Vullnet Mato: ZOGJTË E FJALËVE

nga **Agim Gashi** Mon Feb 15, 2010 6:00 pm

Vullnet Mato: ZOGJTË E FJALËVE 22665_1163900988873_1568334934_30345381_3410171_n

Vullnet Mato

ZOGJTË E FJALËVE

Eh, zogjtë tanë të fjalëve,
zogjtë e bukur të fjalëve tona fluturake,
sa hijeshi kanë kur dalin trumba- trumba
nga foletë e buta të gjuhës gojore
dhe fluturojnë aq të gëzuar e krahëhapur
nëpër kaltërsitë e çuçurimave njerëzore,
duke plapuritur puplat në ajrin e vakur !....

Atëherë të kënaqet shpirti
dhe pranvera lulëzohet
dhe vera freskohet
dhe vjeshta ëmbëlsohet...
dhe dimri zbutet e ngrohet.

Pastaj kur zogjtë tanë të fjalëve bashkohen
dhe vrundullojnë e rrotullohen nëpër qiell bisedash,
me trumbat e tjera të zogjve gojor
që dalin nga gjethet e gjelbërimeve të njoma,
eh, sa kënaqësi të dëgjosh cicërimin,
sepse kur ata qeshin e ngazëllehen,
pranvera qesh e zgjat më tepër vegjetimin,
vera shton në ajër aromën e freskinë
vjeshta mbush shportat me fruta kuqaloshe
dhe dimri nxjerr nga palca e vet ngrohtësinë.

Por oh, kur dalin si nga foletë e plumbta të pushkës,
skifterët e zinj të fjalëve vrastare
dhe na sulmojnë zogjtë tanë të gjuhës
e na i shpuplojnë egërsisht me rrokje mëkatare...
Atëherë edhe pranvera vyshk lulëzimin,
edhe vera than blerimin
edhe vjeshta rrëzon gjethimin
edhe dimri shton akullimin...

Atëherë, kur harbohen skifterët e zinj të pushkës
rënkojnë e trishtohen zogjtë tanë të gjuhës...

Ka pak ditë që edhe mua ma vrau
trumbën e zogjve fluturak të gjuhës,
një skifter anonim i gjuhës skifterore,
që erdhi prej korijeve të gajushës
me ferra dhe shkurre ujërash të ndenjura,
për shkak se i kisha prekur të djeshmen moçalore...

Ah, si m’u vyshk frymëmarrja pranverore,
si m’u tha gjuha nga zagushia verore,
si m’u zverdh fytyra nga mërzia vjeshtore,
si m’u ftoh gjaku nga akullnaja dimërore...

Dhe mendova i heshtur,
se të gjithë zogjtë tanë të fjalëve njerëzore
mund të fluturojnë të qetë
vetëm kur të vijë ajo stinë e madhe paqësore,
me qiellin e kaltërsive të sigurta,
që të zhduket specia e skifterëve të zinj,
bashkë me foletë e errëta nëpër gajusha.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30