Hapet klasa për mësimin e gjuhës shqipe

Hapet klasa për mësimin e gjuhës shqipe

Në Rolle të kantonit Vaud

Oborri i College de Martinet të komunës së Rollit të kantonit VAUD, të mërkurën e 7 tetorit 2009, gumëzhinte nga të pranishmit, nga të cilët pjesa dërrmuese fliste gjuhën shqipe. Ishin të pranishëm prindër aktivistë, gazetarë dhe mysafirë zviceranë. Ganimete Gashi me mësuesen Burbuqe Ahmetaj përkujdeseshin për arritjen e të ftuarve në mënyrë që hapja solemne e këtij takimi të fillojë në kohë të caktuar. Përderisa në karriget e vendosura në sallën ku do të mbahej fjala solemne për këtë rast, po mbusheshin me prindër dhe nxënës, po bisedoja me zonjën Claire Goumoëns, mësuese në Gjenevë.
Ajo më tha se me ndihmën e zonjës Ganimete Gashi, aktiviste shqiptare në Rolle, u bënë të gjitha përgatitjet që të hapet kjo shkollë.
Edhe vet mësuesja zvicerane e dinte rëndësinë e hapjes së një shkolle në gjuhën shqipe në këto anë. Ajo tha se hapja e shkollave është e iniciuar shpesh edhe nga autoritetet zvicerane, mirëpo mungon shpesh vullneti dhe interesimi te prindërit shqiptarë.
Në këtë ditë të rëndësishme për komunitetin shqiptar të komunës së Rollit, kishin ardhur edhe aktivistë të dalluar të LAPSHIT nga kantoni i Gjenevës, Agim Paçarizi dhe të tjerë si dhe Abaz Fejzullahu nga kantoni i Soloturnit. Para të pranishmëve e mori fjalën zonja Ganimete Gashi, e cila foli për historikun e shkollës shqipe në tërë territoret shqiptare si dhe rëndësinë e kësaj shkolle në diasporë. Zonja Claire Goumoëns, foli për miqtë shqiptarë që i kishte të shumtë dhe për fisnikërinë e tyre që mësuesen e lidhte më këtë komunitet. Mësuesja Burbuqe Ahmetaj, mësuese e dalluar në këto anë, foli për programin që do ta zhvillojë me nxënësit e ardhshëm të kësaj shkolle.
Mësimi në këtë shkollë do të mbahet çdo të mërkurë prej orës 13:00 deri në 14:30 - paralelja e parë, ndërsa prej orës 14:30 e deri në 16:00 - paralelja e dytë. Numri i nxënësve është gjithsej 20 të regjistruar tani për tani. Adresa e shkollës është:Avenue de General Guisan 23, College de Martinet Rolle.
Pastaj e mori fjalën Musa Pali, koordinator i LAPSH të kantonit VAUD, i cili foli për historikun e shkollës shqipe në kantonin VAUD dhe gjithashtu për rëndësinë e hapjes së këtyre shkollave. Agim Paçarizi dhe Abas Fejzullahu folën gjithashtu për të mirat që i sjell kombit shkolla shqipe në diasporë.
Pastaj të pranishmit u orientuan drejt tavolinës ku ishin të vendosura specialitetet shqiptare të përgatitura enkas nga nënat e fëmijëve që do ta ndjekin mësimin plotësues në gjuhën shqipe në këtë shkollë.
Musa Pali
koordinator i LAPSH në kantonin VAUD

Edhe libri shqip në vitrinën e madhe të botës

Prej sot deri më 18 tetor mbahet Panairi i Librit në Frankfurt.


Nazmi Rrahmani, kryetar i Shoqtës së Botuesve të Kosovës


Mbahet për të 61-tën herë panairi më i madh i librit në botë, i cili zgjat nga 14 deri më 18 tetor. Dedikimit të ri të këtij panairi, përveç librit, tashmë i bashkohet edhe multimedia dhe komunikimi. Sivjet në këtë ngjarje kulturore nga njëqind vende të botës me botimet e tyre marrin pjesë 7.300 ekspozues; afër 1000 autorë, dhjetëfish më shumë gazetarë dhe thuhet se do të ketë rreth 300.000 vizitorë.
Këto janë shifrat e komunikuara paraprakisht për Panairin e sivjetëm të Librit në Frankfurt. Ndërkaq mysafir nderi i Panairit sivjet do të jetë Kina, botimet e së cilës do të paraqiten në mënyrë të veçantë. Poashtu shkrimtari italian Claudio Magris është fitues i Çmimit të Paqes të librarëve gjermanë, që është çmimi kryesor që jepet gjatë këtij panairi, kur bëhen paraqitje të shumta librash e autorësh, biseda tematike, kontakte të të gjitha llojeve, marrëveshje e kontrata botuese.
Pjesëmarrja e botuesve shqiptarë në Panairin e Librit në Frankfurt ka bërë një traditë të mirë në një kohë të gjetë, duke bërë kështu pasurimin e vazhdueshëm dhe përtëritjen e bibliotekave sidomos të njerëzve tanë të ndodhur jashta vendit. Vjetëve të fundit, ndonëse me shumë vështirësi, ata vijnë në këtë takim të botuesve nga gjithë bota të organizuar nga asociacionet përkatëse të botuesve në nivel të shteteve që u përkasin, por që në Frankfurt librin shqip e paraqesin bashkë dhe afër njëri-tjetrit.
Nga biseda me Nazmi Rrahmanin, kryetar i Shoqatës së Botuesve të Kosovës dhe botues i SHB “Faik Konica”, mësuam se edhe sivjet botuesit nga Kosova, si “Faik Konica”, “Dukagjini”, “Rozafa”, Instituti Albanologjik, Akademia e Shkencave dhe Arteve e Kosovës, “Artini”, “Elda.bs” dhe “Koha ditore” do të marrin pjesë në Panairin e Frankfurtit me botimet e tyre më të reja, por do të ekspozohen edhe botimet e botuesve të tjerë që nuk do të marrin pjesë vetë. Me botimet e tyre në panairin e Frankfurtit do të marrin pjesë poashtu edhe botues nga Shqipëria dhe botues të tjerë shqiptarë nga viset e tjera.
Kryetari i SHBK, z. N. Rrahmani, në bisedën e shkurtë që patëm na tha se kanë pasur mbështetjen e Ministrisë së Kulturës të Qeverisë së Kosovës përsa i përket sigurimit të vendit në panair dhe heqjes së shpenzimeve për stendat e ekspozimit. Ndërkaq, përsa u përket të tjerave, ato i kanë marrë përsipër vetë botuesit. Ndër vështirësitë me të cilat ballafaqohen në mënyrë të veçantë këta krijues e botues të librit sigurisht që kryet e vendit e zë transportimi në mënyrë më adekuate i krijimeve që paraqesin në panair, kur shpesh detyrohen që atyre t`u gjejnë një udhë jo gjithnjë të përshtatshme e aspak të lehtë, sa jo rrallë nuk kanë mundësi t`i kthejnë fare prapa ato që mbeten pa u shitur.
Botuesit tanë thonë se në këtë panair do të ketë shumë botime të reja cilësore, por do të paraqiten edhe botimet e mëhershme. Ato lexuesve tanë u ofrohen me çmime të ulura. Ata i mban shpresa se ky do të jetë një rast i mirë që të vënë kontakte të reja dhe t`i vazhdojnë të vjetrat sidomos me lexuesit e tyre nga masa e madhe e mërgimtarëve tanë, në të cilën numri i studentëve, i nxënësve dhe i të rinjve të tjerë është gjithnjë më i madh. /Sh.