Arifi: Greva ishte një lloj referendumi për pavarësi!

Arifi: Greva ishte një lloj referendumi për pavarësi!

Dafina Xhemaj, Bota Sot
BSPK përkujton grevën e 3 shtatorit të 1990



“Greva e 3 shtatorit ishte një grevë e madhe, sepse një grevë e tillë, as atëherë e as tash nuk ka ndodhur më. Ajo grevë tronditi regjimin e atëhershëm të Serbisë,”tha Gorani.


Greva e përgjithshme e 3 shtatorit 1990, ishte manifestimi më i fuqishëm i kërkesave të punëtorëve për mbrojtjen e të drejtave sindikale në Kosovë dhe një lloj referendumi për liri e pavarësi, vlerësoi kreu i BSPK-së Haxhi Arifi.
“Bashkimi i Sindikatave të Pavarura të Kosovës, që nga themelimi i saj në vitin 1990, është angazhuar për mbrojtjen e të drejtave sindikale të punëtorëve përmes protestave, grevave, dhe bojkotimeve të shumta. Por, greva më e madhe në historinë e BSPK-së është ajo e 3 shatorit të vitit 1990”, tha Haxhi Arifi kryetar i BSPK-së, në një takim me gazetarë të enjten në Prishtinë.
Arifi tha se greva ishte një manifestim i fuqishëm i kërkesës unanime të punëtorëve të Kosovës për mbrojtjen e të drejtave dhe lirive sindikale dhe shprehje e protestës energjike kundër politikës anti- punëtore dhe antikombëtare të pushtetit ushtarako-policor të Serbisë, kundër diskriminimit brutal etnik e social. “Greva ishte një lloj referendumi i punëtorëve dhe i qytetarëve të Kosovës për liri e pavarësi”, tha Arifi.
Kërkesat e atëhershme të grevistëve ishin për kthimin e punëtorëve në vendet e tyre të punës, heqjen e masave të dhunshme, respektimi i të drejtave sindikale në përputhje me konventat ndërkombëtare etj. “Pavarësisht se nuk mori mbështetje politike, dhe vlerësimet ishin të ndryshme, greva ishte e suksesshme dhe BSPK-ja dëshmoi se ishte organizatë serioze”, tha kryetari i parë sindikalist, Hajrullah Gorani, të cilin një pjesë e opinionit e bën përgjegjës sot për shkatërrimin e industrisë së Kosovës.