Të mos përdoret politikisht puna e AKK-së

Të mos përdoret politikisht puna e AKK-së



Agjencia Kosovare kundër Korrupsionit dëshiron të sqarojë publikun përkitazi me një artikull i cili është botuar në mediat e shkruara të Kosovës për dyshime të mundshme të veprimeve korruptive për një ish zyrtar të lartë të Qeverisë paraprake të Kosovës, thuhet në një komunikatë. Me qëllim të shmangies së tendencës për përdorim politik në këtë kohë parazgjedhore Agjencia i jep këto shpjegime: Agjencia Kosovare kundër Korrupsionit ka pranuar një informatë për veprime të mundshme korruptive më datën 8.10 2007. Informata është dhënë me shkrim dhe është protokolluar me nr 02 399/07. Pas hetimeve paraprake administrative Agjencia e ka përciellë lëndën në zyrën e Prokurorisë Speciale të Kosovës më datën 11.06.2008 me nr. protokolli 02 344/08. Më 15 gusht 2008, Prokuroria Speciale e Kosovës pati informuar Agjencinë se informata në fjalë është përcjellë në Prokurorinë e Qarkut në Prishtinë. Që nga kjo datë AKK, theksohet më tej në komunikatë, nuk ka pasur as një informacion në lidhje me procedurat e mëtejme në lidhje me këtë rast, ndërkaq për zhvillimet të cilat janë përmendur tani, AKK nuk ka qenë fare pjesë e tyre. Bazuar në Ligjin kundër Korrupsionit, të gjitha informatat të cilat Agjencia i përcjellë në prokuroritë kompetente janë konfidenciale, dhe në as një mënyrë nuk publikon as emrat e përfshirë dhe përmbajtjen e informacionit. Pasi që ky rast është bërë publik Agjencia është e detyruar të japë sqarimet e lartpërmendura. AKK bën thirrje që të mos tentohet të përdoret politikisht puna e saj në këtë periudhë parazgjedhore, pasi që dëmtohet imazhi i një institucioni shumë relevant për krijimin e shtetit ligjor. Po ashtu AKK i bën thirrje të gjithë mekanizmave, në këtë rast Prokurorisë së Qarkut në Prishtinë, që të respektojnë ligjin dhe punën e institucioneve me të cilat ata bashkëpunojnë. Agjencia vazhdon të jetë e përkushtuar në mbrojtjen e ligjit dhe në përmbushje të misionit që i është caktuar nga organi më i lartë juridik i shtetit, Kuvendi i Republikës së Kosovës.