Fanë Rugova: Gazeta “Bota sot” po e mban gjallë idealin e presidentit Rugova

Fanë Rugova: Gazeta “Bota sot” po e mban gjallë idealin e presidentit Rugova




Nga pritja në familjen e presidentit Ibrahim Rugova

Akademik Mark Krasniqi me bashkëpunëtorët e tij Mustafë Halili nga drejtoria për kulturë e komunës së Prishtinës dhe Bajrush Morina redaktor në “Bota sot”, me rastin e 65 vjetorit të lindjes së presidentit të ndjerë Ibrahim Rugova, bënë homazhe te varri i presidentit Ibrahim Rugova dhe u vizituan familjen Rugova. Me këtë rast akademik Mark Krasniqi evokoi kujtime të bashkëpunimit të tij me presidentin Ibrahim Rugova dhe tha se pavarësia e Kosovës mban vulën e presidentit Rugova. Ai ishte ideatori dhe arkitektit i kësaj pavarësie të cilën ne sot po e gëzojmë.
E zoja e shtëpisë Fanë Rugova mirëpriti vizitën e akademik Mark Krasniqit me bashkëpunëtorët e tij dhe falënderoi profesor Mark Krasniqin për këtë vizitë dhe për angazhimin e tij në çështjen kombëtare.
Zonja Fanë Rugova po ashtu gjeti rastin të falënderoi gazetën kombëtare “Bota sot” për kontributin e kësaj gazete në çështjen kombëtare dhe për shkrimet e saja që janë në frymën dhe idealin e presidentit Ibrahim Rugova. “Gazeta kombëtare “Bota sot” është e para gazetë që lexohet në familjen tonë. Kjo është e vetmja gazetë që edhe më tutje po shkruan për presidentin Rugova dhe që po e mban gjallë idealin e presidentit Ibrahim Rugova”, tha znj. Fanë Rugova. Ajo tha se dera e familjes Rugova është gjithmonë e hapur për të gjithë ata që respektojnë dhe e çmojnë veprën dhe aktivitetin e presidentit Ibrahim Rugova. / B. M.