ANP: Bllokohen tenderët dhe prokurimet në vlerë 3.5 milion euro

ANP: Bllokohen tenderët dhe prokurimet në vlerë 3.5 milion euro





Aeroporti i Prishtinës


Drejtori Menaxhues i Aeroportit Ndërkombëtar të Prishtinës Agron Mustafa mori vendim për të stopuar aktivitetet e prokurimit dhe tenderat në investime kapitale në vlerën prej së paku 3.5 milion eurove. Ky vendim vie për shkak të kohës së shkurtë që ka ngelur deri në muajin dhjetor, kur është paraparë të jepet me koncesion ky aeroport sipas planeve të Qeverisë së Kosovës, thuhet në një komunikatë për opinion të lëshuar sot nga Zyra për informim pranë AN Prishtina.
Investimet eventuale që mund të lindin si të nevojshme dhe emergjente gjatë kësaj periudhe që ka mbetur, do të bëhen në koordinim të plotë me Komitetin Ndërministror që është i ngarkuar për dhënien me koncesion të aeroportit.
Ndërkohë që investimet tjera, për të cilat proceset e tenderimeve janë në proces e sipër që kanë miratimin nga komiteti ndërministror si dhe ato që kanë përfunduar më herët dhe janë nënshkruar kontratat, do të implementohen.
Vendimi i Drejtorit Menaxhues prek investime të ndryshme kapitale të cilat ishin paraparë të realizoheshin në pjesën e dytë të vitit 2009, por ishin buxhetuar si investime të nevojshme për kompaninë.
Konkretisht është stopuar investimi prej 1 milionë eurove për blerjen dhe instalimin e një radari, investimet prej 1.5 milionë eurove për blerjen e pajisjeve të ndryshme për platformë, investimi për rinovimin e Terminalit të Arritjes prej 600 mije euro,- ishte paraparë që Terminali i Arritjes për shkak se nuk është në gjendje të mirë të rinovohej dhe të merrte pamjen e VIP-Qendrës etj.
“Me vendim të Drejtorit Menaxhues Agron Mustafa, janë pezulluar dhe ndërprerë të gjitha aktivitetet dhe procedurat tenderuese për investimet që kanë qenë duke u realizuar, apo ishin në proces në shumën mbi 3.5 milionë euro. Arsye është fakti se deri në dhënien me koncesion kanë mbetur vetëm edhe tre muaj, tha Koordinatori për Marrëdhënie me Jashtë i ANP-së, Altin Ahmeti.
Sipas tij, stopimi i investimeve nuk do të ndikojë në shërbimet që ANP ofron ndaj klientëve, kompanive ajrore dhe udhëtarëve.
“Investimet që u stopuan ishin miratuar për t’u realizuar nga ana e bordit të kompanisë për përmirësimin e mëtutjeshëm të shërbimeve dhe rritjen e efikasitetit në punë. Rritja e cilësisë së shërbimeve ishte primare që kur në pozitën e drejtorit është vendosur drejtori Agron Mustafa”, tha tutje koordinatori Ahmeti.
Në Aeroportin Ndërkombëtar të Prishtinës, kryesisht dy vitet e fundit janë investuar rreth 50 milionë euro, investimet këto që kanë qenë shumë të nevojshme dhe kanë rritur së tepërmi vlerën e kompanisë në treg.
Gjatë këtyre viteve është rishtresuar pista e re në vlerë prej 14 milion euro, është vendosur ndriçimi i ri, investim që ka kushtuar 6 milion euro, rrethoja dhe rruga perimetrike në shumën prej 1.5 milion euro, 5 autobusë të rinj në shumën prej 1.8 milion euro - autobusë të cilët janë special për pistë, sistemi i ri i sortimit të bagazhit në shumën prej 2 milionë eurove, VIP-qendra në shumën prej gati 1 milionë euro dhe dhjetëra investime të tjera në shifra më të vogla. Aeroporti do të fokusohet në vazhdimësinë e përmirësimit të shërbimeve ndaj klientëve deri në ardhjen e operatorit privat që parashihet të menaxhoj me aeroportin, thuhet në komunikatë.