Demir Krasniqi: Një libër dokumentar me vlera historike e publicistike

nga **Agim Gashi** Sat Jul 25, 2009 1:46 pm

NJË LIBËR DOKUMENTAR ME VLERA HISTORIKE E PUBLICISTIKE

Disa fjalë për librin dokumentar “Flijimtarët e plëngjeve”, të autorit Tefik Selimi

Nga Demir KRASNIQI

Ditë më parë , fushës së publicistikës iu shtua edhe një libër me vlera të pakontestueshme dokumentare e historike , që kjo publicistikë ka si temë të vetme ndriçimin e një kohe të kaluar , por edhe të vonshme të luftës së fundit më 1999 .
Kjo kohë e paraqitur si dokument në librin e Tefik Selimit ishte e rëndë për popullin tonë shqiptar . Autori i librit , Tefik Selimi, profesor dhe gazetar , tashmë e ka kryer “misionin” e tij të rëndësishëm duke shkruar e ndriçuar jo vetëm luftën e fundit të 1999-tës , por edhe një kohë më të hershme , e cila kohë ishte me pasoja të rënda në njerëz .
Në librin e dytë “Flijimtarët e plëngjeve “ të këtij autori , që sapo ka dalë këto ditë nga shtypi , i ka ndriçuar disa personalitete të rëndësishme të Anamoravës e më gjerë , të cilët , në një mënyrë apo tjetër , i kanë bërë rezistencë regjimit të egër serbë me forma të ndryshme . Pra, flitet për disa figura atdhetare që ndonjë nga ta vritet nga gjakpirësit serbë , por ka edhe nga ta që ka shpëtuar nga masakra e njohur e Gjilanit e vitit 1944 .
Libri ngërthen në vete disa personalitete të shquara atdhetare shqiptare , të cilët jetuan , por përherë të përndjekur u flijuan nga regjimi serbë . Këto figura kurrë nuk i shërbyen atij regjimi barbar serbë , por gjithmonë ishin e punuan deri në fund në anën e popullit tonë . Këta atdhetarë e këshilluan masën popullore se si duhet atdheu , kombi e trualli i të parëve tanë .

