Tiranë: Opozita rinis protestat

Tiranë: Opozita rinis protestat

Kërkohet shkarkimi i drejtorit të lajmeve në TVSH

Protesta e stome e parë e opozitës ishte përballë TV publik shqiptar, e organizuar nga G99. Protestuesit kërkuan dorëheqjen e drejtuesve te TV publik. “TVSH-ja është kthyer në një version elektronik të Rilindjes Demokratike, gazetës së Sali Berishës. Sot, ne me taksat tona jemi duke mbajtur këtë televizion publik shqiptar, që s’është asnjë gjë tjetër përveçse Rilindja Demokratike në televizion. Ne sot kërkojmë shkarkimin e drejtorit të lajmeve dhe aktualitetit, Artur Kopani, ish-kryeredaktor i Rilindjes Demokratike. E ka kthyer TVSH në Rilindjen Demokratike në televizor” tha kreu i G99, Erion Veliaj.
Në anën tjetër Partia Socialiste iu është përgjigjur kryeministrit Sali Berisha për deklaratat e tij qe ligji i antimafias do te preke mafian qe mban peng opozitën. “Sali Berisha nuk mund të luftojë realisht krimin e organizuar pasi është vetë i mbërthyer prej tij. Nuk ka mundësi ky njeri i cili ngriti piramidat dhe rrënoi një popull të tërë, i cili shpërtheu depot e municioneve dhe shkatërroi një shtet të tërë, i cili theu me ndërgjegje të plotë embargon e OKB duke i shitur naftë Milosheviqit, duke tradhtuar një komb të tërë, i cili dhunonte e sulmonte institucionet e shtetit me armë si në 1997 apo 1998, i cili hidhte në erë shtyllat e tensionit të lartë, i cili nuk gjen dorën kriminale që mori jetën e deputetit Fatmir Xhindi, i cili vepron me kufijtë e Atdheut sikur të ishte në pronat e të atit, i cili vepron me pronën private sikur ta kishte të tijën, i cili abuzon çdo ditë me financat publike, të ketë shans të luftojë krimin” tha deputeti i zgjedhur i PS, Ilir Gjoni.
“Sali Berisha korrupsioni ka emër dhe emrat po i themi ne: Çmontimi dhe ndëshkimi i mafies së vërtetë duhet ta fillojë me Shkëlzen, Argitën dhe Jamarbrin, familjarë të Sali Berishës që kanë përdorur pushtetin e babait për afera korruptive, me Fatmir Mediun, Lulzim Bashën dhe Sokol Olldashin” tha deputeti i zgjedhur i PS, Saimir Tahiri.
Opozita ka vendosur të rinisë thuajse çdo dite protestat kundër qeverise me synim hapjen e kutive te votimit ose largimin e qeverise Berisha. (as)