Berisha, ndihmoi Greqinë në betejën kundër zjarreve

Berisha, ndihmoi Greqinë në betejën kundër zjarreve

Drejt Athinës një kompani e përbërë nga gjashtë automjete zjarrfikëse dhe dyzet forca të specializuara.




Zjarret e këtyre ditëve kanë sjellë në kujtesën e grekëve gushtin e vitit 2007, kur zjarret shkatërruan sipërfaqe shumë të mëdha në gadishullin e Peloponezit, por edhe më pak, në rrethinat e Athinës.

Kryeministri Berisha shprehu solidaritetin e qeverisë ndaj popullit grek dhe qeverisë së një vendi mik, i cili në këto momente po përballet me një katastrofë natyrore si pasojë e djegies së mijëra hektarëve pyje nga zjarre që kanë dalë jashtë kontrollit. "Kryeministri Berisha dhe qeveria shqiptare po ndjekin me shqetësim dhe keqardhje situatën e rëndë humanitare që po përjetojnë banorët dhe qeveria greke, si pasojë e përfshirjes në zjarr të shumë zonave të banuara në vendin fqinj. Kryeministri i Shqipërisë, z. Sali Berisha, i gjendet pranë në këto çaste të vështira popullit grek dhe qeverisë së vendit mik. Në emër të qeverisë dhe popullit shqiptar, kryeministri Berisha i shpreh solidaritetin duke i ofruar ndihmë logjistike dhe në njerëz, në të cilën përfshihet një kompani zjarrfikësesh të përbërë nga gjashtë automjete zjarrfikëse dhe dyzet forca të specializuara", thuhet në deklaratën e mbrëmshme të qeverisë. Bilanci më i fundit flet për rreth 170.000 dynim sipërfaqe pyjore të shkrumbuara në zonën më të gjerë të Maratonës historike, dhjetëra shtëpi të djegura dhe qendra të tëra të banuara, banorët e të cilëve janë shpërngulur përkohësisht për t`i shpëtuar manisë shkatërrimtare të zjarreve që ndihmohen nga erërat e forta 7-8 bofor. E gatshme për të dërguar ndihmë u shpreh qeveria e Shkupit, me dy helikopterë M-17, por edhe ajo e Ankarasë pas telefonatës së solidaritetit që kryeministri turk Erdogan i bëri sot kryeministrit Karamanlis. Ndihmë të menjëhershme dërguan vendet evropiane si Italia, Franca, Austria dhe sot, Spanja. Zjarret vunë në pozitë të vështirë qeverinë që insiston nëpërmjet kryeministrit të saj se, "përpjekja ishte mbinjerëzore dhe mekanizmi shteteror unik edhe operativ". Kjo kur kryetari i opozitës socialiste Papandreu, që vajti në vendin e zjarreve foli për "katastrofë kombëtare" , kurse një pjesë tjetër e opozitës për "përgjegjësi direkte të qeverisë" me paaftësinë e saj por edhe sistemin ligjor që favorizon interesat e njerëzve që lakmojne dhe djegin sipërfaqet pyjore në dëm të mjedisit.
Dyshime për shkaqet
Kryeministri Kostas Karamanlis bëri një fluturim me helikopter mbi zonat e katastrofës, para se të drejtonte një mbledhje të qeverisë mbi situatën. "Po bëhet një betejë e madhe shumë e vështirë nga forcat zjarrfikëse, mjetet ajrore, vullnetarët, banorët e zonave të prekura, një betejë në kushte të pabarabarta, që e vështirësojnë shumë punën për shuarjen e zjarreve", tha kryeministri. Policia apeloi ndaj qytetarëve që kishin ndërmend të ktheheshin dje nga pushimet, ta shtynin për një ditë kthimin e tyre dhe të mos përdornin hyrjet veriore të autostradës, me qëllim që mos të pengonin kalimin e lirë të mjeteve zjarrfikëse e të autoboteve me ujë. Prokuroria e Athinës ka urdhëruar fillimin e hetimeve rreth shkaqeve që provokuan zjarrin fillestar të së premtes në mbrëmje.
Presidenti i Unionit të kryebashkiakëve, i deklaroi agjencisë zyrtare të lajmeve, se ai zjarr ishte vënë qëllimisht. Ai e mbështet dyshimin e tij në faktin se zona ku nisi zjarri, nuk kishte as banesa, as objekte të tjera, madje as rrugë automobilistike, por veç pyll. Ai thekson se në të njëjtën kohë, në zonën në fjalë shërthyen edhe tri zjarre të tjera, ndoshta për të ç'orientuar shërbimin zjarrfikës.
Zjarret e këtyre ditëve kanë sjellë në kujtesën e grekëve gushtin e vitit 2007, kur zjarret shkatërruan sipërfaqe shumë të mëdha në gadishullin e Peloponezit, por edhe më pak, në rrethinat e Athinës. Rreth 70 persona humbën jetën nga ato zjarre. Tashmë, i vetmi ngushëllim është se nuk ka viktima.