Pse serbët janë më aktiv në politikë sa i përket Kosovës?

Takim me Obaman
Boris Tadic paralajmëron një takim me Presidentin e ri amerikan Barack Obama dhe nevojën e Serbisë për marrëdhënie më të afërta me SHBA’në.

Nga Express më 11.03.2009 në ora 17:30

Presidenti i Serbisë, Boris Tadic, ka paralajmëruar se shumë shpejt do të takojë udhëheqësin e ri të SHBA’së, Barack Obama.

“Jam i sigurt se unë shumë shpejt do të takohem me Presidentin Obama për të diskutuar jo vetëm marrëdhëniet tona bilaterale, por gjithashtu edhe perspektivat në rajonin tonë”, ka thënë Tadic, duke folur në një forum të punëtorëve spanjollë në Madrid, gjatë vizitës së tij dyditore në Spanjë.

Drejtuesi serb ka thënë se Serbisë i duhet të hapë një kapitull të ri me SHBA’në. “Neve na duhen marrëdhëniet më të mira të mundshme me SHBA’në, sepse pa bashkëpunimin e SHBA’së nuk ka paqe ose demokraci në Ballkan”, është shprehur Tadic.

Ai ka përsëritur se integrimi europian dhe mbrojtja e integritetit territorial janë prioritete shtetërore serbe.

Duke e nënvizuar rëndësinë e integrimit të Serbisë në bllok, ai ka thënë se pa integrimin e saj Europë nuk ka stabilitet në Europën Jug-Lindore.

“I tillë është pozicioni gjeopolitik i shtetit tim”, është shprehur Tadic. “Serbia është shteti qendror në Europën Jug-Lindore dhe serbët jetojnë në të gjitha shtetet që e kufizojnë atë”.

Ai ka përsëritur se Serbia nuk do ta lë Kosovën të ndahet sepse kështu do të lejojë edhe thyerjen e parimeve të së drejtës ndërkombëtare që garantojnë integritetin e shtetit.

“Në ato kushte, çdo lëvizje separatiste do të synojë formimin e shtetit të vet të ri”, ka thënë Tadic.

Presidenti serb ka thënë se 10 vjet që kur kishte filluar bombardimi nga NATO, Serbia është me afërt me qeveritë e vendeve anëtare duke shtuar se do të duhej zhvilluar debat demokratik rreth mundësisë që Serbia t’i bashkohet aleancës ushtarake perëndimore.