Konfirmohet njohja e pavarësisë së Kosovës nga Katari

nga **Agim Gashi** Tue Sep 07, 2010 10:24 am

Konfirmohet njohja e pavarësisë së Kosovës nga Katari

Kryeministrit Hashim Thaçi i është konfirmuar njohja e pavarësisë së Kosovës nga Princi i Katarit Sheik Abdullah bin Khalifa Al Thani. Ai ka deklaruar se vendimi zyrtar është çështje e procedurave formale që do të përmbyllen së shpejti.
Gjatë një interviste për Radio Televizionin e Kosovës, Kryeministri Thaçi pohoi se njohje për shtetin e ri së shpejti do të vijnë edhe nga Kuvajti dhe Omani.
“M'u konfirmua nga Kryeministri i Katarit dhe po ashtu edhe nga Princi se çështja e njohjes së pavarësisë është e kryer. Tani vetëm pritet që kjo çështje të formalizohet sipas procedurave që ka Katari”, ka thënë Thaçi.
Për vizitën e parë të delegacionit të Kosovës, Mbreti i Katarit ka shtruar një darkë, ka njoftuar Agjencia e lajmeve e Katarit QNA.
“Bisedimet gjatë takimit kishin të bëjnë me bashkëpunimin e përbashkët dhe mjetet për forcimin e këtij bashkëpunimi në shumë fusha. Një varg çështjesh tjera të interesit të ndërsjellë, rajonale dhe ndërkombëtare, po ashtu janë diskutuar”, ka raportuar QNA. Kryeministri Thaçi ka pasur takime edhe me Kryeministrin dhe Ministrin e Jashtëm të Katarit si dhe me ambasadorë të disa vendeve perëndimore në Doha.
Gjatë qëndrimit në Katar, kreu i Qeverisë së Kosovës ka vizituar të hënën muzeun e artë në kryeqytetin Doha.
Kryeministri Thaçi gjatë kësaj vizite u shoqërua nga Ambasadori i Kosovës në Arabinë Saudite, Rexhep Boja dhe këshilltarët e tij politikë.
Ambasadori Boja e ka vlerësuar vizitën e Thaçit në Katar si shumë të rëndësishme, sidomos në aspektin e lobimit. Katari është vend arab në Lindjen e Mesme, me popullsi 77 për qind myslimane, ndër vendet më të pasura në botë, me rezerva të mëdha të naftës dhe gazit.
Nga Katari, Kryeministri Thaçi do të udhëtojë sot për në New York, për t’iu bashkuar delegacionit shtetëror të Kosovës, Presidentit Fatmir Sejdiu dhe Ministrit të Jashtëm, Skënder Hyseni. Atje do lobohet kundër rezolutës serbe dhe për njohje të reja për shtetin e ri.

BOTA SOT

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30