Tefik Selimi

Libri në fjalë , është vazhdimësi e librit të parë “Gjaku i pragjeve” , të botuar më 2002 . Ky libër i kushtohet disa figurave atdhetare të anës së Malësisë së Karadakut dhe anëve tjera të Anamoravës . Si shton autori në një vend të parathënies së librit në fjalë , se “deshëm ta kryejm një borxh ndaj këtyre figurave të shquara të popullit , të cilët kanë lënë gjurmë për të mirë në popullatën shqiptare . Në anën tjetër , si shton autori : në këtë dokumentar kemi prekur ngjarjen tragjike e të njohur të masakrës së Gjilanit, e cila ishte atë kohë një kasaphane e tmerrshme për shqiptarët e pafajshëm të kësaj ane të Anamoravës e më gjerë “.
Në libër është shkruar edhe për disa qytetarë tanë , të cilët janë vrarë , masakruar e janë humbur pa gjurmë , vetëm e vetëm se ishin shqiptar dhe përherë ishin kundër regjimit serbë të asaj kohe .
Mandej , autori Tefik Selimi bën fjalë për përndjekjet e shqiptarëve nga trojet e tyre stërgjyshore , eksodin e dhimbshëm të popullatës shqiptare , i cili , për t’ i ikur më të keqes , popullata shqiptare la pasurinë e vet, për të shpëtuar nga më e keqja – vdekja .
Në anën tjetër, në një kohë jo aq të largët , shqiptarët janë keqtrajtuar rënd për një revole e armë tjetër nga skenarët e ndryshëm të përgatitur nga kuzhinat e regjimit serbë . Dhe , nga këto keqtrajtime e tortura më të rënda të barbarisë serbe , shumë qytetarë tanë e kanë pësuar me vdekje .
Tefik Selimi , sikur ka dashur me këtë dokument të “prekin” nga pak dhunën mbi popullatën shqiptare , e cila dhunë është bërë me qëllime të caktuara për shfarosjen e kombit shqiptar . Po ashtu , në këtë dokumentar janë bërë biografi të disa dëshmorëve , martirëve , por edhe të disa qytetarëve tanë , të cilët kanë vdekur nga pasojat e luftës së fundit të vitit 1999 .
Për të gjithë këta atdhetarë, dëshmorë, martirë e qytetarë të kësaj ane të Gjilanit , është shkruar ky libër dokumentar mu në 10 – vjetorët e rënies së tyre për çështje madhore : Kosovën e shtrenjtë .
Në këtë libër bëhet fjalë për Fazli Haxha – Dauti , një figurë e shquar e Malësisë së Karadakut , por edhe për Haxhi Idriz Lladova , njeriu që pati fatin të mbijetojë nga masakra e Gjilanit . Mandej, në librin “Flijimtarët e plëngjeve” , është shkruar për një figurë të shquar të kësaj ane (Gjilanit), Nazif Rrahmani , i cili , në një kohë të vështirë , ai theu dryrin e Burgut të Gjilanit, për t’ i liruar shqiptarët që ishin marrë peng për t’ i vrarë nga regjimi kriminel serbë .
Tek më vonë , kemi luftën e fundit (1999) , në fshatin Llashticë , ku është bërë një plojë e madhe , ku shumë qytetarë maltretohen , masakrohen e vriten afro 26 veta pa asnjë dëshmi kohe . Edhe sot e kësaj dite fshatarët e këtij lokaliteti ndjejnë dhimbje për familjarët e masakruar e të vrarë . Për këtë, më së miri “flet” libri i parë i autorit Tefik Selimi:”Gjaku i pragjeve” , ku gjysma e librit është i shkruar për njerëzit që janë vrarë në prag të derës, ose në male , aty ku janë zënë peng nga paramilitarët serbë .
Demir Krasniqi: Një libër dokumentar me vlera historike e publicistike U1_KopertinaeLibrit

Demir Krasniqi: Një libër dokumentar me vlera historike e publicistike U1_KopertinaeLibrit

Po kështu, edhe në librin e dytë , që është në duart e lexuesve , autori shkruan për torturat e milicisë serbe që iu bëhen disa qytetarëve tanë të Karadakut , që pësojnë keq , me vdekje, si : Salih Fetahu , Hamdi Hamiti , Muhamet Hajrullahu e të tjerë .
Këto ngjarje nuk harrohen lehtë , për faktin se, regjimi kriminal serbë ushtroi lirshëm presion e dhunë mbi shqiptarët e pambrojtur, për të sjellë frikë e droje në trojet e tyre stërgjyshore, vetëm që të ndjellë frikë e pasiguri në jetë .
Në fund , autori shton në libër duke shkruar se : “U mbetëm borxh edhe disa dëshmorëve e martirëve të luftës së fundit (1999) , për të cilët , në një të ardhme të afërme , do të punojmë në këtë drejtim për të zbardhur e ndriçuar jetën e tyre që dhanë për lirinë e Kosovës . Jemi të vetëdijshëm se, pas botimit të këtij libri , do të pasojnë vërejtjet , kritikat e të ngjashme , por ne i mirëpresim ato “vërejtje” dhe do të na ndihmojnë në të ardhmen që të jemi më “frytdhënës” në këtë “lëmë “ të publicistikës “.
Po ashtu , autori Tefik Selimi u është mirënjohës familjarëve që e kanë ndihmuar në dhënien e shënimeve të këtyre anëtarëve të tyre , që figurojnë në këtë libër dokumentar.
Është, pra një libër me vlera të shumta historike dhe dokumentare për studiuesit e lëmit të historisë së kësaj ane të Anamoravës e më gjerë .

Gjilan, më 24 Korrik 2009.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30