Dita DioGuardi

nga **Agim Gashi** Tue Nov 02, 2010 12:16 pm

Dita DioGuardi

Editoriali

Dita e sotme është ditë e veçantë për Amerikën, prandaj është ditë e veçantë për mbarë botën, sepse të gjithë, anembanë globit ndjekin procesin e votimeve të ndërmjetme amerikane, prej nga priten ndryshime të ndjeshme në legjislativin amerikan, me ndikim në politikën amerikane, prandaj edhe botërore. Dita e sotme është, veç të tjerash, Dita DioGuardi. Prandaj 2 nëntori 2010 mbetet ditë historike dhe datë historike e veçantë për shqiptarët. Për herë të parë në histori një amerikan me gjak shqiptar në damarë konkurron për në Senatin e Shteteve të Bashkuara të Amerikës. Është ky një tjetër primat (rekord) që do ta mbajë i njëjti njeri, shqiptaroamerikani me prejardhje arbëreshe Joe Dioguardi. Ndërkohë Dioguardi mban primatin (rekordin) tjetër, se ka qenë dy herë radhazi anëtar i Dhomës së Përfaqësuesve në Kongresin Amerikan. Do të ishte një privilegj tejet i drejtë dhe tejet i merituar për politikanin e madh shqiptaroamerikan që të jetë mbajtësi i të dyja rekordeve, të jetë kampioni i padiskutueshëm, frymëzuesi i të gjithë shqiptarëve të cilët duan të bëjnë karrierë politike në Amerikë dhe përgjithësisht në Perëndim. Nëpër një rrugëtim të pazakonshëm, duke arritur të triumfonte në primaret (zgjedhjet paraprake) pa pasur përkrahjen zyrtare të Partisë Republikane, duke u bazuar vetëm në përkrahjen e krahut konservator amerikan, DioGuardi arriti të kualifikohet në garën për Senator në Nju Jork. Për muaj e muaj të tërë, DioGuardi u tregua energjik, i palodhur, argumentues i pakundërshtueshëm, duke i kaluar me sukses të plotë e spektakolar të gjitha etapat e fushatave, duke komunikuar në mënyrën më të shkëlqyer me publikun, si në tubimet anembanë rajonit, ashtu në debatet mediatike, si dhe në komunikimin e ngushtë nëpër familjet dhe bizneset e përkrahësve të tij, nëpërmjet bisedave të ngrohta e të çiltra edhe në rrugë. Vajtja e Joe DioGuardit, ashtu si ai e ka theksuar shumë herë në fushatën e tij, duke e shndërruar në një kryefjali të fushatës së tij, do t'ia jepte Senatit të SHBA një përmasë të fortë të cilën nuk e ka pasur, do t'ia jepte përmasën e financierit, e cila i ka munguar aq shumë legjislativit amerikan. Vetëm një vizion prej financieri të talentuar e të suksesshëm si vizioni i DioGuardit, ashtu siç ka theksuar ai gjatë gjithë garës, do ta ndihmonte Amerikën të dilte nga kriza, do ta ndihmonte atë në rolin e pazëvendësueshëm të lideres botërore, do ta rikthente ëndërrën amerikane tek të gjithë qytetarët amerikanë, në radhë të parë tek zgjedhësit e DioGuardit, në rajonin e tij në shtetin e Nju Jorkut, një nga më të rëndësishmit në SHBA. Ky rajon është edhe rajoni që e ka lindur dhe rritur politikanin e madh e të talentuar, çka e bën DioGuardin njohësin më të thellë dhe më ekspert, të interesuarin më të çiltër për përparimin e rajonit. Fatmirësisht rajoni është i banuar gjerësisht nga popullsia shqiptare, nga radhët e së cilës ka dalë përfaqësuesi i tyre më i përkryer, Joe DioGuardi. Prandaj pritet që vota shqiptare të shkojë pikërisht tek biri shqiptar, tek kolosi shqiptar i politikës amerikane Joe DioGuardi, tek themeluesi i lobizmit amerikan për çështjen shqiptare, në radhë të parë për çështjen madhore dhe të shenjtë të Kosovës. Prandaj Dita DioGuardi do të jetë një ditë tejet e gjatë si për zotërinë Joe DioGuardi dhe për shtabin e tij zgjedhor, ashtu edhe për të gjithë shqiptarët, veçanërisht për ata të Nju Jorkut dhe të Amerikës, por edhe për të të tjerët kudo që ndodhen. Ne i urojmë nga zemra zotëri DioGuardit që dita e sotme të jetë një ditë historike e lavdishme sa për zotëri DioGuardin aq edhe për të gjithë shqiptarët.

Bota Sot

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30