Cenzurë në RTK

Cenzurë në RTK


Nga Express më 20.02.2009 në ora 13:41

Asociacioni i Gazetarëve Profesionisë të Kosovës ka reaguar kundër censurës që është duke ndodhur në televizionin publik të Kosovës. Sipas këtij asociacioni, drejtuesit e RTK`së nuk kanë lejuar të transmetohet një takim i mbajtur ndërmjet Sindikatës së Punëtorëve të këtij televizioni dhe Komisionit për buxhet dhe financa si dhe Komisionit për Media.

“Ky lajm nuk është lejuar që të emetohet, pasi në sekondat e fundit para transmetimit ka ndërhyrë Kryeredaktori Sylejman Shaqiri me urdhër të menaxhmentit të lartë të RTK-së, dhe e ka hequr nga lista e lajmeve, pa dhënë shpjegime për këtë ndërhyrje e cila është dënuar ashpër nga SPP e RTK-së”, thuhet në reagimin e këtij asociacioni, kryetar i së cilës është Mentor Shala, i cili mbanë pozitë të lartë në RTK.

AGPK po ashtu shpreh shqetësimin për censuren që po rritet përditë e më tepër në këtë
institucion, i cili po përballet krahas vështirësive financiare edhe me presione e shantazhe të ndyshme.

“AGPK kërkon nga menaxhmenti i RTK që të japë sqarime për këtë censurë, e cila ka dëmtuar interesat e punëtorëve të RTK-së. Po ashtu, AGPK kërkon fuqishëm që t`i përmbahet standardeve dhe etikës profesionale dhe rregulloreve të punës së këtij mediumi dhe të jetë në shërbim të qytetarit të Kosovës, që është mision por edhe obligim i këtij mediumi, pasi që ekzistenca e tij varet nga të hollat që ndajnë çdo muaj qytetarët e Kosovës”, thuhet më tej në reagimin e AKPK`së.

Ky asociacion ka paralajmëruar se këtë shqetësim do ta ngritë edhe tek të gjitha ambasadat ndërkombëtare të vendosura në Prishtinë, por edhe te gjithë donatorët që kanë ndihmuar dhe kanë bërë të mundur ekzistencën dhe zhvillimin e këtij mediumi.