Kalosh Çeliku: Kur thërret partia (Cikël poetik nga Libri ''Kali i Trojës nëpër Bit - Pazar'')

nga **Agim Gashi** Sat Oct 17, 2009 3:43 am

KALOSH ÇELIKU

KUR THËRRET PARTIA

Cikël poetik nga libri: KALI I TROJËS NËPËR BIT – PAZAR (1994)

Kur thërret Dr. Madhi e vendos Partia
Ngrihet përnjëheri o “intelegjencia”.
Nëpër shoqata, unione e përurime
Liri kërkohet, bëhen flijime.
Për shkolla shqipe – barazi kombëtare
Për dy orë flamur e për abetare.
Universitet Shtetëror e kabinete
Banesa e vende pune për vete.
Kur thërret Dr. madhi e vednos Partia
Ngrihet përnjëher o “intelegjencia”…

E MORA LAPSIN, DOLA PËR GJAH

E mora lapsin, dola për gjah
Seç u ula nën një ah.
Pusi vura te Shatërvani
T’i shoh burrat që ka Vatani.
Me setret krahëve – shpatat në dorë
O lum e lum për këta dëshmorë!

E mora lapsin, dola për gjah
“Demokratët” tanë krah për krah.
Tym e flakë nxjerrin nga goja
Skuqet – ndizet foltorja.
Në dyluftime i përzien kësulat
Fyt për fyti u rrokën burrat.
Flakë më flake te Shatërvani
O priti, priti këta burra mejdani!

Pusi u vura në “Trumbeta”
Shkrepa lapsin, o tungjatjeta!...

Ç’KA “DEMOKRATI” ME MUA

Ç’ka “demokrati” me mua
Herë sillet si burrë – herë si grua
Kur del te Rrapi, në Shatërvan
Kokën fët e kthen më një anë.

Ç’ka “demokrati” me mua
Mos keq e kam hidhëruar,
Kur i këndova në “Trumbeta…”
Që i dhimbset një “tungjatjeta”.

Ç’ka “demokrati” me mua
Që del e ftohet në krua.
Vallë, e zemëroi çiftelia
Që më akuzoi te Paria…

Ç’ka “demokrati” me mua
A e di se unë prapë e dua!...

Ç’KANË KOLLTUKËT QË RËNKOJNË

Ç’kanë kolltukët që rënkojnë
Derdhin lot, po vajtojnë:
Këta “demokratë” të soçëm
Këmbekrye komunistë të moçëm.
Që i ndërruan vetëm maskat
Hu më hu çirren si laraskat.
Nuk dorëzohen, s’i hedhin armët
Amanet, thonë, na e lanë të parët:
Brez pas brezi t’u dalim zot
Kolltukëve që i fituam me barot.

Ç’kanë kolltukët që rënkojnë
“Demokratët” mezi i durojnë…

TE XHAMIA E JAHJA PADISHAHUT

Mu te xhamia e Jahja Padishahut
Haxhi deputeti i lutet Allahut
Me tespihe në dorë – kuq e zi
Në rendin e parë këndon ilahi.

Haxhi u bë brenda një nate
I lutet Allahut për mëkate!
Që i bëri gjatë monizmit
Ky hero trim i socializmit.

E ngre zërin për ferexhe
Feja s’na solli në këtë derexhe.
Po, shkolla me ca ateistë
Brez pas brezi nacionalistë.

Mu te xhamia e Jahja Padishahut
Haxhi deputeti i lutet Allahut…

KUR MË NGJITESH NË FOLTORE

Kur më ngjitesh në foltore
Tinëz – tinëz dorë për dore.
Me atë zanatin e vjetër
Herë nën sjetull, herë nën setër.
Pesëdhjetë vjet që e ushtrove
Pesëdhjetë vjet na sakatove.

Kur më ngjitesh në foltore
Ule zërin se mendtë m’i more
Me ato diskutime të zjarrta
Që s’i pati dikur as Sparta.
Fjalë boshe – demagogji
Art i rrallë për elegji.

Kur më ngjitesh në foltore
Ku më je nisur me ato taborre
Me puthadorë e masha
Radikës si Hajredin Pasha…

DAP E DAP ME DY BRINJA
(Një “analisti” politik)

Foltores i sulesh me dy brinja
Dap e dap e dap e dap.
Bar kërkon nëpër dëllinja
“Mikun” do ta qesësh në trap.

Dap e dap e dap e dap
Po s’më qet se më ke “mik”.
Natë e ditë rri në dollap
Ogiç topall dhe ashik.

Mikrofonin e merr në dorë
Npër emisione të A – njëshit.
Fryhesh zhgërryhesh, ore i gjorë
Me dy brinjë të ogiçit.

E kam një ogiç nëpër dëllinja
Dap e dap me dy brinja…

MU TE RRAPI NË SHATËRVAN

Mu te Rrapi në Shatërvan
Kokë më kokë dy azganë.
Dy burra – dy patriot
Kulltukët i qajnë me lot.

Mu te Rrapi në Shatërvan
Seç na nxorrën jataganë:
Kush na i prek idealet
Do ta ndjekim deri te malet.
Mu te Rrapi në Shatërvan
Intervista japin, lusin “Babanë”.
Vaaap, ia dha flaka në çardak
Kuku, nënë, do të bëhet gjak.

Do të bëhet gjak, do të mbytet çuku
Do të bien “burrat” nga kolltuku…

MU TE TEATRI NË BYFE

Mu te Teatri, në byfe
Vijnë patriotët si rrufe
Me kalë të bardhë e mushka
Shkrep arti – kërset pushka.

Mu te Teatri, në Bit – Pazar
Vijnë krijues – vijnë zagarë.
Veteranë që bëjnë politikë
Dje me Rusi, sot me Amerikë.

Mu te Teatri, mes bërlloku
Kultura jonë i ka hipur një gjoku.
Errësirës i turret e katandisur
E shalojnë kalorës të arratisur.

Mu te Teatri, para Vetëshrëbimit
Kulturofagët i prijnë mjerimit…

DY ZAGARË NËPËR ÇARSHI

Mora lapsin, dola në Çarshi
Dy zagarë më rrinë karshi:
Ma bëjnë me sy
E ma bëjnë me kry’.

Mora lapsin, dola në Shatërvan
Dy zagarë rehat s’më lanë:
Ma bëjnë me dorë
E më gjuajnë me borë.

Mora lapsin, u dola karshi
Dy zagarë më ndjekin nëpër Çarshi…

KA TRE VJET E DISA MUAJ
(Dashurisë së madhe: Kurvës Parti)

Ka tre vjet e disa muaj
Kemi pasur dashuri plot zjarr.
Tash do t’i tregoj gjithkujt
Vetë u shite nëpër Bit – Pazar.

Po ta dija se do një tjetër
Unë më parë ta kisha kthyer shpinën.
Si e harrove dashurinë e vjetër
Në Teatër, në foltore mbi binën.

A të kujtohen elegjitë e mia
Linçet intelektuale dhe fizike.
Takimet idilike te Paria
E pabesë paske qenë, moj mike…

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30