Muhaxhiri: Mustafa është dashur të largohet nga posti i kryetarit të LDK-së me 9 qershor 2014

nga **Agim Gashi** Mon Jun 01, 2015 1:46 am

Muhaxhiri: Mustafa është dashur të largohet nga posti i kryetarit të LDK-së me 9 qershor 2014

Sociologu e analisti Artan Muhaxhiri, ka komentuar për portalin Koha.net rizgjedhjen e Isa Mustafës në krye të LDK-së, edhe për një mandat.

“Problemi më i madh në ambientin politik në Kosovë është mungesa e parimësisë dhe investimit të depersonalizuar në definimin e rregullave të lojës”, ka thënë Muhaxhiri.
Sipas tij, është bërë zakonshmëri që zëri kundër joparimësisë të ngrihet vetëm atëherë kur kjo joparimësi nuk i konvenon një pale. Në ndërkohë – që mund të zgjasë me vite - nuk ka shenja të angazhimit të përkushtuar për t’u ndërtuar kriteret e qarta dhe të gjithëpranueshme të garës politike.
E sipas tij, ngjarjet në kuvendin e LDK-së janë reflektim realist i gjendjes në politikën kosovare.
“Rizgjedhja e Isa Mustafës në krye të LDK-së është joparimore njëjtë siç ishte joparimore përkrahja e tij pas zgjedhjeve të 8 qershorit. Isa Mustafa është dashur të largohet nga posti i kryetarit të LDK-së me 9 qershor 2014, një ditë pas humbjes në zgjedhjet e përgjithshme, kur politikisht, partiakisht dhe moralisht nuk e meritonte më ta udhëhiqte LDK-në”, ka thënë Muhaxhiri.
Mirëpo, humbja e tij e tretë zgjedhore me radhë asokohe jo vetëm që nuk ndikoi që t’i përmendej dorëheqja, por menjëherë nisi fuqizimi i tij në eksperimentin VLAN, pikërisht nga kundërshtarët e tij të sotëm, është shprehur Muhaxhiri.
“Tash, një vit më vonë, kur Isa Mustafa është në muajt fillestarë të mandatit si kryeministri i parë i LDK-së, kur ka pushtet të madh ekzekutiv që ia mundëson negocimin e posteve dhe favoreve me njerëzit e fuqishëm të strukturës partiake, kur është shndërruar në partner të ndërkombëtarëve në proceset me rëndësi gjeostrategjike – është iluzion i skajshëm të mendohet largimi i tij nga kryetarllëku”, ka thënë Muhaxhiri.
Sociologu e analisti politik thotë se krijimi i një perceptimi të deformuar për garë të madhe brenda LDK-së u bë nga mediat dhe diskutimet në rrjetet sociale, ku kishte një mbizotërim të dëshirës ndaj fakteve. Realisht, nuk ekzistonte asnjë parakusht objektiv për dilema në garën mes Mustafës dhe Osmanit.
“Vjosa Osmani ishte në betejë krejtësisht të pabarabartë me pushtetin (para)politik dhe financiar të ‘gardës së vjetër’ në LDK, gjë që ishte plotësisht e pritshme. E vetmja gjë të cilën ekipi i Isa Mustafës nuk mund ta llogariste me siguri ishte numri i votave që do t’i merrte Vjosa Osmani, sepse, eventualisht, një përqindje e konsiderueshme e votave për të do të sinjalizonte fuqizim në kundërshtimin e Mustafës në të ardhmen”, ka thënë Muhaxhiri. “Kësisoj, aklamacioni ishte një lloj sigurese për ekipin e Isa Mustafës, i cili nuk deshi që në asnjë rast të lëvizte nga parashikueshmëria maksimale, duke i shfrytëzuar edhe paqartësitë e Nenit 25 të Statutit të LDK-së, të cilat askush nuk ka pasur guxim t’i sfidojë”, ka shtuar më tej ai.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30