Kush e nxjerr nga agjenda Kosovën?

Kush e nxjerr nga agjenda Kosovën?



Çështja e Kosovës nuk është internacionalizuar, siç thonë edhe shumë kosovarë (etnikë) në kohën (para 20 vjetëve) të “konferencave të së premtes” që jepte Presidenti Rugova, madje më shumë nga karizma e tij prej Kryetari të Shoqatës së Kosovës, sesa nga Lidhja Demokratike e Kosovës, të cilën e afirmoi si parti pikërisht karizma e shkrimtarëve tashmë të eskivuar nga aparatçiknia. Internacionalizimi i problemeve të Kosovës, pas LDK-së së Rugovës, u arrit edhe me daljen në skenë të Ushtrisë Çlirimtare të Kosovës, pra shumë kohë para Ahtisarit. Katarsisi i internacionalizimit të çështjes së Kosovës u bë në Bregun e Pikëllimit në Bllacë, pra para Ahtisarit, ose (gjatë kohës sa ai bëri një bisedë me Milosheviqin në Beograd). Kulmi i internacionalizimit të çështjes së Kosovës, ndodhi kur për herë të parë në historinë e saj NATO (ShBA-të) intervenoi për ta shpëtuar një popull nga gjenocidi dhe katastrofa humanitare. Në historinë e asnjë populli të botës qe 2009 vjet, asnjëherë nuk ka ndodhur që një popull 100% e tij të shndërrohet në refugjatë, dhe krejt vendi të digjet pos kryeqytetit. A nuk u internacionalizua atëherë kur shqiptarët i vrisnin pse e kishin ftuar NATO-n? A është në NATO edhe ndonjë shtet tjetër evropian, apo jo…? Thuhet se 1 milion e 200 mijë refugjatë ishin nga Kosova, dhe ky numër duket i vogël për Kinën miliardëshe, por ky numër “i vogël” ishte gati për pak krejt një popull i një vendi, pra një pastrim etnik që megjithatë nuk e merr as për së afërmi përndjekjen hitleriane ndaj hebrenjve. (Gjithnjë nëse e cekim faktin se Hitleri nuk i ka masakruar 120% të hebrenjve të Evropës, (mbase pse nuk ka pasur gjithaq kohë). Kjo tregon se gjenocidi i Serbisë demokratike evropiste të Tadiqit ka ushtruar një gjenocid dhe etnocid të përmasave që nuk i njeh historia njerëzore prej kur ekziston. Merrni me mend sikur populli gjerman të shndërrohet 100% refugjatë, dhe të digjet ndërkohë krejt gjermania, veç Berlinit. Pra nuk duhet të shikohen shifrat, por sa bëjnë shifrat brenda numrit të popullsisë? Gjenocidi dhe katastrofa humanitare e Serbisë së Milosheviqit po zgjaste dhjetë vjet dhe si e tillë ishte internacionalizuar si një agjendë e parë politike në botë, por ishin vetëm Shtetet e Bashkuara të Amerikës, që përpiqeshin me krejt kapacitetin e tyre material dhe diplomatik ta bindin Evropën “neutrale” të merrej me Serbinë hitleriane dhe staliniane. Pra qe 20 vjet Kosova është në kryeagjendën botërore, dhe pikërisht sponsori i Pakos së Ahtisarit OKB-ja, me UNMIK-un “e stabilizoi” Kosovën dhe tash “situata e qetë” u arrit pikërisht me standardet që plotësoi Kosova dhjetë vjet dhe që në realitet janë substancë e Planit definitiv të Ahtisarit. Pra Kosova zbriti nga agjenda, sepse konsideroi se Pakoja dhe Kushtetuta e zgjidhi çështjen e Kosovës dhe se situata në Kosovë tash është shumë stabile. Prandaj bota më nuk merret me të, që t’i lihet rrugë destruksionit politik të Serbisë dhe aleatëve të saj lindorë dhe perëndimorë. Pra jo që Ahtisari e ka internacionalizuar çështjen e Kosovës, po përkundrazi “e ka stabilizuar” dhe shtetformuar një komb të ri që e ka nxjerrë nga mikseri serbo-shqiptar. A duhet të harrojmë se na kanë detyruar të bëjmë kompromise? Nëse është dashur të bëhen kompromise, atëherë është dashur ta mbështesim, siç e mbështesim Pakon e Ahtisarit. Por një vit më vonë, kur ka qenë edhe rasti edhe mundësia, që me zotin Ahtisari t’i ballafaqojmë faktet dhe të dhënat se si po shkelet kushtetuta e tij, ne kemi aplauduar dhe kemi thënë se çdo gjë është në rregull. Mbase edhe është në rregull, por edhe sa kohë mund të mbajë ky rregull i cili përjashton të gjitha strukturat e shoqërisë nga perspektiva, ardhmëria, shpresa dhe besimi… të cilat nuk janë nocione politike, por në Kosovë mund t’i shesësh si të tilla sa herë u konvenon serbëve dhe Serbisë.