Perëndimi ka kundërshtuar një hetim nga KS i OKB-së

nga **Agim Gashi** Thu Apr 21, 2011 1:55 pm

Perëndimi ka kundërshtuar një hetim nga KS i OKB-së

Serbia vazhdon me politikën e saj jo konstruktive kundër Kosovës në Këshillin e Sigurimti ku aleat të vetëm ka Rusinë.

Letra e ministrit të Jashtëm serb, Vuk Jeremiq dërguar Sekretarit të Përgjithshëm të Kombeve të Bashkuara, Ban Ki Moon, ka për qëllim hapjen e një shtegu të ri të akuzave rreth Kosovës, sërish të përqëndruara dhe të ricikluara në akuzat që i ka nisur politika serbe dhe i ka ripaketuar përmes senatorit zvicerran, Dick Marty të mbështetur nga lobi prorus në Këshillin e Evropës.

Serbia edhe në mbledhjen e fundit të Këshillit të Sigurimit për Kosovën në shkurt, kur u shqyrtua raporti tremujaor i Sekretarit të Përgjithshëm mbi zhvillimet në Kosovë, kishte pikërisht këtë qëllim, çorientimin e diskutimit ku flitej për rajonin dhe ‘mandatimi i një

hetimi të ri nga organi ekzekutiv i Kombeve të Bashkuara, pra nga Këshilli i Sigurimit.’

Ambasadorët e shteteve perëndimore hodhën poshtë kërkesën e Serbisë për krijimin të një gjykate ad-hoc për hetim të akuzave për trafikim të organe e, duke thënë se misioni i Bashkimit Evropian për polici dhe sundim të ligjit, EULEX, tashmë i kishte filluar hetimet preliminare dhe se e kishte mandatin dhe aftësinë ta bëj këtë.

“EULEX-i ka mandat të plotë të hetojë këto krime. Nuk mendoj se duhet të krijohet një mandat ad-hoc ndërkombëtar për hetime kur ekziston një i tillë,” tha përfaqësuesja amerikane ambasadorja Rosemary DiCarlo.

Ambasadori i Francës, Gerard Araud tha se ‘akuzat mbi trafikim organesh ishin hetuar më parë dhe nuk kishin dhënë rezultate,’ ndërkaq ambasadori i Britanisë së Madhe, Sir Mark Lyall Grant, tha se vendi i tij ‘nuk besonte se duhet një mandatim i ri nga Këshilli i Sigurimit për hetime.’ Edhe ambasadori i Gjermanisë, Dr. Peter Wittig tha se ‘EULEX-i kishte kapacitet dhe jurisdiksion dhe se një trup ad-hoc nuk do t’i i shërbente një hetimi të shpejt.’ Kërkesën e Serbisë e mbështeti vetëm ambasadori rus, Vitalij Churkin, kur kërkoi krijimin e një mekanizmit hetues i cili do t’i përgjigjej Këshillit të Sigurimit të Kombeve të Bashkuara.

Mon	Tue	Wed	Thu	Fri	Sat	Sun
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30