Rexhepi nuk e mban premtimin

Rexhepi nuk e mban premtimin

Besnik Boletini
“Faktori ndërkombëtar në parim po e përkrah rindërtimin, edhe pse nganjëherë UNMIK-u dëshiron që të faktorizohet më tepër se sa realisht ka kompetenca”, thotë Rexhepi.



“Ky është proces që do të vazhdoj, sa të kemi buxhet ne, do të vazhdojmë rindërtimin e shtëpive atje. Rindërtimi i këtyre shtëpive nuk është proces që do të bëhet vetëm këtë vit, por do të vazhdojë edhe vitin e ardhshëm”, theksoi Rexhepi.

Prishtinë, gusht - Vështirësitë për kthimin e shqiptarëve në veri nuk kanë të ndalur, ndërkohë që as qeveria e Kosovës dhe as ajo lokale e Mitrovicës nuk e kanë ndërmend të bëjnë më shumë. Javën e kaluar EULEX-i dhe UNMIK-u ua ndërprenë punimet shqiptarëve në emër të sigurisë pasi serbët dolën t’ua ndalonin shqiptarëve punën, ndërkohë që vetë po vazhdonin me punime në ndërtimin e banesave kolektive, pikërisht në tokat e shqiptarëve të shpërngulur.
Nga veriu besohet se janë të shpërngulur më shumë se 20 mijë shqiptarë, shtëpitë e të cilëve u dogjën shkatërruan nga forcat serbe gjatë luftës, ose mbahen të uzurpuara nga pas lufta prej serbëve.
Prej kur ka filluar rindërtimi i shtëpive të shqiptarëve në lagjen “Kroi i Vitakut” në Mitrovicë, problemet rreth rindërtimit të këtyre shtëpive nuk kanë pasur të ndalur, në njërën anë serbet lokal vazhdojnë të kundërshtojnë këto rindërtime, duke shkrepur edhe armë, por edhe duke sulmuar me gurë ekipin e punëtorëve, që merret me rindërtimin e shtëpive. Por, situata po mbahet nën kontroll falë vetëpërmbajtjes së popullatës, bashkëpunimit të mirë me strukturat komunale, si dhe angazhimit të strukturave të sigurisë.
Për shkak të këtyre problemeve shpesh gjendja e sigurisë në “Kroin e Vitakut” është acaruar, dhe si pasojë disa herë është ndërprerë procesi i rindërtimit të shtëpive atje. Përveç problemeve me serbët, punimet së fundi janë ndërprerë për shkak të një fatkeqësie të rëndë që ka ndodhur në fshatin Suhadoll, kur një kamion i kompanisë që merret me rindërtimin e shtëpive, ka humbur kontrollin dhe ka hyrë në një shtëpi dhe si pasojë kanë humbur jetën tre fëmijë.
Punimet të cilat pritej të fillonin të hënën e shkuar u shtynë nga ky pretekst për një javë, siç tha kryetari i komunës së Mitrovicës, Bajram Rexhepi, ‘shtyhen për një javë, derisa të përfundojnë të pamet’. Por, si duket ky rast vetëm ka qenë një shkas për të zvarritur sa më shumë rindërtimet atje dhe kthimin. Dhe si duket doktori kësaj here nuk do të dal në fjalë. Rexhepi thotë se punimet për rindërtimin e shtëpive në lagjen “Kroi i Vitakut”, pritet që të vazhdojnë javën e ardhshme. “Tash edhe drejtori i kompanisë kontraktuese është në paraburgim për shkak të aksidentit që ka ndodhur në fshatin Suhadoll, do të bisedohet me grupet punuese të hënën dhe pritet që gjatë javës së ardhshme të rifillojnë punimet për rindërtimin e shtëpive”, thotë Rexhepi pa saktësuar ndonjë ditë apo datë dhe pa zënë në gojë të pamet për fatkeqësinë, të cilat zakonisht zgjasin një javë.
“Serbët këtu reagojnë kohë pas kohe, edhe pse nuk kanë arsye që të reagojnë, mirëpo është me rëndësi, që me faktorin ndërkombëtar duhet t’i kemi gjërat e qarta dhe faktori ndërkombëtar në parim po e përkrah edhe pse nganjëherë UNMIK-u dëshiron që të faktorizohet më tepër se sa realisht ka kompetenca”, u shpreh Rexhepi. Rindërtimi i shtëpive është një proces që llogaritet të zgjatë edhe vitin e ardhshëm, por kjo varet nga disa faktor si gjendja e sigurisë, mjetet financiare dhe kushtet klimatike.
Qeveria e Kosovës ka premtuar që do të kthejë një mijë familje shqiptare të zhvendosura nga veriu. Por, me ritmin aktual duket se nuk do t’ia arrijë t’i kthejë deri në fund të mandatit as një të dhjetën e atyre familjeve.