Poezi nga Beqir MUSLIU

nga **Agim Gashi** Wed Feb 02, 2011 10:07 pm

Poezi nga Beqir MUSLIU

BARIU I DEÇANIT
(Frymëzim nga pikturat e Ibrahim Kodrës
komponuar në Deçan, verë e vitit 1969)

Ngutu, nëpër atë urtësi të drurit, shtegtar i lodhur
në fundin e përrallës që nuk është më përrallë
- druri e hëngër bariun me fyell në dorë
që ngarendte kah ato kope të çetuara përtej ditës
kurse peizazhi që po krijohet nga gjethi i mbetur
prej vjeshtës së vjetme u shndërrua tanimë në zjarr!
Vraponi, o fëmijë, që po luani me pyllin
që ndezej nëpër atë përrallë
që nuk është më përrallë, por – vetëm heshtje që e krijoi
atë njeri që e hëngrën urtësitë e drurit dhe pylltari
që u ngul në pushkën e vet për nder
të trëndafilit që do të lulëzojë
Shtegtarë, në majë të ditës shkoi poeti për t`u varur!
Duhet të ndërrohet kjo ditë vetëm brenda kësaj kënge!

*
E sollën një piktor në ditën që u shndërrua në një mollë
tani fëmijët e padjallëzuar ngarendin që ta grimcojnë
si planetin, si ëndrrën, si fëmijërinë e tyre që merr
edhe atë paqe që e ruajnë nën gishta; dhe shkelin tokën
edhe këtë pikturë të verës që bariu me fyell në dorë e kërkon
ndër përralla e përralla atë Qytet ku do të dalë
i barazuar me atë magji që e pa njëherë gjersa u shikua
me diellin e varur nëpër shuplakat e pishave
ndërsa legjenda e mbylli prapa kapakëve të librit të vet:
Shtegtar, ngutu e shpëtoje atë dru që e hëngër bariun
i cili po përkundet në qetësinë e barit që po zhduket
në peizazhin që do të zgjohet në një dorë magjike
dhe do t`i mbyllë të gjithë rrathët që do ta shkurtojnë
atë fantazi të butë që po endet nëpër drunjtë e gjallë
e ndoshta ajo do ta shpëtojë bariun e ëndërruar të verës!
Dita po e grimcon atë kokërr mollë në dorën e fëmijës!

*
Ku mbeti Nusja e Deçanit që fliste për engjujt e zinj
që thoshte se krejt pishat mund t`i përbironte
nëpër gishtat e saj që i bleroheshin
sa çel e mbyll sytë: ah, cili është ai dhëndër në rroba
të gjetheve që do të bien në natën e gjerdekut të saj
cila është ajo kullë që do t`ua hapë dyert udhëtarëve të humbur
Në majë të pishës dielli përgatit lojën e vet
o kush foli aq shumë për magjinë e trilluar
e cila zogun e zuri fjetur në verën e dashur që i zhdukej
bashkë me ëndrrën që ndërtonte çerdhen në syrin-magji
pra: do të ndërtohet kjo kullë ai zog ajo dashuri – sa çel
e mbyll sytë: o ku mbeti ai dru që e hëngri
Bariun e Deçanit që rrinte dhe fliste vetëm me gjuhën
e magjisë me gjuhën e zogut në një vizatim që e harroi
dita në Blokun e Ibrahim Kodrës
Ai dhëndër në rroba gjethesh po kthehet në vjeshtë!

*
Zogu që foli për ditën e sharruar në atë magji
Hapi tëra dyert e ditës: piktorin po e ndëshkon syri i tij!
që e krijuan ngjyrat gjersa i përshkoi
prapa dyerve të ditës: o në cilën ujëvarë u mbytën thneglat
në Bistricë ndoshta do t`ia gjejnë emrin edhe kësaj luleje
dhe këtij fyelli që rastësisht hyri në këtë Blok të ditës
ku me siguri do të krenohet ai bari me vizatimin e syrit të tij
që shkon edhe përtej bjeshkës që na pengon edhe ne
të shikohemi edhe për atë fyell që me të i zgjon barërat
e fjetura të kohës dhe dashurisë së balsamosur ndër kohë
dhe për atë gjuhë që cicëron aq bukur dhe aq ëmbël –
si bilbilat që kanë mbetur në mesditën e murrme të heshtur
Por: cili do të shkruajë këngën apo baladën për atë dru
të urtë që hëngër bariun me fyell në dorë s`di në cilin qytet e pyll
Shtegtarë, ngarendni dhe kërkojeni në këtë vizatim të ditës!

