PAPASTERTIA NË ATDHEUN TONË

nga **Agim Gashi** Sun Oct 12, 2014 3:33 pm

PAPASTERTIA NË ATDHEUN TONË

PAPASTERTIA NË ATDHEUN TONË 24_G_sig-Bashkejetojne_me_mbeturinat

PERIFERI E PRISHTINËS

Shteti akuzohet nga qytetarët se nuk po bën asgjë për të ruajtur ambientin, kurse qytetarët akuzohen nga të gjithë përfaqësuesit institucionalë, opozitë, shoqëri civile se nuk po vetëdijesohen për ruajtjen e ambientit. E mbeturinat në Kosovë sfidojnë qytetarët dhe shtetin. Nëpër rrugë, trotuare, lumenj, shkolla, spitale... mbeturinat janë bërë përditshmëri.

Jo vetëm në Prishtinë, si kryeqendër e mbipopulluar pas luftës, por dhe në qytete tjera, për të shijuar një kafe edhe në restorantin më luksoz shoqërohesh nga mbeturinat që janë në afërsi të tij. Mbeturinat rrinë dhe jashtë kontejnerëve. Një pjesë e qytetarëve nuk ndëshkohen se i hedhin ato nga ballkonet, apo para objekteve të banimit, i hedhin nga veturat, jashtë oborreve të tyre.

Edhe kontejnerët në shumicën e rasteve janë të pamjaftueshëm për banorët e një lagjeje, megjithëkëtë qytetarët para se të bëjnë një kërkesë për shtim të kontejnerëve zgjedhin t’i hedhin ato jashtë tyre. Përderisa opozita bën thirrje që të ruhet toka nga degradimi dhe akuzon për mungesë plani dhe vizioni, qytetarët po ashtu nuk ndihen fajtorë ngase shteti nuk ka arritur të sensibilizojë dhe të marrë masa për të ndëshkuar ata që mbeturinat i hedhin aty ku u vjen më lehtë.

Pensionisti, Fahri Arifi, i cili për vete thotë se i kushton rëndësi ruajtjes së ambientit, përmend se mbeturinat kanë dalë në shesh sidomos pas luftës. Ai kritikon të rinjtë që më pak i kushtojnë vëmendje pastërtisë publike dhe u mungon edukimi për ruajtje të ambientit.

Hedhjen e mbeturinave e sheh si vepër të ndëshkueshme, por që nuk ndëshkohet nga askush. iniciativa qytetare “Ta pastrojmë Kosovën” do të realizohet nesër në të gjitha komunat e vendit për pastrimin e tokës, përkrahur dhe nga Agjencia për Mbrojtjen e Mjedisit.

Përfaqësuesi i këtij projekti, Luan Hasanaj, ka thënë për “Zërin” se një iniciativë e tillë është parë më se e nevojshme për t’u ndërmarrë duke u bazuar në gjendjen jo të mirë të pastërtisë publike. Në kuadër të këtij projekti, të enjten, në gjithë Kosovën do të fillojë pastrimi nga qytetarët i vendeve që frekuentojnë. Ai parasheh të marrin pjesë rreth 100 mijë qytetarë në të gjitha komunat e vendit. Hasanaj thekson se kjo ditë për pastrimin e tokës do të bëhet tradicionale, por edhe praktike që çdo datë 24, për çdo muaj, të bëhet pastrimi i ambientit të jashtëm. Në mbështetje të këtij aksioni është deklaruar edhe Aleanca për Ardhmërinë e Kosovës, duke konfirmuar se do të jetë prezent me elektoratin e saj.

Donika Kadaj-Bujupi nga kjo parti ka theksuar se një ambient i pastër është parakusht i një jete të shëndoshë për njerëzit dhe tregues i vetëdijes qytetare të tyre.

“Përderisa Qeveria dhe Kuvendi i Kosovës obligohen që përmes strategjive, respektivisht ligjeve, të bëjnë mbrojtjen, ripërtëritjen e resurseve natyrore, është përgjegjësi individuale e secilit qytetar të Kosovës që të angazhohet në ruajtjen dhe pastrimin e mjedisit”, ka thënë ajo, duke kritikuar institucionet për mosangazhim të zbatueshmërisë ligjore për mbrojtjen e ambientit.

Edhe Lëvizja “Vetëvendosje” ka dalë në përkrahje për ditën e aktivizimit “Ta pastrojmë Kosovën”. Kjo lëvizje u ka bërë thirrje qytetarëve të Kosovës që t’i bashkohen këtij aksioni, kuvendeve komunale të Kosovës dhe institucioneve përgjegjëse qeveritare që të sigurohen që kjo ditë e aktivizimit të bëhet pjesë e një strategjie të qëndrueshme për pastrimin e Kosovës.

Gjendjen e papastërtisë publike në Kosovë, e ka quajtur alarmante dhe Partia e të Gjelbërve. Kryetari i kësaj partie, Daut Maloku, ka thënë për gazetën se niveli i papastërtisë publike është shumë i lartë në Kosovë. Ai ka fajësuar për këtë qytetarët, që, sipas tij, kanë një peshë të fajit, por më shumë institucionet dhe shërbimet përkatëse nëpër komuna të cilat kanë për obligim pastrimin dhe mbrojtjen e ambientit, por nuk po e kryejnë punën e tyre.
PAPASTERTIA NË ATDHEUN TONË 18plehra122_(1)