Në festivalin „Sofra dardane“ në Bajram Curr morën pjesë edhe tri grupe kulturore nga Gjermania

Në festivalin „Sofra dardane“ në Bajram Curr morën pjesë edhe tri grupe kulturore nga Gjermania




Pjesëmarrësit nga Gjakova dhe Singeni

Në Bajram Curri, në festivalin kombëtar „Sofra dardane 2009“, diaspora u përfaqësua nga shoqata për kulturë „Rinia“ nga Singeni dhe shoqatave „Qendresa“ dhe „Iliriria“ nga Heidelbergu, të cilat udhëtuan me makinat e tyre mbi 1.800 kilometra. Këto shoqata dhe numër i konsiderueshëm i bashkatdhetarëve morën pjesë atë ditë, së pari u priten ngrohtësisht nga personeli i spitalit në B. Curr dhe morën pjesë në ceremonine e zbulimit të pllakës përkujtimore në nderim të punës së madhe që ky personel bëri për shërimin e ushtarëve të UÇK-së, përkujtuan së bashku në Bashkinë e qytetit dëshmorin Tahir Sinani dhe bashkëluftetarët e tij dhe vazhduan në vendkalimin kufitar Morinë ku po ashtu u zbulua një pllakë përkujtimore në nderim të 18 luftëtarëve të UÇK-së që dhanë jetën e tyre për lirinë e Kosovës. Me këtë rast djemt dhe vashat e grupit të vallëzimit nga Singeni të rrethuar në të katër anët nga vargmalet shqiptare u prezantuan para publikut me dy valle të zgjedhura nga repertoari i tyre.
Në mbrëmje grupet pjesëmarrëse të festivalit nga Prishtina, Gjakova, Medvegja, Klina, Rahoveci, Vitia dhe diaspora së pari defiluan secili me stilin e tyre të vallëzimit në qytet e pastaj të gjithë së bashku iu drejtuan skenës së festivalit e cila ishte vendosur në stadiumin e lojërave me dorë.
Të pranishmit pëlqyen dhe duartrokitën fort paraqitjen e artistëve dhe programet e tyre secili më i mirë se tjetri. Prezantimi i diasporës në skenë ishte vërtet mahnitës për pjesëmarrësit por edhe për jurinë e festivalit. Dëshmi për këtë ishin duartrokitjet por edhe përurimet për grupin e vallëzimit, udhëheqësin artistik Rrustem Selcën dhe ftesa per festivalin e Sarandës. Në këtë dhe dy mbrëmjet e ardhshme shoqëritë pjesëmarrëse konkuruan, ndërsa më të mirat do të udhëtojnë në festivalin gjithëkombetar të Gjirokastrës. Pas darkës dhe vallëzimit të përbashkët u larguam shumë të kënaqur nga Bajram Curri, me përshtypjet më të mira rreth organizimit, bukurive natyrore të Shqipërisë, shoqërimit të të rinjëve nga diaspora me grupet pjesëmarrëse e sidomos me anëtarët e SHKA „Kemajl Azizi“ nga Vitia dhe prezantimt tonë dhe të tjerëve. Kaluam shkurt nëpër Kosovë pa pasur mundësi t´i vizitojme familjet tona dhe vazhduam rrugën për në Gjermani ku të rinjtë dhe të rejat i priste shkolla.
Për këtë vizitë duhet falënderuar Marash Gojanin, Mehmet Osmani, Idriz e Hasan Hajdari, Jakup Muqakun si dhe të gjithë prindërit të cilët së me makinat e tyre mundësuan rrugëtimin në festival.
Xhevat Muqaku