Përplasje në Strasburg

Përplasje në Strasburg
Në një debat në Këshillin e Europës, një grup parlamentarësh kosovarë kanë kundërshtuar vlerësimet e parlamentarëve nga disa shtete aleate të Serbisë të cilët janë munduar të minimizojnë sukseset e arritura në Kosovë.

Nga Express

Delegacioni i Komisionit për Integrime Evropiane i Kuvendit të Kosovës ka njoftuar Komitetin për Çështje Politike të Këshillit të Europës në Strasburg të arriturat në Kosovë, por është ndeshur nga vlerësimet negative të përfaqësuesve nga disa shtete evropiane, të cilat nuk kanë njohur pavarësinë e Kosovës.

Në Strasburg është debatuar rreth situatës së komuniteteve në Kosovë, pjesëmarrja e tyre në jetën politike, procesin e decentralizimit, zgjedhjet lokale dhe për Misionin e BE’së – EULEX.

Pas prezantimit të deputetëve kosovarë është zhvilluar një debat shumë i gjallë nga ana e shteteve anëtare të këtij komiteti siç janë : Rusia, Serbia, Rumunia, Ukraina dhe Bosnja e Hercegovina, duke u munduar që me diskutimet e veta t’i minimizojnë sukseset e arritura të institucioneve të Kosovës në fushën e të drejtave të njeriut, decentralizimit kthimit të komuniteteve, thuhet në një njoftim të Kuvendit të Kosovës.

Por, vlerësimet e përfaqësuesve të këtyre shteteve janë kundërshtuar nga ana e delegacionit kosovarë “me fakte dhe dokumente të ofruara, të cilat janë nxjerrë nga institucionet e Republikës së Kosovës”.

Për shkak të presioneve që janë bërë nga Rusia dhe Serbia dhjetë vite nuk kanë lejuar që të paraqitet askush nga institucionet e Kosovës për të dëshmuar në këtë komitet. Kjo ishte hera e parë që iu dha mundësia delegacionit të Republikës së Kosovës që të marrë pjesë në debatin e këtij Komiteti.

Delegacioni i parlamentarëve kosovarë: Zylfije Hundozi, Edita Tahiri, Bujar Bukoshi dhe Branislav Grbiq, kishte udhëtuar në Strasburg pas ftesës që i ishte dërguar nga Komiteti për Çështje Politike të Asamblesë Parlamentare të Këshillit të Evropës.

Komitetin për Çështje Politike të Këshillit të Europës ka përcjell situatën në Kosovë për disa vite dhe tash është duke përgatitur një raport për Kosovën.