. Unë mendoj që njerëzit që kanë “ndihmuar” të ndodhin ato që kanë ndodhur edhe në Gjykatën Kushtetuese edhe më pas me zhvillimet në parti kanë menduar se unë do të vetëkënaqem me një titull nderi që më kanë dhënë që nënkupton shkuarjen time në pension ose mbase mund të nevrikosem shumë dhe ta lëshoj LDK-në siç kanë bërë disa që nuk e kanë pasur për shpirt LDK-në Unë nuk e bëjë këtë. Për arsye se unë besoj në filozofinë e saj, besoj në anëtarësinë e LDK-së. Jam me te nga ditë e themelimit.

Pas vendimit tim për dorëheqje nga posti i presidentit të vendit, shumë nga ata që “janë përlotur “ e “zverdhur” në kabinetin tim kanë përgatitur linçimin tim politik në mënyren se si e kanë bërë. Besoj se ju kujtohen demonstrimet e “anëtarësisë” (argatisë klienteliste) para selisë së LDK-së. Ato ngjarje kanë ideatorë ,organizatorë dhe mbështetës , brenda dhe jashtë LDK-së. Fatmirësisht, anëtarësia e gjërë e LDK-së ,sot mendon ndryshe.

IP Magazinë: Nëse jo parti të re, atëherë do të ketë një rikthim tuajin në LDK, në kuptimin e garës për kryetar të partisë?

Unë kam respektuar gjithmonë proceset demokratike, bile edhe atëherë kur demokracia është lënduar shumë. Për mua është e rëndësishme se kam kontakte të rregullta e shumë përmbajtësore me mijëra anëtarë e simpatizantë të saj, në të gjithë pjesët e Kosovës dhe jasht saj.

Nëse anëtarësia e LDK-së mëndon se jam i nevojshëm në rol të rëndësishëm në stazat e mëtejme të zhvillimit dhe aktivitetit të saj, unë jam këtu. Nuk e kam lëshuar Kosovën./IP magazine

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30