"Një ngjarje tepër e bukur"

nga **Agim Gashi** Sat Feb 21, 2009 11:19 pm

"Një ngjarje tepër e bukur"

Regjisorit dhe aktorit Mevlan Shanaj i akordohet urdhri "Mjeshtër i Madh"

Regjisorit dhe aktorit Mevlan Shanaj i është akorduar dje titulli "Mjeshtër i Madh". Ceremonia e rastit u zhvillua në sallën "Black Box" të Akademisë së Arteve. Mes miqsh, të ftuarish, kolegësh e bashkëpunëtorësh, Shanajt iu dorëzua titulli i nderit. Me motivimin "I jepet urdhri ‘Mjeshtër i Madh‘ për kontribut të vyer në televizionin dhe kinematografinë shqiptare, nëpërmjet realizimit me nivel të lartë e origjinalitet të shumë filmave e roleve artistike", Presidenti Bamir Topi ia kishte akorduar këtë urdhër artistit që prej disa ditësh, më 5 shkurt 2009. Vetë regjisori e ka vlerësuar këtë titull si "një ngjarje tepër të bukur". "Për mua, ky është vlerësim i një rruge të gjatë gati 40-vjeçare në ekran e film, të cilën e nisa me shumë dashuri dhe e vazhdoj edhe sot", u shpreh regjisori dhe aktori Shanaj, duke shprehur mirënjohje për të gjithë bashkudhëtarët e tij dhe publikun që e ka përkrahur dhe nxitur të ecë. Krijimtaria e Shanajt në televizion e kinematografi është e gjerë dhe e shumëllojshme. Janë të shumtë filmat në të cilët ka interpretuar apo që ka drejtuar. Kështu mund të përmendim filmat: "Lule të kuqe, lule të zeza", "Unë e dua Erën" (aktor), "Fletë të bardha" (regjisor), "Një telegram, një këngë" (regjisor), "Korrierët" (regjisor), "Rrethimi i vogël" (aktor), "Ballë përballë" (aktor), "Rrugicat që kërkonin diell" (aktor), "Guximtarët" (aktor), "I teti në bronz" (aktor) etj. Së fundmi ka realizuar dy dokumentarë, një në përkujtim të figurës së artistit Vangjush Furrxhi, "Përcjellja", i shfaqur edhe premierë në kinema, si dhe një tjetër dokumentar të realizuar në nëntorin që sapo shkoi për 100-vjetorin e Kongresit të Manastirit. Në pranverën e këtij viti pritet të nisin xhirimet për një film artistik me regji të Joni Shanajt (djali i artistit), ku Mevlan Shanaj është producent. Artisti i Merituar, tani edhe "Mjeshtër i madh", regjisori dhe aktori Mevlan Shanaj, ka lindur në fshatin Ngraçan të Mallakastrës, më 7 shkurt 1945. Pasi ka mbaruar Politeknikumin Mjekësor, gjatë viteve ‘63-‘65 ai ka punuar si ndihmësmjek, për të fituar më pas të drejtën e studimit për në Fakultetin e Mjekësisë. Gjatë kësaj periudhe, Mevlani arriti të kuptojë se rruga që dëshironte të përshkonte nuk ishte mjekësia, por arti.

Ai vendos të heqë dorë përfundimisht nga mjekësia dhe në vitin 1965 i drejtohet shkollës "Aleksandër Moisiu". Katër vjet më vonë ai interpreton për herë të parë një rol në filmin "I teti në bronz", film të cilin edhe sot e kësaj dite Mevlan Shanaj e kujton me nostalgji. Mevlan Shanaj mbetet ndër emrat më të njohur të kinematografisë shqiptare. Ai vazhdon të ketë një aktivitet të gjerë artistik, sidomos në prodhimin e filmave të rinj dhe në sferën akademike.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30