Koalicioni PDK-AKR, në dëm të Kosovës

nga **Agim Gashi** Sat Feb 19, 2011 11:42 pm

Koalicioni PDK-AKR, në dëm të Kosovës

Lëvizja Vetëvendosje është kundër koalicionit PDK-AKR, për shkak të programit që ata paraqesin dhe për shkak të asaj që ata thonë se do ta bëjnë, pohojnë drejtues të kësaj lëvizje. Gjatë një interviste për Evropën e Lirë, Visar Imeri, anëtar i Lëvizjes Vetëvendosje ka thënë se ky koalicion do të jetë koalicion i fillimit të vazhdimit të negociatave të reja me Serbinë, të cilat Vetëvendosje i konsideron që, përveçse janë të padrejta dhe asimetrike, janë shumë të rrezikshme dhe të dëmshme për Kosovën. Sipas tij, negociatat që po përgatiten tash, janë negociata që përfundimisht do ta përfundojnë projektin e bosnjëzimit të Kosovës, pra ndarjes së brendshme të Kosovës - edhe territoriale edhe institucionale. Lidhur me çështjen e betimit të Vetëvendosjes në Kuvend, Imeri ka thënë se kjo është një procedurë teknike, të cilën do ta bëjnë siç e kanë bërë certifikimin si subjekt pjesëmarrës në zgjedhje. “Mirëpo, jemi po ashtu të interesuar që politika në Kosovë të mos mbetet e mbyllur në këtë lloj spektakulariteti, të cilin e kanë bërë këto parti politike, pra që të zhvendosemi nga spektakulariteti dhe ta sjellim përbrenda politikës, diskursit politik, por edhe ngjarjeve politike çështjen e koncepteve politike, moralit në politikë dhe drejtësisë në politikë”, ka thënë Imeri Ndërsa i pyetur se çfarë qëndrimi ka Vetëvendosje për zgjedhjet e Behgjet Pacollit president, Imeri ka thënë se ajo për çfarë angazhohet Pacolli është në kundërshtim të drejtpërdrejtë me atë se për çka angazhohet Lëvizja Vetëvendosje. “Rrjedhimisht, ai, edhe si person, edhe si kandidat për president është i papranueshëm për ne, për shkak të bindjeve të tij politike, të cilat i ka bërë publike në raste të ndryshme dhe në hapësira të ndryshme kohore. Kur themi është i papranueshëm, atëherë edhe s’e votojmë”, ka thënë deputeti i Vetëvendosjes.

Mon	Tue	Wed	Thu	Fri	Sat	Sun
						1
2	3	4	5	6	7	8
9	10	11	12	13	14	15
16	17	18	19	20	21	22
23	24	25	26	27	28	29
30