LB kundër emërimit të shkollës “Ibrahim Rugova”

LB kundër emërimit të shkollës “Ibrahim Rugova”


Nga Syzana Frrokaj më 11.03.2009 në ora 15:29

Dega e Lëvizjes për Bashkim (LB) ka reaguar ndaj vendimit te Kuvendit Komunal të Kastriotit, për emërimin dhe riemërimin e shkollave, palestrës sportive dhe ngritjes së busteve

Kuvendi Komunal i Kastriotit, në mbledhjen e mbajtur më 25 shkurt 2009, në bazë të ligjit të vetëqeverisjes lokale ka vendosur që emri i shkollës fillore “Pandeli Sotiri” në Kastriot të bartet në shkollën në ndërtim në Kastriot të Vjetër, ndërsa kjo shkollë të emërohet “Dr. Ibrahim Rugova”.

Dega e LB-së konsideron se këshilltarët kastriotas, me këtë vendim, ka bërë gabim të rëndë, i cili nuk është në pajtim me ushtrimin demokratik të pushtetit të deleguar nga ana e qytetarëve të kësaj komune.

“Ndërrimi i emrit të një pishtari të arsimit shqip, me emrin e një politikani nuk mund të konsiderohet ndryshe, pos si emërim politik. Një emërim i tillë, bazuar në tekat individuale a të një grupi, nënkupton që kjo mund të ndodhë sa herë që ndërrohen grupet e qeverisjes së komunës”, thuhet në një reagim të kësaj dege, dërguar medieve.

Në mbledhjen e fundit, KK i Kastriotit, ka vendosur gjithashtu që në sheshin e lirisë të ngrihet busti i Aziz Krasniqit - Zhilivodës; te rrethi i qytetit, në afërsi të hekurudhës, të ngrihet busti i dëshmorit të kombit Fahri Fazliu, si dhe që në parkun e qytetit, para Shtëpisë së Kulturës, të ngrihet busti i Nënës Terezë.

Sipas LB-së, të gjitha pikat e vendimit janë në kundërshtim me aktet normative të vetë komunës, ndërsa pika për ndërrimin e shkollës është edhe në kundërshtim me udhëzimet administrative të Ministrisë së Arsimit. Sipas këtij udhëzimi, Këshilli i shkollës i bën kërkesë Drejtorisë Komunale për Arsim me më se paku tri propozime, e kjo pastaj kërkesën e kompletuar ia dërgon MASHT-it për emërim ose riemërim të shkollës.

“Pra, çështja e ndërrimit të emrave të shkollës as që mund të shtrohet në kuvendet komunale. Ndërsa, për emërimin e shesheve dhe palestrës, sipas ligjit dhe statutit komuna është dashur t’i pyesë qytetarët nëpërmjet ndonjë forme të organizuar”.

Kjo parti akuzon këshilltarët për papërgjegjësi që votojnë vendime në kundërshtim me aktet normative të Komunës.