Arsimi i diasporës-Lajme dhe informime tjera

Informacion - Albanska




për personelin, nxënësit, studentët e rritur dhe prindërit
rreth inspektimeve shkollore të Agjencisë Kombëtare Suedeze
për Arsimin
Në vitin 2006, Agjencia Kombëtare Suedeze për Arsimin do të inspektojë shkollat në komunën tuaj.
Sa e mirë është shkolla juaj? A po marrin nxënësit dhe studentët arsimimin e duhur? Sa të mira janë rezultatet e nxënësve? A kanë nxënësit mundësinë për të arritur qëllimet e caktuara nga programi mësimor në përputhje me aftësinë e tyre? Po prindërit, fëmijët dhe nxënësit a mund të ndikojnë në këtë? Çfarë po bëhet për të përmirësuar shkollat, qendrat e kujdesit të fëmijëve të moshës shkollore, para-shkollat dhe arsimimin e të rriturve?

Këto janë disa shembuj pyetjesh të cilave do t'u japë përgjigje inspektimi shkollor nga Agjencia Kombëtare Suedeze për Arsimin.

Çdo komunë në vend do të inspektohet gjatë një periudhe gjashtë vjeçare.
Çfarë është inspektimi shkollor?
Inspektimi duhet të tregojë nëse çdo gjë po funksionon në përputhje me programin mësimor kombëtar dhe nëse janë zbatuar kushtet, p.sh. nëse është zbatuar Akti i Shkollës. Mbi të gjitha, inspektimi duhet të ndihmojë në përmirësimin e cilësisë të para-shkollave, të qendrave të kujdesit të fëmijëve të moshës shkollore, të shkollave dhe të arsimimit të të rriturve.

Si kryhet inspektimi shkollor?
Gjatë muajve augusti 2006 dhe april 2007, inspektorët e Agjencisë Kombëtare Suedeze për Arsimin do të vizitojnë të gjitha shkollat në komunë. Ata gjithashtu do të vizitojnë disa prej para-shkollave dhe qendrave për aktivitete suplementare shkollore. Para vizitës, inspektorët do të kenë lexuar materiale dhe do të kenë marrë shënime se si komunat dhe vetë shkollat i vlerësojnë aktivitetet e tyre në raportet e tyre të cilësisë. Inspektorët do të ulen në klasë për të dëgjuar mësimin, si dhe do të bëjnë intervista dhe biseda me grupe të ndryshme. Në këtë mënyrë, ata do të kenë një ide të përgjithshme se si është organizuar mësimi, si funksionon dhe si e kuptojnë atë nxënësit dhe personeli shkollor.

Inspektorët do të dëshirojnë të intervistojnë përfaqësues të personelit, nxënës dhe studentë, si dhe prindër. Inspektorët së bashku me administratën e shkollës do të vendosin se kush do të intervistohet. Inspektorët gjithashtu do të kenë diskutime spontane me njerëz të tjerë, me të cilët ata do të takohen gjatë vizitës së tyre.

A ka nevojë për t'u përgatitur për këtë vizitë?
Nuk keni nevojë që të përgatiteni për vizitën, madje edhe nëse do të intervistoheni. As në raportin me gojë, dhe as në atë me shkrim nuk do të përmenden emra, pra nuk do të jetë e mundur të bëhen të njohura pikëpamjet ose puna e individëve.

Çfarë do të ndodhë pas vizitës?
Kur të ketë përfunduar i gjithë inspektimi, Agjencia Kombëtare Suedeze për Arsimin bën raportin dhe nxjerr konkluzionin, të cilat mund të shihen nga të gjithë nëpërmjet faqes së internetit të agjencisë. Vlerësimet e bëra gjithashtu do të paraqiten gjatë një vizite të mëpasshme në komunë.

Ndihma juaj është e rëndësishme
Është e rëndësishme që procesi i inspektimit të jetë transparent dhe që të gjithë njerëzit e angazhuar të marrin pjesë në të sa më shumë që të jetë e mundur. Mund të gjeni më shumë informata në faqen tonë të internetit (http://www.skolverket.se). Qëllimi i inspektimit të shkollave nga Agjencia Kombëtare Suedeze për Arsimin është që të përmirësohen aktivitetet parashkollore dhe ato shkollore – prandaj ndihma juaj është e rëndësishme!

Ndonjë pyetje?
Nëse keni ndonjë pyetje rreth inspektimit, jeni të mirëpritur të kontaktoni njërin prej inspektorëve që do të vizitojë shkollën tuaj.

Agjencia Kombëtare Suedeze
për Arsimin
Bertil Karlhager
Drejtori i Arsimit
08-5273 3381
bertil.karlhager@skolverket.se









Ky material mund të kopjohet lirisht. Gjithashtu është në dispozicion në gjuhën shqipe, arabishte, boshnjake, kroate, serbe, angleze, kurdishte, farsi, somalishte, spanjishte dhe turqishte