Vullnet Mato: TËRHEQJA MAGNETIKE

nga **Agim Gashi** Fri May 14, 2010 10:13 am

Vullnet Mato

TËRHEQJA MAGNETIKE

Ekziston një tërheqje magnetike,
herë e lehtë, herë e fuqishme,
me të cilën loja e “të madhit” të bën për vete,
të rrëmben ndjeshmërisht,
në turmën e tifozëve me duartrokitje frenetike,
të bën simpatizant e më pas militant
të diktatit që ushtron.
Atëherë edhe fjalët boshe,
premtimet e bujshme,
të përkëdhelin, të trullosin,
të bëhen verbërisht të besueshme.

Po kur foljet në kohën e ardhshme shumohen
me përsëritjen e kumteve të dëgjuara mijëra herë,
dhe krijesat e fjalëve
nuk duken askund për ty e për të tjerë,
sepse ai i trupëzon tek vetja e vet;
kur ëndrrat e bukura
mbeten përgjithmonë iluzione të humbura,
atëherë ndjen se pak nga pak
ke filluar largimin e pandërprerë prej tij
dhe në vend të shkëlqimit të yllit ideal,
sheh puhinë e errët të një mjegullnaje gri.

Sakaq ai, apo ata bashkë me të,
shpesh kujtojnë se të kanë nën sqetull
në tufën e qimeve të rreshtuara,
plotësisht të dominuar
prej aromës dehëse të djersës;
ndërsa ti ke ikur përgjithmonë
dhe të duket vetja
sikur ke rënë nga nënsqetulla e urryer
si qimja me rrënjë të dobësuar,
e paushqyer dhe e zhgënjyer.
që s’mund të ngulesh më
në poret e lëkurës së tjetrit.
Dhe thua : Sa mirë do të ishte,
sikur qysh në krye të herës
të mos kisha pranuar
tërheqjen magnetike të lëkurëdreqit...

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30