Tirana dhe Prishtina bashkojnë forcat kundër spekulimeve të Serbisë

Tirana dhe Prishtina bashkojnë forcat kundër spekulimeve të Serbisë

Lirie Hajdari
Nuk janë të gatshëm t’i kundërpërgjigjen Beogradit




Akuzat e ngritura nga Beogradi, kanë një “prokurore dhe avokate” mbrojtëse, pra vulën e Karla Del Pontes. Por, përse heshtin institucionet tona shtetërore, kur do të ngrenë padi ndaj akuzave serbe?!

Prishtinë, 7 gusht
Beogradi zyrtar me të gjitha forcat po përpiqet që krimet e bëra gjatë luftës në Kosovë t’ia hedh viktimave, pra shqiptarëve, duke fajësuar UÇK-në për trafikim organesh të civilëve serbë. Ndërsa, përfaqësues institucionesh në Kosovë, veçse bëjnë konstatime, duke i cilësuar si akuza të pabaza dhe me motive politike, por nuk janë në gjendje të marrin ndonjë qëndrim më konkret dhe efektiv, i cili do t’i dërgonte në bankën e drejtësisë kriminelët e vërtetë, ata të cilët ende i kanë duart e përgjakura nga krimet makabre që i bënë në Kosovë. “Autorët” e masakrave në Kosovë shëtisin të lirë, ndërsa familjarët e viktimave kërkojnë që institucionet e vendit sipas rregulloreve dhe ligjeve ndërkombëtare t’i sjellin para drejtësisë të gjithë ata që kryen krimet më barbare që ka njohur ndonjëherë historia e njerëzimit. Akuzat e ngritura nga Beogradi, kanë një “prokurore dhe avokate” mbrojtëse, pra vulën e Karla Del Pontes, ku fajësohet UÇK-ja për gjoja rrëmbimin e afërsisht 300 civilëve serbë dhe jo shqiptarë dhe marrjen e organeve për trafikim. Kjo çështje u aktualizua sërish, pasi vetë i dërguari i KE, Dick Marty po viziton rajonin në kuadër të hetimeve. Ky është paradoksi i kësaj lufte, pasi po ngatërrohen vrasësit me viktimat, shqiptarët janë sërish objektivi i radhës! Tirana dhe Prishtina zyrtare janë të vetme përballë vërshimit të akuzave serbe, duke u bërë thirrje që këto janë akuza turpi dhe të pabaza.
Tirana dhe Prishtina hedhin poshtë pretendimet e Beogradit

Përfaqësuesit e institucioneve shtetërore në Tiranë kanë përjashtuar mundësinë e fillimit të hetimeve të reja lidhur me akuzat e Karla Del Pontes dhe të Beogradit. Këtë qëndrim, e ka shprehur të enjten ministri i Drejtësisë, Enekelejd Alibeaj, gjatë takimit me të dërguarin e KE-së, Dik Marti, duke shpjeguar: ‘në asnjë rast, shtetasit e huaj nuk kanë të drejtë të kryejnë veprime procedurale hetimore në territorin shqiptar’. Ai ia ka bërë me dije z. Marti se hetimet mund të kryhen nga prokuroria shqiptare vetëm me kërkesë, letër porosi që vjen nga shtetet e huaja. Alibeaj i ka thënë z. Marti se aktualisht nuk ka prova dhe argumente që Prokuroria shqiptare të fillojë hetimet.
Edhe Prishtina zyrtare i hedh poshtë akuzat e fabrikuara në Beograd, duke konsideruar se nisja e hetimeve nga KE për krime lufte në Kosovë përbën precedent në praktikat e kësaj organizate. Për Ramë Manajn, zëvendëskryeministër në qeverinë e Kosovës, ky proces ka motive politike i bazuar edhe në kërkesën e ish-kryeprokurores Karla Del Ponte. “Mbase nuk mund të thuhet me kompetencë të argumentuar, por duket se ky proces qëndron mbi një politizim, mbi një kërkesë të ish- prokurores së Gjykatës së Hagës, znj. Del Ponte, por që në fakt demantohet nga vet rezultatet e hetimeve që ka pasur Gjykata e Hagës edhe në Kosovë, edhe në Shqipëri, dhe mbi bazën e tillë nuk është gjetur asnjë argument i vetëm për mundësinë e keqpërdorimit të organeve siç pretendon ish- prokuroja Del Ponte”, thotë Manaj.(Tekstin e plotë mund ta lexoni në numrin e ditës së shtunë të gazetës "Bota sot")