TRAGJEDIA E TISËS – KONFIRMOHET VDEKJA E ELVIRA JAHËS, 23 VJEÇARE

TRAGJEDIA E TISËS – KONFIRMOHET VDEKJA E ELVIRA JAHËS, 23 VJEÇARE

Familja Jaha nga Podujeva kanë udhëtuar dje drejt Suboticës për të ditur për rastin e vajzës së tyre Elvira Jaha. Babai i viktimës, Vesel Jaha së bashku me djalin e motrës së tij Berat Shabani me të cilin ka kontaktua RTK-ja e ka konfirmuar vdekjen e Elvira Jahës 23 vjeçare – nënë e dy fëmijëve 1 dhe 3 vjeçar, të cilët kanë shpëtuar së bashku me babanë e tyre Blerim Rama.

Mësohet se kryefamiljari i familjes Jaha së bashku me bashkëshortin dhe fëmijët e viktimës tani janë duke u kthyer në Podujevë.
Për viktimën tjetër, identiteti i së cilës deri tani nuk është ditur, sipas burimeve jozyrtare të RTK-së, bëhet fjalë për një femër e lindur më 23.03.1986 në komunën e Vushtrrisë, emri i së cilës është i njohur për redaksinë.
Gjithnjë sipas burimeve jo zyrtare është rrezik se deri sa nuk lajmërohen familjarët, apo institucionet kosovare, trupi i saj të varroset në shtetin e Serbisë. Besohet se viktima e tretë është Brahim Koci.
Policia e Kosovës edhe sot nuk ka dhënë asnjë informacion të ri me faktin se nuk ka zhvillime të tjera.
Ndërkohë, është bërë e ditur se katër të dyshuarit për kontrabandim në rastin “Tisa”, janë nga rajonet e Prishtinës, Pejës, Gjilanit dhe Mitrovicës.
Fletarrestimet për këta katër persona janë lëshuar nga gjyqtari i procedurës paraprake të Gjykatës së Qarkut në Prishtinë.
Personi I cili është vetë-lajmëruar me një grumbull parash në duar, para këto të dhëna nga viktimat e tragjedisë së lumit Tisa, në kufirin serbo-hungarez, është i pesti me radhë.
Megjithëkëtë, i vetëlajmëruari në polici, i cili është gjithashtu nga rajoni i Prishtinës, nuk është arrestuar nga policia dhe i njëjti, pasi ka dhënë deklaratën, është lënë i lirë, deri në ndonjë vendim tjetër të organeve përkatëse.
Hetimet në lidhje me këtë rast është duke i kryer Njësiti Kundër Trafikimit me Qenie Njerëzore të Policisë së Kosovës dhe prokurorëve të EULEX-it.
Për këtë tragjedi, së cilës ende nuk i dihet fundi, dy policët hetues të Policisë së Kosovës, nga dita e diel, janë në Hungari së bashku me prokurorin e EULEX-it, Francesko Mandoi.
Situata e rënd sociale në Kosovë ka vazhduar të detyrojë shumë familje që të marrin rrugën e mërgimit, për të kërkuar një jetë më të mirë, duke mos marrë parasysh edhe rreziqet. Këtë situatë të rëndë janë duke e shfrytëzuar rrjetet kriminale për përfitime të majme. Në rajonin e Ballkanit sipas shumë raporteve këto grupe janë shumë të zhvilluara sidomos ato të trafikimit të qenieve njerëzore.
Edhe Komisioni Evropian në Raportin e progresit në Kosovë, trafikimin e qenieve njerëzore e ka identifikuar si njërin nga problemet e shumta të shtetit më të ri në botë, dhe ka bërë thirrje që të merren masa.