Eqrem Kryeziu e Naser Rugova- të pakënaqurit e LDK-së…

nga **Agim Gashi** Wed Sep 10, 2014 10:38 pm

Eqrem Kryeziu e Naser Rugova- të pakënaqurit e LDK-së…

Ish kryetari i Prizrenit, e zyrtari i lartë i LDK-së, Eqrem Kryeziu ka akuzuar kreun e LDK-së Isa Mustafa se po e shet partinë. Ndërsa Naser Rugova, ka thënë se LDK-së më shumë se kurrë po i duhet urtësia dhe udhëheqja e Ibrahim Rugovës.
Të dy janë shprehur në Facebook.
“Shkqëlqësia e saj ambasadorja e USA, Jacobson, shprehu publikisht shqetësimin se liderët e forcave tona politike kanë hallin e partive të veta. Kam një korrigjim të vogël këtu: Sa i përket Isa Mustafës kjo nuk është e vërtetë, sepse ai po e shet Lidhjen Demokratike të Kosovës”, ka shkruar Kryeziu.
Ndërsa Rugova është marrë me tjetër gjë. Ai ka thënë se shumë miq dhe përkrahës të tij e kanë pyetur për qëndrimin e tij në lidhje me zhvillimet e fundit rreth formimit të institucioneve dhe koalicionit, fillimisht me AAK dhe Nismën dhe tani edhe më Vetëvendosjen.
“Si institucionalist dhe anëtar i strukturave të LDK-së, qëndrimi im publik nuk mund të jetë ndryshe pos atij të formuluar nga ana e organeve të partisë, sepse përderisa e kanë legjitimitetin e udhëheqjes duhet që, pavarësisht vërejtjeve personale, të angazhohemi në jetësimin e qëllimeve zyrtarë të partisë”, ka shkruar Rugova, teksa ka shtuar se si njeri dhe si intelektual duhet t’i thotë dy gjëra.
“Sot, më shumë së kurrë, në skenën politike të Kosovës, por edhe në forumet partiake të LDK-së, ndihet mungesa e një lideri gjithëpërfshirës, të urtë dhe vizionar siç ishte Presidenti ynë Dr. Ibrahim Rugova. Nën udhëheqjen e një lideri të tillë, LDK asnjëherë nuk do të binte në pozitën që të mos dilte e para në zgjedhje dhe LDK asnjëherë nuk do të lejonte që vendi të futet në situata potencialisht konfliktuoze. Nuk duhet të harrojmë qëndrimin përtej vetvetes të Presidentit në Rambuje, qëndrimin e Presidentit menjëherë pas luftës si dhe zemërgjerësinë dhe urtësinë e tij që t’i tejkalonte sfidat, gjithnjë duke u kujdesur që të ruhet uniteti, qetësia dhe të mos dëmtohet bërthama e popullit tonë. Sot them me plot gojë – President, na mungon më shumë se kurrë”, ka thënë Rugova.
Rugova ka thënë se ka shumë arsye të jetë skeptik ndaj qëllimeve finale të Lëvizjes Vetëvendosje, e cila, siç ka thënë ai, edhe më tutje vazhdon ta mohoj të gjithë trashëgiminë politike të Presidentit Rugova.
“Të gjithë kolegët ne LDK, duhet t’i përkujtojë për sloganin themeltar të LDK-së: Kosova e integruar në BE dhe NATO si dhe në miqësi të përhershme me SHBA-të. Ky qëndrim është vlerë e LDK-së dhe nuk duhet të cenohet në asnjë mënyrë, pavarësisht sfidës apo tundimit. Raportet me miqtë tanë ndërkombëtarë i kemi trashëgimi të traditës sonë politike dhe emblemë të shpirtit shtetformues të LDK-së. Nëse nuk e ruajmë këtë atëherë jemi LDK vetëm në emër, por jo edhe në vepër”, ka thënë Rugova.
http://gazetablic.com/eqrem-kryeziu-e-naser-rugova-te-pakenaqurit-e-ldk-se/

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30