Dibran Demaku: Dy gjysmat

nga **Agim Gashi** Wed May 19, 2010 11:55 am

DY GJYSMAT

Nga Dibran Demaku

Këtu e tridhjetë vite më parë një mik imi poet e pat shkruar një poezi shumë interesante për atë kohë.Ai në poezinë e vet që tash më kujtohet vetëm si ide(vargjet i kam harruar),miku im poet thonte se një gjsëm dhe një gjysëm pike bëjnë një pikë.Dhe në mes vargjeve të poezisë kishte vizatuar dy gjsma që kur i bashkonte ato të dyja krijonin një pikë.Ideja e asaj poezie atëherë kishte të bënte me dy gjysmat e atdheut të ndarë të shqiptarëve e që ishin Shqipëria e Kosova.Ato ishin dy gjysëm pikash të ndara dhe kur bashkoheshin përbënin një pikë.Kështu autori i poezisë i bashkonte të dy pjesët e ndara të atdheut në një pikë.Ishte koha kur edhe të ëndërroje një bashkim të tillë të Shqipërisë me Kosovën,do të bëje herezinë më të madhe.Dhe e tërë kjo për shkaqe historike që dihen:Kosova ishte e pushtuar nga një shtet tjetër e që quhej Jugosllavi,ndërkaq Shqipëria për shkaqe ideologjike sikur e kishte zënë peng vetëvetën.

Dhe miku im poet atë poezi e pat botuar në një gazetë të Prishtinës.Ai gëzohej që kishte arritur ta botonte atë poezi,edhepse thënë të drejtën mesazhin e asaj poezie e dinim vetëm një grup i vogël krijuesish që kishim shoqëri me poetin e poezisë në fjalë.Ndërkaq njëri nga miqët tanë(edhe ai poet) ankohej në atë kohë se ideja e asaj poezie kishte qenë e tij,por ai tjetri ia kishte vjedhur.Falë kësaj ata të dy për një kohë të gjatë nuk patën folur e as komunikuar në mes vete.Por,e shkuar e harruar siç thotë populli.

Në këtë pasdite maji të vitit të dhjetë të shekullit në vijim seç m`u kujtuan ato dy gjysma pikash që siç e cekëm edhe më lart simbolizonin dy pjesët e atdheut të ndarë.Atëherë bashkimin e tyre e ëndërronim duke shkruar poezi me simbole e metafora që rrallë kush i kuptonte.Vetëm se për fat të keq këto gjysmat kombin tonë sikur e përcjellin vazhdimisht nëpër shekuj.Siç kemi mësuar nga historia gati në çdo luftë a përpjekje për liri nga armiqtë shumëshekullor,kombi ynë ishte i ndarë në dy gjysma,mu si në poezinë e mikut tim poet.Njëra pjesë e kombit luftonte për liri dhe pëleshej për jetë a vdekje me armikun,ndërkaq pjesa tjetër bënte sehirë dhe llogari se kush do të fitonte dhe pastaj t`i bashkohej fitimtarit,qoftë ai edhe armik dhe pushtues?!(Së paku kështu e gjejmë sot të shkruar nëpër librat tanë të historisë).

Dhe jo vetëm kaq.Kombi ynë edhe në liri si në Shqipëri ashtu edhe në Kosovë vazhdon të jetë i ndarë në dy gjysma që e refuzojnë njëra tjetrën dhe nuk arrijnë kurrë në një pikë si në poezinë e mikut tim poet.

Në zgjedhjet e fundit parlamentare të Shqipërisë që u mbajtën në fund qershor të vitit të kaluar,këto dy gjysma të kombit edhe njëherë u ndeshën me ashpërsinë më të madhe!Kombi shqiptar i Shqipërisë paradoksalisht me votën e vet,vendin e ndau në dy gjysma të barabarta,gjysma këto që në vend se të bashkohen dhe të punojnë për të mirën e atdheut dhe të kombit ato refuzohen gjer në armiqësi?!Dhe e tëra kjo në një të ashtuquajtur demokraci!

Në zgjedhjet e fundit si e djathta ashtu eshe e majta shqiptare fituan vota të barabarta.Dhe sikur Meta me partinë e tij mos t`i bashkonte votat e tij me të djathtën shqiptare(këtu për të mirën e kombit dhe të vendit),vendi do të duhej të shkonte sërish në zgjedhje të reja.Dhe pikërisht pse Meta si i majtë u bashkua me të djathtën shqiptare,plasi sherri.Në fillim Rama dhe partia e tij socialiste,votat dhe rrjedhimisht deputetet e partisë së Metës i numëronte si të vetat dhe ishte i bindur se në atë pat pozicion që ishte krijuar pas zgjedhjeve,i pranoi rezultatet e zgjedhjeve i bindur se në këtë mënyrë vendi do të duhej të shkonte në zgjedhje të reja.Por,kur Meta me partinë e tij ju bashkua Partisë demokratike të Berishës dhe krijuan qeverinë e re,Rama dhe partia e tij zgjodhën strategji tjetër.Vendosën që mos t`i pranojnë rezultatet e shpallura dhe të konfirmuara nga Komisioni qendror zgjedhur,me akuzen se Berisha dhe Meta i kanë vjedhur votat.

Dhe ky avaz vazhdon tash sa muaj.Ai tash sa muaj e ka ngritur në këmbë partinë e vet dhe simpatizantët në protesta të lloj-llojshme.E së fundi edhe në grevën e urisë!

Sot gjysma e Shqipërisë punon dhe bën përpjekje që vendin ta afrojë sa më shumë me Bashkimin Europian,ndërkaq gjysma tjetër proteston!Ajo gjysma protestuese i zë rrugët dhe sheshet e kryeqytetit dhe as që do të ia dijë se me këto veprime i bënë dëme të pariparueshme kombit dhe atdheut.Ndërkaq gjysma udhëheqëse bënë sehirë dhe nuk ndërmerr asnjë iniciativë që kjo krizë e rëndë e politikës shqiptare të zgjidhet!Të dy gjysmat qëndrojnë fort pa kërkesave të veta duke pritur se cila do të lëshojë pe e para për ndonjë kompromis të mundshëm dhe të domosdoshëm.Secfila shpreson se pala tjetër do të jetë e detyruar të lëshojë pe e para.Dhe kështu vendi dëmtohet politikisht dhe ekonomikisht!

Gjysmat e poezisë së mikut tim poet dikur u bashkuan dhe formuan një pikë,ndërsa gjysmat e politikës shqiptare asesi të bashkohen në një pikë për të mirë të atdheut dhe kombit.

Mon	Tue	Wed	Thu	Fri	Sat	Sun
					1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29	30