Botuar në “Zëri i rinisë”, nr. 29, 11 tetor 1969

BEQIR MUSLIU (1945 – 1996)

Beqir Musliu u lind më 11.VI.1945 në Gjilan. Shkollën fillore dhe të mesme i kreu në vendlindje. Studioi Gjuhën dhe Letërsinë Shqipe në Fakultetin Filologjik të Universitetit të Prishtinës.
B. Musliu një kohë të gjatë punoi gazetar e redaktor i rubrikës së kulturës i revistës „Zëri i rinisë“, redaktor përgjegjës i revistës letrare „Plejada“, pastaj redaktor i të përdyjavshmes për kulturë, art e letërsi „Fjala“ dhe së fundi i të përdymuajshmes letare „Jeta e re“.
B. Musliu vdiq më 24.VI.1996 në Prishtinë dhe u varros të nesërmen në Gjilan.

B. Musliu ka shkruar poezi, prozë, dramë; është marrë me kritikë latrare, teatrore dhe me eseistikë e publicistikë të një spektri të gjerë. Pjesë të ndryshme nga vepra letrare e tij janë botuar ndër antologji e forma të tjera të paraqitjes, sidomos të inskenuara në teatër apo të transmetuara në radio e televizion. Këtu po veçoj librin e zgjedhur të poezisë: „Libri i Anatemave“ („Rilindja“, Prishtinë, 1987).
Poashtu pjesë nga vepra letrare e B. Musliut janë përkthyer në gjuhë të ndryshme: serbokroatisht, frëngjisht, anglisht, spanjisht, italisht, arabisht, gjermanisht, hungarisht, rumanisht, turqisht, sllovakisht etj. në ç`mes duhet përmendur librin e përkthyer serbokroatish nga Mirko Gashi: „Drvene ruže “(„Jedinstvo“, Prishtinë, 1974).

Beqir Musliu ka botuar librat:

poezi:
1. „Rima të shqetësuara“ („Jeta e re“, Prishtinë, 1965)
2. „Lulëkuqet e gjakut“ („Rilindja“, Prishtinë, 1966)
3. „Skënderbeu ose shqiponja e maleve“ - kurorë sonetesh („Jeta e re“, Prishtinë, 1968)
4. „Bukuria e zezë“ („Rilindja“, Prishtinë, 1968)
5. „Sezamet“ („Rilindja“, Prishtinë, 1972)
6. „Parabola“ („Rilindja“, Prishtinë, 1976)
7. „Darka e magjisë“ („Rilindja“, Prishtinë, 1978)
8. „Skënderbeu“ – poemë („Faik Konica“, Prishtinë, 2004)
9. „Orfeiana“ – Shtatë Libra Anatema - („Faik Konica“, Prishtinë, 2004)
1. Metafizika e Sfidimit
2. Mandragora
3. Klepsidra e Magjisë
4. Martirium
5. Magna Karta
6. Ekzodus
7. Kodeksi i Argasit

prozë:

1. „Vegullia“ - roman („Rilindja“, Prishtinë, 1979)
2. „Mbledhësit e purpurit“ - roman („Rilindja“, Prishtinë, 1982)
3. „Kori i gjelave të vdekur“ - tregime („Dukagjini“, Pejë, 2002)
4. „Makthi“ - roman („Faik Konica“, Prishtinë, 2004)
5. „Amullia“ - roman („Faik Konica“, Prishtinë, 2004)
6. „Krupa“ - roman („Faik Konica“, Prishtinë, 2004)
7. „Skërluta“ - roman („Faik Konica“, Prishtinë, 2004)
8. „Ndeshtrasha“ - roman („Faik Konica“, Prishtinë, 2004)

dramë:

I. „Shtrigani i Gjel-Hanit“ – libër-teatër, tetralogji („Rilindja“, Prishtinë, 1989):
1. Unë Halil Garria
2. Faustiana
3. Ora e Kukuvajkës
4. Panari i Gjilanit
II „Rrakullima“ – teatër-libër, tetraptik („Flaka e vëllazërimit“, Shkup, 1990):
1. Murana
2. Kori i Korbave
3. Familja e Shenjtë
4. Antifona

Zgjodhi e përgatiti: Shaip Beqiri
_______________
P.S.
Poezia eshte e organizuar ndryshe grafikisht, por ne FB nuk mundem ti publikojme si ne orgjinal.

FALENDERIM

Falenderojme poetin Shaip Beqiri qe solli ne sofer poezine dhe biografine e krijuesit Beqir Musliu. Njeherit e falenderojme edhe per KETE foto te B. Musliut, qe fale mikut Shaip Beqiri, publikohet per here te pare ne "Sofra poetike".

Haxhi Muhaxheri

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30