Një vrasje që ka shqetësuar Gjilanin

Një vrasje që ka shqetësuar Gjilanin

Besim Toska, Bota Sot


I vrari i mbrëmjes së përgjakshme të 4 dhjetorit në Gjilan Feriz Qerimi, duke u shoqëruar në Gjykatën Supreme të Kosovës, kur edhe ishte liruar nga akuzat disa muaj më parë.

Krismat e të enjtes mbrëma kanë shqetësuar tej mase qytetarët e Gjilanit. Nga këto krisma është vrarë Feriz Qerimi, një emër ky i njohur për gjilanasit. Por motivet e kësaj vrasje edhe më tutje mbesin enigmë. Por derisa nstitucionet e ndjekjes dhe ato të hetuesisë akoma nuk dinë, apo nuk duan të tregojnë për motivet e kësaj vrasjeje, derisa të kryhen hetimet. burime tona tregojnë se viktima Feriz Qerimi, ka qenë një person i njohur jo vetëm për organet e ndjekjes dhe ato të hetuesisë, por edhe për qytetarët e kësaj ane dhe të cilit ia kanë pas frikën jo vetëm qytetarët. Burime tona anonime, flasin se viktima është vrarë për shkak të krimit të organizuar nga formacione e njësi të ndryshme, duke përmendur edhe lidhjet politike. Disa të tjerë thonë se kjo vrasje mund të ketë lidhje edhe me ngjarjet e fundit që dolën në skenë, disa të tjerë flasin për fajde e rekete. Në organet e ndjekjes dhe ato të hetuesisë tregojnë se viktima ka pasur edhe vërejtje e dosje në këto institucione e të cilat tash për tash nuk bëhen publike. Fahri Nuhiu, prokuror i Prokurorisë Publike të Qarkut në Gjilan, tha për gazetën “Bota sot” se ditën kur ndodhi rasti ishte kujdestar dhe ka dalë në vendin e ngjarjes. Ai tregoi se ka dhënë urdhëresën që të bëhet obduksioni i viktimës në Institutin e Mjekësisë Ligjore në Prishtinë. “Prokuroria së bashku me policinë, jemi duke bërë hetimet. Deri tash absolutisht nuk dihet për dyshimin dhe as për motivin e vrasjes dhe nuk ka të arrestuar”,- tha prokurori Fahri Nuhiu. Ai shtoi se do të punojnë me shpejtësinë më të madhe që të zbulohet rasti. Por edhe zyrtarët e policisë në Gjilan nuk japin njoftime të tjera. “Deri tash nuk dihet dyshimi dhe motivi i vrasjes nga kush dhe cila është arsyeja dhe nuk kemi të arrestuar në lidhje me këtë rast të rëndë. Nuk dihet po ashtu se ky rast është i ndërlidhur me ngjarjet e fundit që kanë ndodhur në Kosovë. Hetimet janë duke vazhduar nga policia dhe prokuroria.”,- tha për gazetën “Bota sot” Ismet Hashani, zëdhënës i policisë së Gjilanit. Ai dha “tregimin” e ngjarjes së ndodhur me 3 dhjetor rreth orës 19 e 30 në rrugën ”Idriz Seferi” te Palestra Sporteve “Bashkim Selishta” në një vend të errët, ku edhe janë dëgjuar të shtëna me armë zjarri. Policisë menjëherë ka dalë në vend të ngjarjes, ku kanë hasur në një veturë –xhip, të markës BMW, ngjyrë e zezë me targa KS, në të cilin vëreheshin disa vrima të cilat dyshohet të jenë bërë nga arma e zjarrit. Në veturë janë gjetur dy persona të lënduar, të qëlluar me armë zjarri nga persona të panjohur. Mjekët ka konstatuar se viktima Feriz Qerimi 33 vjeçar nga Gjilani, ishte pa shenja jete, ndërsa personi i dytë Agim Nuhiu. 36 vjeç, kishte pësuar plagë nga arma e zjarrit në këmbë, ku është trajtuar në Spitalin e Gjilanit dhe është në gjendje të mirë. Në vendin e ngjarjes kanë dal njësiti i hetimeve, prokurori i qarkut dhe ai i EULEX-it, dhe së bashku me policinë kanë intervistuar disa dëshmitarë të rastit.