Vullnet Mato:KËSHILLAT E SHIUT

nga **Agim Gashi** Thu Jun 20, 2013 12:05 pm

Vullnet Mato:KËSHILLAT E SHIUT

Ne, barku qiellor
na lind pas rrufeve,
por ndryshojmë
krejt si bij të reve.
Jemi dhe në pamje
ndryshe tërësisht,
ti, kokërr akulli,
unë pikë me bisht.

Qielli na nis njësoj,
t’i shpiem dheut ujë.
Por unë urtë e butë,
ti me zhurmë e bujë.
Unë pupël nga lart,
ti gur nga përpjetë,
Unë vadit tokën,
ti e qëllon, e vret,

Unë bleroj arat,
rrit grurin e bukës,
ti e shtrin përdhe,
mes baltës e llucës.
Unë mbush guvat,
të burojë uji jetë,
ti e pështyn përrenjve,
ta shpien në det.

Dëgjo këto këshilla,
o breshër i marrë:
mos vra lulet në prill
kur pikojnë nektar,
mos godit pemët
kur lidhin kokrra,
të mos urrehesh
nga njerëzit dhe toka!...

* * *

O njerëz që më lakoni
në vetat zgjedhore
dhe dëgjoni breshrin
në kohët e tij foljore,
shikoni të vërtetën
drejt në sy me realitet:
se unë kulloj për ju,
ai për unin e vet.

Unë shiu flas shtruar,
dhe i vërtetoj fjalët,
breshëri nxitohet,
të besoni përrallën.
Unë jam gjuhëgjelbër,
fjalët i kam provuar,
breshëri hedh kokrra
premtimesh pa peshuar.

Unë pohoj përherë
mirësi në këtë botë
breshëri i mohon
të gjitha fare kot.
Ai kërkon të ketë
zotërimin në qiell
dhe i gënjen të tërë
në mesditën me diell

Bëmat e mia i sheh,
kushdo që ka sy,
breshëri u di qorra,
dhe ngre pluhur e hi.
Por ju keni vuajtur
nga thatësira e tij,
sa herë i bie daulles,
kot mbi çdo çati...

Nga unë ka ca të lagur
pa privaten çadër,
po do thahen patjetër,
në të ardhmes vatër...
Besoni fjalët e shiut,
të mos korrni breshër,
se do pendoheni keq
nesër dhe pasnesër!...

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30