'Lufta' për Ujmanin

Serbia me politikën e saj ka vënë në plan të parë ruajtjen në “pronësi” të vet të liqenit të Ujmanit, “Trepçën” dhe Brezovicën, duke i konsideruar pasuri të patjetërsueshme të saj, ndërkohë që kryeministri i Serbisë, Aleksandër Vuçiq, është zotuar “se sa të jetë gjallë kurrë nuk do të nënshkruaj që liqeni i Ujmanit t’i takojë Kosovës”

Liqeni i Ujmanit, “Trepça” dhe Brezovica janë tri çështjet për të cilat Serbia është shprehur e gatshme të bëjë “luftë” në Kosovë. 
Serbia me politikën e vet ka vënë në plan të parë ruajtjen në “pronësi” të vet të liqenit të Ujmanit, “Trepçën” dhe Brezovicën, duke i konsideruar pasuri të patjetërsueshme të saj, ndërkohë që kryeministri i Serbisë, Aleksandër Vuçiq, është zotuar se “nuk ka njeri i gjallë në botë që do të mundë ta bindte të nënshkruajë që liqeni i Ujmanit t’i takojë Kosovës”.  
Serbia pretendon se një pjesë e liqenit të Ujmanit i takon asaj, pasi sipas kryeministrit serb Aleksandër Vuçiq, ata investuan në ndërtimin e tij në kohën e ish-Jugosllavisë.
“Sa të jem gjallë nuk nënshkruaj kurrë që liqeni i Gazivodës (Ujmanit) t’i takojë Kosovës. As liqeni i Gazivodës e as përçuesi i tensionit të lartë në Vallaq”, ishte zotuar Vuçiq gjatë vizitës së parë të tij si kryeministër i Serbisë në veri të Kosovës.
Motivet që Serbia këmbëngul ta marrë Ujmanin nga Kosova janë të shumta, por qëllimi kryesor është përftimi ekonomik në njërën anë dhe vënia nën kontroll e politikës në Kosovë në veri në anën tjetër.