Mbi 180 gjilanas aderojnë në LDD

Mbi 180 gjilanas aderojnë në LDD



Në vigjilje të dyvjetorit të themelimit të LDD-së, mbi 180 anëtarë të ri, iu kanë bashkangjitur Lidhjes Demokratike të Dardanisë (LDD), dega në Gjilan, gjatë një ceremonie të ndarjes së librezave që ishte organizuar nga Forumi Rinor i LDD-së.
I pranishëm në këtë ceremoni ishte edhe Xhemajl Hyseni nënkryetari i kryesisë qendrore të LDD-së, i cili u shpreh i kënaqur që këta të rinj tani e tutje do të jenë pjesë e familjes së madhe të dardanëve të Kosovës.
Hyseni tha të shtunën se ky është momenti më i mirë që kanë zgjedhur këta të rinj për të aderuar në bazë të një vullneti të lirë, në bazë të një përcaktimi të lirë, në Lidhjen Demokratike të Dardanisë.
“Në vigjilje të dyvjetorit të themelimit të LDD-së, të njëvjetorit të shtetit të pavarur të Kosovës dhe në ditën e Shën Valentinit, ju me dashuri keni vendos të aderoni në një subjekt të fuqishëm politik çfarë është LDD-ja”, u ka thënë anëtarëve të ri, nënkryetari i LDD-së, Xhemajl Hyseni.
Kreu i LDD-së në Gjilan, Jakup Bajrami tha se ndihet mirënjohës ndaj të gjithë të rinjve për kontributin e tyre të dhënë dhe për përfshirjen e tyre në LDD, për të sjellë kontributin e tyre, për të thënë fjalën e tyre, dhe për t’i dhënë kësaj partie të madhe energjinë e brezit të ri.
“Për ne është shumë e rëndësishme që politika dardane të marrë energjinë dhe fytyrën e rinisë, që politika e saj e re të flasë me gjuhën e vajzave dhe djemve që mundohen çdo ditë të krijojnë një jetë sa më të mirë”, ka thënë Bajrami.
Ndërsa, kryetari i Forumit Rinor të LDD-së, Xhemajl Nuredini, tha se ka vetëm një mesazh për rininë që ka aderuar sot në LDD, se ata do të jenë pjesë e një subjekt që ka kuadro dhe intelektual andaj në zgjedhjet e ardhshme lokale së bashku do ta marrin pushtetin.

Bota Sot