Ftesë nga "Buzuku"!

I/e nderuar,



Ju ftojmë të merrni pjesë në veprimtarinë e parë, në kuadër të “Festës ndërkombëtare të Frankofonisë”, kushtuar librit të Tzvetan Todorov-it “Fryma e iluminizmit”, ditën e hënë, më 16 mars 2009, duke filluar në ora 11, në amfiteatrin e Bibliotekës Kombëtare dhe Universitare të Kosovës.

Në panel do të jenë të pranishëm profesori i filozofisë nga Universiteti i Sofjes, z. Vladimir Gradev, z. Masar Stavileci, njohës i shkëlqyer i iluminzmit, z. Kadri Metaj, nga departamenti i filozofisë i Universitetit të Prishtinës dhe përkthyesi i librit, Belgzim Kamberi.

Pjesëmarrja Juaj na nderon!





BUZUKU

Zyra e promovimeve

Anemona Zeneli





Dy fjalë për librin:



«Fryma e iluminizmit» e Tzvetan Todorovit po shfaqet para lexuesit shqiptar në kohën e duhur, kur edhe shoqëria kosovare po bën hapa vendimtarë të bëhet pjesë e integrimeve euroatlantike. «Fryma e iluminizmit» shpalos vlerat evropiane si racionalizmi, të drejtat e njeriut, liria, barazia gjinore, laicizmi, pluralizmi... Janë këto vlera dhe arritje të iluminizmit, si krijesa më me vlerë e Evropës, sepse pa të sot as Evropa, as bota nuk do te ishin këtu ku janë. Libri i Todorovit, përmes një qasjeje mbresëlënëse riaktualizon debatet mbi projektin madhor të iluminizmit, arritjet dhe iluzionet e kësaj lëvizjeje filozofike, kulturore dhe politike të Evropës dhe mendësive të saj. Ky projekt ishte një nga ndërmarrjet më gjithëpërfshirëse për emancipimin e njeriut, të bazuar në arsyen dhe përvojën njerëzore, në sovranitetin e individit dhe të popullit. E veçanta e «Frymës së iluminizmit» lidhet me idenë se mbrojtja e lirisë së individit kërkon njohjen e dallimit midis faktit dhe interpretimit, shkencës dhe opinionit, të vërtetës dhe ideologjisë. Iluminizmi mbetet aktual edhe lidhur me sfidat e sotme si globalizmi dhe identiteti, terrorizmi dhe rreziku që feja civile të zëvendësohet nga feja politike; media dhe pushteti, pushteti material dhe ai shpirtëror... (Kadri Metaj)



Kush është Tzvetan Todorov?



Tzvetan Todorov (1939, Sofje) është eseist, historian, filozof dhe teoricien i letërsisë. Me origjinë bullgare, Todorov nga viti 1963 do ta ketë ‘atdheun’ e ri, Francën dhe nënshtetas i saj qysh më 1973, tri vjet pasi qe bërë doktorant. Fillimisht teoricien i letërsisë, nga 1980-ta do t’iu përkushtohet historisë së ideve, çështjeve të kujtesës, ndryshimeve të mëdha të njerëzimit që nga pushtimi i Meksikës deri tek kampet e përqendrimit të totalitarizmave. Kontribuoi në përkthimin e formalistëve rusë (1965), të cilët kishin ndikuar aq shumë në poetikën e kohës. Eseu Letërsia dhe shenjat (1967) e bëri atë një pionier të rilindjes së retorikës, ndërsa tek Hyrje në letërsinë fantastike (1970) ai do të analizojë në mënyrë shteruese gjininë letrare - letërsinë fantastike. Reflektimet e mëvonshme të Todorovit përqendrohen kryesisht në shkarjet, sidomos të çështjeve midis «neve» dhe të «tjerëve» në diskutimet e humanistëve të Evropës nga koha e zbulimeve të Botës së Re, gjatë procesit të kolonizimit, apo në rrjedhat e shek. XX… Tzvetan Todorov është ftuar, në cilësinë e profesorit, nga shumë universitete amerikane: Nju-Jorkut, Harvardit, Kolumbisë, Jelit, Kalifornisë... «Fryma e iluminizmit» vjen në gjuhën shqipe pas pritjes së ngrohtë që iu bë kohë më parë, nga lexuesi ynë, librit «Letërsia në rrezik», botuar po ashtu nga «Buzuku».